དྲ་རྒྱ་བཟོ་བཀོད་པ་བསོད་ནམས་འོད་ཟེར།
Sunday 13 March 2011
00:22 | 
Posted by
གངྒའི་ཆུ་རྒྱུན། |
སུམ་ཅུ་པའི་རྣམ་བཤད་ཀུན་བཟང་དགོངས་རྒྱན།༢
(རྣམ་དབྱེ་དྲུག་པ་ནས་བརྒྱད་པའི་བར)
གསུམ་པ་རྣམ་དབྱེ་དྲུག་པ་འཆད་པ་ལ། ཐོག་མར་དམ་བཅའ་བ་ནི།
རྗེས་འཇུག་ཡི་གེ་བཅུ་པོ་ནི། །
ཨི་དང་མཐུན་ལུགས་འདི་ཞེས་བྱ། །
ཞེས་གསུངས་ཏེ། མིང་གི་མཐའི་རྗེས་འཇུག་གི་ཡི་གེ་བཅུ་པོ་རྣམས་ནི། དབྱངས་ཨི་སྦྱར་བའི་རྣམ་དབྱེ་དྲུག་པ་དང་མཐུན་ལུགས་འདི་ཞེས་བྱའོ། །ཞེས་པའོ། །
དེ་ནས་མཐུན་ལུགས་དངོས་བསྟན་པའི་ཕྱིར།
དང་པོ་གཉིས་ལ་དང་པོ་མཐུན། །
གསུམ་ལྔ་བཅུ་ལ་ཀྱ་དང་སྦྱར། །
བདུན་པ་ཉིད་ལ་བདུན་པ་སྟེ། །
ལྷག་མ་རྣམས་ལ་གྱ་སྦྱར་བ། །
ཞེས་གསུངས་ཏེ། མིང་གི་མཐར་རྗེས་འཇུག་དང་པོ་ག་དང་གཉིས་པ་ང་གནས་པ་ལ། དྲུག་པའི་སྒྲ་འདྲེན་པའི་ཚེ་དང་པོ་ག་མཐུན་ཞིང༌། མིང་མཐར་རྗེས་འཇུག་གསུམ་པ་ད་དང༌། ལྔ་པ་བ་དང༌། བཅུ་པ་ས་གནས་པ་ལ་ཀྱ་དང་སྦྱར་བར་བྱ་ལ། བདུན་པ་འ་ཉིད་དེ་འ་ཡིག་ཁོ་ན་གནས་པ་ལ། བདུན་པ་འ་ཉིད་སྦྱར་བར་བྱ་སྟེ། དེའི་ལྷག་མ་ན་མ་ར་ལ་རྣམས་གནས་པ་ལ་གྱ་སྦྱར་བ་མཐུན་ནོ། །
དེ་དག་གང་ལ་འཇུག་པ་ནི།
དེ་དག་ཨི་སྦྱར་འབྲེལ་བའི་ས། །
ཞེས་གསུངས་ཏེ། དེ་ལྟར་སྦྱར་བ་དེ་དག་སྟེ། ག་ཀྱ་འ་གྱ་རྣམས་ལ་དབྱངས་དང་པོ་ཨི་སྦྱར་བས་གི་ཀྱི་འི་གྱི་ཞེས་འབྱུང་བ། དེ་རྣམས་དོན་གང་གི་སའམ་གནས་ལ་འཇུག་ན། རྣམ་དབྱེ་དྲུག་པ་འབྲེལ་བ་སྟེ། རང་གི་ཆ་ཤས་དང༌། ཡོ་བྱད་ལ་སོགས་པ་འབྲེལ་ཆོས་རྣམས། རང་དང་འབྲེལ་བར་སྒྲུབ་པའམ་རང་གི་ཡིན་པར་སྒྲུབ་པ་ལ་འཇུག་གོ །དེ་ཡང་དང་པོ་གཉིས་ལ་དང་པོ་མཐུན་པའི་དཔེ་ནི། བདག་གི་མིག རང་གི་གཟུགས་ལྟ་བུའོ། །གསུམ་ལྔ་བཅུ་ལ་ཀྱ་དང་སྦྱར་བའི་དཔེ་ནི། ཁྱོད་ཀྱི་ནོར། ཁྲག་ཀྱི་བྱང་བུ། ལས་ཀྱི་རྣམ་སྨིན་ལྟ་བུའོ། །བདུན་པ་ཉིད་ལ་བདུན་པ་མཐུན་པའི་དཔེ་ནི། བྱང་ཆུབ་སེམས་དཔའི་སྤྱོད་པ། ངའི་ལུས་ལྟ་བུའོ། །ལྷག་མ་རྣམས་ལ་གྱ་སྦྱར་བའི་དཔེ་ནི། གཞན་གྱི་ཚིག གཤམ་གྱི་མི། གསེར་གྱི་སྣོད། ཞལ་གྱི་སྒོ་ལྟ་བུའོ། །འདིར་དངོས་སུ་མ་བཤད་པ། ད་དྲག་གི་དབང་གིས་ཀྱི་ཐོབ་པ་ནི། རྣམ་ཐར་ཀྱི་སྒོ། ཕྱི་རོལ་ཀྱི་ཁང་པ་སོགས་དང༌། འི་དང་བྱ་བ་གཅིག་པ་ཚིགས་བཅད་ཀྱི་རྐང་པ་ཁ་སྐོང་བ་ལ་ཡི་སྦྱོར་བ་ནི། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །ལྟ་བུ། ད་དྲག་གི་མཐར་ཀྱི་སྦྱོར་བ་ནི་ཕོ་ཡིས་ཕོའི་མིང་མཐའ་དྲངས་པའོ། །འདིར་དངོས་སུ་མ་བཤད་ཀྱང་ཀྱི་ལ་སོགས་པ་འཇུག་པ་ནི། རྣམ་དབྱེ་དྲུག་པ་མ་ཡིན་པ་གཞན་ལའང་མཐོང་སྟེ། དོན་འགལ་བ་དཔེར་ན། དྲང་པོ་དང་འཁྱོག་པོ་ལྟ་བུ་ལ་མཚོན་ན། སངས་རྒྱས་ནི་ཆོས་དྲང་པོ་ཁོ་ནར་གསངུས་མོད་ཀྱི། ཐབས་ལ་མཁས་པའི་དབང་གིས་འཁྱོག་པོར་ཡང་གསུང་ངོ༌། །ལྟ་བུ་དང༌། དེ་ལྟ་མོད་ཀྱི་སོགས་ལྟ་བུ་མི་མཐུན་པའི་རྒྱན་ལ་འཇུག་པ་ནི་སྨྲ་སྒོར་བཤད་པ་ལྟར་རོ། །དོན་དེ་ཁོ་ནར་ངེས་པར་བཟུང་ནས། གཞན་འགོག་པ་ལ་འཇུག་པ། བུམ་པ་ནི། མི་རྟག་པ་ཡིན་གྱི་རྟག་པ་ནི་མ་ཡིན་ནོ། །འདི་ནི་མི་ཡིན་གྱི་ལྷ་མ་ཡིན་ནོ། །འདི་ནི་རྒྱུ་ལས་འབྱུང་གི རྒྱུ་མེད་པ་ལས་མི་འབྱུང་ངོ་སོགས་ལྟ་བུའོ། །
སྡོམ་ནི།
ད་བ་ས་ཀྱི་ག་ང་གི །
ན་མ་ར་ལའི་རྗེས་སུ་གྱི། །
འ་དང་མཐའ་རྟེན་མེད་མཐར་འི། །
རྐང་པ་སྐོང་ཚེ་ཡི་ཐོབ་བོ། །ཞེས་བྱའོ། །
བཞི་པ་རྣམ་དབྱེ་གསུམ་པ་འཆད་པ་ནི།
དེ་ཉིད་ལ་ནི་བཅུ་པ་སྦྱར། །
བྱེད་པའི་སར་ནི་ཤེས་པར་བྱ། །
ཞེས་གསུངས་ཏེ། རྣམ་དབྱེ་དྲུག་པར་འཇུག་པའི་གི་ཀྱི་གྱི་འི་བཞི་པོ་དེ་དག་ཉིད་ལ་བཅུ་པ་ས་ཡིག་སྦྱར་བས། གིས་ཀྱིས་གྱིས་འིས། ཞེས་གྲུབ་པ་ནི། རྣམ་དབྱེ་གསུམ་པ་བྱེད་པ་ཞེས་བྱ་བ། བྱེད་པ་པོ་གཙོ་བོར་སྟོན་པའི་རྣམ་དབྱེའོ། །ས་ཞེས་པ་གནས་ཀྱི་དོན་ཏེ། བྱེད་པ་པོ་སྟོན་པའི་གནས་སུ་ཤེས་པར་བྱའོ། །དེ་ཇི་ལྟར་ཤེས་པར་བྱ་ན། དཔེར་ན། བདག་གིས་ཐོས། རང་གིས་བྱས། ཁྱོད་ཀྱིས་བཤད། ཤེས་རབ་ཀྱིས་དཔྱད། སྲས་ཀྱིས་ཉན། སེམས་དཔའིས་བསླབས། གཞན་གྱིས་གོ དགྲ་བཅོམ་གྱིས་སྤངས། གསེར་གྱིས་ཉོས། ཞལ་གྱིས་བཞེས་ལྟ་བུའོ། །ཤུགས་ལ་བསྟན་པ་ད་དྲག་གི་མཐར་ཡིད་ཀྱི་འདུས་ཏེ་རེག་པའི་རྐྱེན་ཀྱིས་ཚོར་བ། རབ་འབྱོར་ཀྱིས་གསོལ་བ། ཕ་རོལ་ཀྱིས་བཤད་ལྟ་བུའོ། །སྐད་གསར་བཅད་ལ། བྱང་ཆུབ་སེམས་དཔས་བསླབས། བླ་མས་བསྐྱབས། བུམ་པས་ཆུ་བཅུས་སོགས་མིང་མཐར་ས་ཡིག་རྐྱང་པ་སྦྱར་བས་ཀྱང་བྱེད་པ་སྟོན་ནོ། །
ལྔ་པ་རྣམ་དབྱེ་དེ་དག་གི་ཡི་གེའི་སྦྱོར་ཚུལ་ལས་འཕྲོས་ནས་ཚིག་རྒྱན་སོགས་འཆད་པ་ལ། ཐོག་མར་རྒྱན་སྡུད་བསྟན་པའི་ཕྱིར།
ཨཱ་ལི་ཕྱིས་ནས་གཉིས་པ་སྦྱར། །
ཚིག་རྒྱན་གཉིས་དང་སྡུད་པར་འགྱུར། །
ཞེས་གསུངས་ཏེ། གོང་དུ་རྣམ་དབྱེ་དྲུག་པའི་སྒྲ་དངོས་སུ་བསྟན་པ། ཀྱི་འི་གཉིས་དང༌། ཤུགས་ལ་ཁ་སྐོང་གི་ཡི་དང་བཅས་པ་གསུམ་གྱི་ཨཱ་ལི་ཨི་ཕྱིས་ནས། རྗེས་འཇུག་གཉིས་པ་ང་ཡིག་སྦྱར་བས། ཀྱང་འང་ཡང༌། ཞེས་གྲུབ་པ་དེ་ནི། མཐུན་པ་དང་མི་མཐུན་པའི་ཚིག་རྒྱན་གཉིས་དང༌། སྡུད་པའི་དོན་ལ་འཇུག་པར་འགྱུར་རོ། །
དེ་ལ་མཐུན་པའི་ཚིག་རྒྱན་ནི། མཐུན་པའི་ཆོས་གཉིས་གཞི་གཅིག་ལ་སྡུད་ཅིང༌། ཁྱད་པར་ཚིག་མཛེས་པར་བྱེད་པ་སྟེ། དཔེར་ན། མཛེས་པའང་ཡིན་ཏེ་མདོག་ཀྱང་དཀར། །དཔལ་ཡང་འབར་ལ་ཡིད་ཀྱང་འཕྲོག །ཅེས་པ་ལྟ་བུའོ། །
མི་མཐུན་པའི་ཚིག་རྒྱན་ནི། མི་མཐུན་པའི་ཆོས་གཉིས་གཞི་གཅིག་ཏུ་སྡུད་ཅིང༌། ཁྱད་པར་ཚིག་མཛེས་པར་བྱེད་པ་སྟེ། དཔེར་ན། ཕྱོགས་རིས་མེད་ཀྱང་བདུད་དཔུང་འཇོམས། །འཆིང་བ་སྤངས་ཀྱང་ཐུགས་རྗེས་བསྡམས། །ཆགས་པ་སྤངས་ཀྱང་འགྲོ་ལ་ཆགས། །ལྟ་བུའོ། །
ཚིག་རྒྱན་དུ་མི་འགྱུར་བའི་སྡུད་པ་ལ་ཡང༌། ཁྱད་པར་གྱི་གཞི་དང༌། ཁྱད་པར་གྱི་ཆོས་གོང་འོག་གཉིས་ཀས་ཕན་ཚུན་སྡུད་པ། ཨུཏ྄པ་ལའང་ཡིན་ལ་སྔོན་པོ་ཡང་ཡིན་ནོ། །ལྟ་བུ་གཞི་མཐུན་པར་སྟོན་པ་དང༌། ཆོས་ཀྱང་དྲན་ཏེ། ཆོས་མ་ཡིན་པ་མིན་ནོ། །ལྟ་བུ་གོང་མས་འོག་མ་སྡུད་པ་དང༌། ལྷས་ཆར་ཕབ་སྟེ། ཀླུས་ཀྱང་འབེབས་སོ། །ལྟ་བུ་འོག་མས་གོང་མ་སྡུད་པ་དང༌། ཀྱང་འང་གཉིས་དང་འཇུག་པ་མི་མཐུན་པ་ཡང་གི་དོན། ཡང་ན་འདི་ལྟར་བྱ་སྟེ་ལྟ་བུ་རྣམ་གྲངས་གཉིས་ལ་སོགས་པ་བསྣན་པ་ལ་འཇུག་པ་སྟེ། སྨྲ་སྒོར།
ཡང་ཞེས་བྱ་བ་བསྣན་པའང་ཡིན། །ཞེས་སོ། །འདི་དོན་སྔ་མའི་སྟེང་དུ་རྣམ་གྲངས་གཞན་བསྣན་པ་ཡིན་པས། རྣམ་གླིང་པས། ངེས་བཟུང་གི་བརྣན་དུ་བཤད་པ་མི་འཐད་དོ། །དེ་བཞིན་དུ། ཡང་དང་ཡང་དུ་དང༌། ཡང་ནས་ཡང་དུ་དང༌། སླར་ཡང་དང༌། དེ་ནས་ཡང་སོགས་བསྐྱར་བའི་དོན་ལ་འཇུག་ཅིང༌། བསྐྱར་བ་ནི། དོན་སྔ་མ་ཉིད་བལྡབས་པ་ཡིན་ལ། སྡུད་པ་ནི་དོན་སྔ་མ་བལྡབས་པ་ཙམ་མ་ཡིན་པར། བྱ་བ་དང༌། བྱེད་པ་དང༌། དགག་པ་དང༌། སྒྲུབ་པ་ལ་སོགས་པའི་ཁྱད་པར་རྣམས། དོན་སྔ་ཕྱིའི་སྦྱོར་བ་སྡུད་པར་བྱེད་པའོ། །འོ་ན་ལྷག་བཅས་དང་སྡུད་པའི་ཁྱད་པར་གང་ཞེ་ན། དེ་ཡང་སྡུད་པ་ནི། དོན་གྱི་གཞི་སྔ་མར་གང་སྦྱར་བྱའི་བྱ་བ་ལ་སོགས་པའི་ཁྱད་པར་དེ་དག་ཕྱི་མར་ཡང་ངེས་ཅན་དུ་སྦྱོར་བར་སྟོན་པ་སྟེ། དཔེར་ན། མོན་པས་འབྲས་ཟའོ། །རྒྱ་གར་པས་ཀྱང་འབྲས་ཟའོ། །ཞེས་པ་ལྟ་བུ་བྱ་བའི་ཁྱད་པར་འབྲས་ཟ་བ་གཞི་གཉིས་ཀ་ལ་སྦྱར་ནས། གཉིས་ཀའམ་གང་ཡང་རུང་བ་ལ། ཀྱང་སོགས་སྡུད་ཚིག་སྦྱར་རུང་གི མོན་པས་འབྲས་ཟའོ། །རྒྱ་གར་པས་ཁྲུས་བྱེད་དོ། །ལྟ་བུ་འབྲས་ཟ་བ་དང༌། ཁྲུས་བྱེད་པ་ལ་སོགས་པ་ཁྱད་པར་མི་མཐུན་པས། གཞི་མཐུན་པ་ལ་སྦྱོར་བ་ལ་སྡུད་ཚིག་སྦྱར་མི་རུང་ངོ༌། །ལྷག་བཅས་ནི། ཁྱད་པར་གཅིག་ལྟ་བུ། གཞི་ཐ་དད་པ་དུ་མ་ལ་སྦྱོར་བའི་ངེས་བཟུང་མི་དགོས་པར། དོན་སྔ་མ་མ་རྫོགས་པར། ལྷག་མ་ཡོད་པ་ཙམ་སྟོན་པའོ། །
སྡོམ་ནི།
ག་བ་ད་ས་ད་དྲག་མཐར། །
ཀྱང་དང་རྗེས་འཇུག་གཞན་རྣམས་མཐར། །
འང་ཐོབ་རྐང་པ་སྐོང་ཚེ་ཡང༌། །ཞེས་བྱའོ། །
དེ་ནས་ལྷག་བཅས་ཀྱི་སྒྲ་འཆད་པའི་དབང་དུ་བྱས་ཏེ།
ལ་དོན་སུ་ལ་ཨུ་ཕྱིས་ནས། །
དེ་ལ་གསུམ་པའི་དང་པོ་སྦྱར། །
དེ་ལ་ཨཱ་ལི་གསུམ་པ་སྦྱར། །
དེ་ནི་ལྷག་མ་དང་བཅས་པའོ། །
ཞེས་གསུངས་ཏེ། གོང་གི་ལའི་སྒྲ་དང་མཐུན་པའི་སུ་ཡིག་ལ། དེའི་སྲོག་གི་དབྱངས་ཨུ་ཕྱིས་ནས། ས་རྐྱང་དུ་གནས་པ་དེ་ལ། སྡེ་བ་གསུམ་པ་ཏ་སྡེའི་ཡི་གེ་དང་པོ་ཏ་ཡིག་སྦྱར་བས། སྟ་ཞེས་པ་འབྱུང་ངོ༌། །དེ་ལ་ཨཱ་ལི་གསུམ་པ་ཨེ་སྦྱར་བས། སྟེ་ཞེས་གྲུབ་པ་དེ་ཉིད་ནི། ཚིག་དོན་སྔ་མ་མ་རྫོགས་པར། སླར་ཚིག་ལྷག་མ་གཞན་སྟོན་རྒྱུ་ཡོད་པ་ལ་འཇུག་པས། ལྷག་མ་དང་བཅས་པའི་སྒྲའོ། །ཞེས་པ་འདིར་དངོས་སུ་བསྟན་པ་དང༌། མ་བསྟན་ཀྱང་རྗེས་འཇུག་གི་དབང་གིས་ལྷག་བཅས་ལ། དེ་དང་ཏེ་ཡང་སྦྱོར་བ་ཡོད་དོ། །དེ་ཡང་མཚམས་སྦྱོར་བའི་ལྷག་བཅས་དང༌། དམ་བཅའི་བའི་ལྷག་བཅས་དང༌། གཞན་འདྲེན་པའི་ལྷག་བཅས་དང་གསུམ་མོ། །དེ་ལྟར་ཡང་སྨྲ་སྒོར།
སྟེ་ནི་ལྷག་མ་ཡོད་པ་སྟེ། །
མཚམས་སྦྱོར་བ་དང་དམ་བཅའ་དང༌། །
གཞན་འདྲེན་པ་དང་གསུམ་དུ་འདོད། །ཅེས་སོ། །
དེ་ལ་མཚམས་སྦྱོར་བ་ནི། མདའ་འཕངས་ཏེ་ཕོག ལག་པ་བརྐྱང་སྟེ་བཟུང༌། ལྷ་མཆོད་དེ་ལས་བྱ་ལྟ་བུ། རིམ་ཅན་དུ་སྦྱོར་བ་དང༌། འཛུམ་དམུལ་ཏེ་མདངས་ཕྱུང༌། སོ་བསྟན་ཏེ་བགད་ལྟ་བུ། ཅིག་ཆར་དུ་སྦྱོར་བ་གཉིས་ཏེ། དེ་ལྟར་ཡང་སྨྲ་སྒོར།
ཚིག་གཉིས་རིམ་དང་ཅིག་ཆར་དུ། །
སྦྱོར་བར་བྱེད་པ་མཚམས་སྦྱོར་ཡིན། །ཞེས་པ་ལྟར་རོ། །
དམ་བཅའ་བ་ནི། རྒྱུ་མཚན་ལ་སོགས་པ་འདྲེན་པའི་སྒོ་ནས་དམ་བཅའ་བ་སྟོན་པ་སྟེ། དེ་ཡང་རྒྱུ་མཚན་འདྲེན་པ་ནི། མི་རྟག་སྟེ། བྱས་པའི་ཕྱིར་ལྟ་བུ་དང༌། ངེས་ཚིག་འདྲེན་པ་ནི། འདི་ནི་དགྲ་བཅོམ་པ་ཞེས་བྱ་སྟེ། ཉོན་མོངས་པའི་དགྲ་བཅོམ་པའི་ཆོས་དང་ལྡན་པས་སོ། །ལྟ་བུ་དང༌། རྣམ་གྲངས་ཀྱི་དབྱེ་བ་འདྲེན་པ་ནི། ཕུང་པོ་ནི་ལྔ་སྟེ། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའོ། །ལྟ་བུ་རྣམས་སོ། །དེ་ལྟར་ཡང་སྨྲ་སྒོར།
གང་ཞིག་གིས་ནི་སྔ་མ་ལ། །
གསལ་བར་བྱེད་པ་དམ་བཅའ་བ། །ཞེས་སོ། །གཞན་ཡང་དེ་ལ་དཔེ་འདྲེན་པ་དང༌། རྒྱས་བཤད་འདྲེན་པའི་དམ་བཅའ་སོགས་འགྲེལ་བ་ལས་བཤད་དོ། །
གཞན་འདྲེན་པ་ནི། འདི་ནི་མི་སྟེ། འདི་ནི་ལྷའོ། །ལྟ་བུ་དོན་ལྷག་མ་ཡོད་པ་ཙམ་དུ་སྟོན་པའི་སྒོ་ནས། སྔ་མ་རྣམས་ལས་གཞན་དུ་འདྲེན་པའོ། །དེ་ལྟར་ཡང་དེ་ཉིད་ལས།
ལྷག་མ་ཡོད་པ་སྟོན་གྱུར་ཅིང༌། །
དེ་ལས་གཞན་གྱུར་འདྲེན་པའོ། །ཞེས་སོ། །དེ་རྣམས་ཀྱིས་ཀྱང་རིག་པའི་འཇུག་པ་མང་དུ་འཕེལ་བའི་སྒོ་ཡིན་པས་འདིར་བཤད་དོ། །
སྡོམ་ནི།
ད་དེ་ན་ར་ལ་ས་དང༌། །
ད་དྲག་ཅན་མཐར་ཏེ་རྐྱང་ཐོབ། །
ག་ང་བ་མ་འ་རྣམས་དང༌། །
མཐའ་རྟེན་མེད་མཐར་ས་སྟེ་འོ། །ཞེས་སོ། །
ཞར་ལ་འབྱེད་སྡུད་ཀྱི་སྒྲ་བསྟན་པའི་ཕྱིར།
རྗེས་འཇུག་ཡི་གེ་བཅུ་པོ་ལ། །
དྲུག་པ་སྦྱར་ན་འབྱེད་སྡུད་ཡིན། །
ཞེས་གསུངས་ཏེ། རྗེས་སུ་འཇུག་པའི་ཡི་གེ་བཅུ་པོ་སོ་སོ་ལ། རྗེས་འཇུག་དྲུག་པ་མ་ཡིག་སྦྱར་བས་གམ་ངམ་དམ་ནམ་བམ་མམ་འམ་རམ་ལམ་སམ་ཞེས་འབྱུང་བ་ནི། དོན་སོ་སོར་འབྱེད་པ་དང༌། སྡུད་པ་གཉིས་ལ་འཇུག་པའི་སྒྲ་ཡིན་ནོ། །
དེ་ཡང་འབྱེད་པ་ནི། དབྱེ་བའི་གཞི་གཅིག་ལས། རྣམ་གྲངས་མང་པོར་འབྱེད་པ་སྟེ། དཔེར་ན། ཕུང་པོ་ནི་ལྔ་སྟེ། གཟུགས་སམ། ཚོར་བའམ། འདུ་ཤེས་སམ། འདུ་བྱེད་དམ། རྣམ་པར་ཤེས་པའོ། །ལྟ་བུའོ། །དེ་བཞིན་དུ་གཟུགས་རྟག་གམ། མི་རྟག་ལྟ་བུ་བརྟག་པ་དང་དྲི་བའི་སྒོ་ནས་རྣམ་གྲངས་གཞན་དང་འབྱེད་པ་དང༌། གསེར་ལེན་ནམ། དངུལ་ལེན་ལྟ་བུ་གདམ་ངའི་སྒོ་ནས་འབྱེད་པ་རྣམས་སོ། །
སྡུད་པ་ལ་ཡང་གཟུགས་སམ། ཚོར་བའམ། འདུ་ཤེས་སམ། འདུ་བྱེད་དམ། རྣམ་པར་ཤེས་པ་ནི་ཕུང་པོའོ། །ལྟ་བུ་ཕྱོགས་གཅིག་ཏུ་སྡུད་པ་དང༌། བུམ་པ་ནི་མི་རྟག་སྟེ། ཀ་བའམ་སྣམ་བུ་ཡང་ངོ༌། །ལྟ་བུ་ཆོས་སྔ་མར་སྦྱར་བ་ཕྱི་མར་ཡང་སྦྱོར་བ་སྡུད་པ་དང༌། བུམ་པའམ། ཀ་བའམ། སྣམ་བུ་ཡང་བདག་མེད་དོ། །ལྟ་བུ་ཕྱི་མའི་ཆོས་བདག་མེད་པ་སྔ་མར་སྦྱོར་བར་སྡུད་པ་སོགས་ཡོད་དོ། །ཐེ་ཚོམ་གྱི་ནང་ནས་མཐའ་གཉིས་པོ་ཆ་མཉམ་དུ་དོགས་པ་ལ་མཐའ་གཉིས་ཀ་བཀོད་ནས། ཡིན་ནམ་མིན་ཞེས་སྦྱོར་ལ། ཡིན་པ་ལ་མངོན་དུ་ཕྱོགས་པའམ། མིན་པ་ལ་ཤས་ཆེར་ཕྱོགས་པ་ལ་ནི། མཐའ་རེ་རེ་བ་རྐྱང་བར་འམ་ལ་སོགས་པ་སྦྱར་ཏེ། ཡིན་ནམ་ལྟ་བུ་དང༌། མིན་ནམ་ལྟ་བུ་བྱ་ཞིང༌། དེ་དག་ཀྱང་མཐའ་གཉིས་པོ་དངོས་སུ་འབྱེད་པ་དང༌། དོན་གྱིས་འབྱེད་པ་ཅི་རིགས་སུ་ཡོད་དོ། །ད་དྲག་གི་དབང་གིས་ཕོ་མཐའ་དྲངས་པ། ཕྱིན་ཏམ། གྱུར་ཏམ། བཀའ་སྩལ་ཏམ་སོགས་ཀྱང་གོང་མ་བཞིན་དུ་འབྱེད་སྡུད་སྦྱོར་རོ། །
སྡོམ་ནི།
འབྱེད་སྡུད་སྐབས་སུ་རྗེས་འཇུག་བཅུར། །
རང་འདྲར་མ་ཡིག་སྦྱར་བ་དང༌། །
ད་དྲག་ཐོབ་མཐར་ཏ་དང་སྦྱར། །ཞེས་པ་ལྟར་རོ། །
དྲུག་པ་རྣམ་དབྱེ་ལྔ་པ་སོགས་འཆད་པའི་དབང་བྱས་ཏེ།
རྗེས་འཇུག་ཡི་གེ་བཅུ་པོ་ཡི། །
བཞི་པ་དགུ་པ་ལ་བཅུ་པ། །
སྦྱར་བ་འབྱུང་ཁུངས་གནས་ཡིན་ཏེ། །
དགར་དང་སྡུད་པའང་དེ་བཞིན་ནོ། །
ཞེས་གསུངས་ཏེ། རྗེས་འཇུག་ཡི་གེ་བཅུ་པོ་ཡི། གྲངས་བཞི་པ་ན་དང༌། དགུ་པ་ལ་ཡིག་གཉིས་ལ། བཅུ་པ་ས་ཡིག་སྦྱར་ཏེ། ནས་ལས་ཞེས་གྲུབ་པ་དེ་ནི། རྣམ་དབྱེ་ལྔ་པ་འབྱུང་ཁུངས་ཀྱི་གནས་ལ་འཇུག་པ་ཡིན་ཏེ། ལོགས་སུ་དགར་བ་དང༌། སྡུད་པ་ལའང༌། འབྱུང་ཁུངས་ལ་འཇུག་པ་དེ་བཞིན་དུ་འཇུག་པ་ཡིན་ནོ། །
དེ་ཡང་རྣམ་དབྱེ་ལྔ་པ་ལ་འཇུག་པ་ནི། དཔེར་ན། རི་ནས་ཆུ་བྱུང༌། གནམ་ལས་ཆར་བབས། ས་ལས་མྱུ་གུ་སྨིན། རྟ་ལས་ལྷུངས། ཆོས་ནས་བཤད་ལྟ་བུ་འབྱུང་ཁུངས་གང་ནས་བྱུང་བ་སྟོན་པའོ། །
དགར་བ་ནི། རིགས་དང་བྱ་བ་ལ་སོགས་པའི་སྒོ་ནས་གཞན་ལས་ཁྱད་པར་དུ་བྱེད་པ་སྟེ། དཔེར་ན། སྐྱེ་བོ་ཐམས་ཅད་ཀྱི་ནང་ནས་རྒྱལ་པོའི་རིགས་ཕུལ་དུ་བྱུང་བའོ། །ལས་ཐམས་ཅད་ལས་ཡི་གེ་འབྲི་བ་ཁྱད་པར་དུ་འཕགས་པའོ། །སྣམ་བུ་ལས་དར་གོས་རེག་བྱ་འཇམ་མོ། །ལྷའི་ནང་ནས་རྡོ་རྗེ་རྩེ་བརྒྱ་འཛིན་པ་ནི་བརྒྱ་བྱིན་ནོ། །ལྟ་བུ་སྟེ། རིམ་པ་བཞིན་དུ་རིགས་དང༌། བྱ་བ་དང༌། ཡོན་ཏན་དང༌། རྫས་ཀྱི་སྒོ་ནས་བཀར་ཞིང་ཕྱོགས་གཅིག་ཏུ་བྱེད་པའོ། །
སྡུད་པ་ནི། གཟུགས་ནས་རྣམ་མཁྱེན་གྱི་བར་ལྟ་བུ་དང༌། སེ་ར་ནས་ལྷ་སའི་བར་ལྟ་བུའོ། །ལག་པ་བསྙལ་ནས་ཟས་ཟ་ལྟ་བུ་དང༌། དེ་ནས་ལྟ་བུ་མཚམས་སྦྱོར་ལ་ཡང་འཇུག་པ་ཡོད་དོ། །འདི་དག་སྡུད་པ་ལ་ཡང་འཇུག་གོ །འདིར་སྨྲ་སྒོ་ལས།
སྡུད་པ་དག་དང་མཚམས་སྦྱོར་ནི། །
ནས་ལ་ཅུང་ཟད་ལྷག་པ་ཡིན། །ཞེས་ནས་ཀྱི་སྒྲའི་འཇུག་པ་ཕལ་ཆེར་ལས་དང་མཐུན་ཀྱང༌། སྡུད་པ་དང་མཚམས་སྦྱོར་གཉིས་ལ། ལས་མི་འཇུག་ཅིང་ནས་འཇུག་པས། ནས་ཀྱི་འཇུག་པ་ལྷག་པར་བཤད་དོ། །
དེ་ཡང་དཔྱད་པར་བྱ་སྟེ། དེང་སང་གཟུགས་ལ་སོགས་པ། ཞེས་ལ་དང་སོགས་ཀྱི་བར་དུ་ཚེག་བར་མང་ངོ༌། །འོ་ན་དེའི་ལ་དེ་རྣམ་དབྱེ་སོགས་གང་ཡིན་འདྲིའོ། །གལ་ཏེ་རྣམ་དབྱེ་གཉིས་པ་དང་བཞི་པ་དང་བདུན་པ་གང་རུང་ངོ་སྙམ་ན་ཡང་འཐད་པ་མ་ཡིན་ཏེ། གཟུགས་ལ་བྱས་པ་སོགས་དང༌། གཟུགས་ཀྱི་ཆེད་དུ་བྱས་པ་སོགས་ཀྱི་བྱ་བ་གང་ཡང་མི་སྟོན་པ་ཤིན་ཏུ་གསལ་ཞིང༌། སོགས་ཀྱི་སྒྲས་བསྟན་པའི་ཆོས་ཀྱང་གཟུགས་ལ་ཡོད་པ་སོགས་སུ་མི་སྟོན་པར་ཤིན་ཏུ་རྟོགས་སླ་བས། རྣམ་དབྱེ་དེ་གསུམ་གང་དུ་ཡང་མི་འཐད་དོ། །གཟུགས་ཀྱི་ངོ་བོ་ཉིད་དུ་མི་སྟོན་པས་དེ་ཉིད་ལ་མི་འཇུག་ཅིང༌། དུས་མི་སྟོན་པས་ཚེ་སྐབས་ཀྱང་མིན་ལ། སྟེ་སོགས་ལྷག་བཅས་ཀྱི་སྒྲའི་འཇུག་པ་དང་མི་མཐུན་པས་ལྷག་བཅས་ཀྱང་མིན་པ་དང༌། མཚམས་སྦྱོར་གྱི་སྒྲ་ཡིན་ན། དཔེར་ན། ལག་པ་བསྙལ་ནས་ཟན་ཟ། ཞེས་པ་ལ། ལག་བསྙལ་ལ་ཟན་ཟ། ཞེས་ནས་ཀྱི་སྒྲ་དང་འཇུག་པ་གཅིག་པའི་ལ་ཡིག་ལྟ་བུ་དགོས་པ་ལས་དེ་ལྟ་བུ་མིན་པ་དང༌། རྒྱུ་མཚན་གྱི་སྒོ་ནས་ཀྱང་མཚམས་སྦྱོར་གྱི་སྒྲར་མི་འཐད་དོ། །སྡུད་པ་ཡིན་ནོ་ཞེ་ན་ཡང་མི་འཐད་དེ། ལ་ཡིག་གཞུང་འདིར་སྡུད་པར་མ་བཤད་ཅིང༌། གོང་དུ།
དགར་དང་སྡུད་པའང་དེ་བཞིན་ནོ། །ཞེས་ནས་ལས་གཉིས་ཐུན་མོང་དུ་སྡུད་པའི་དོན་ལ་འཇུག་པར་བཤད་པ་དང༌། སྔོན་གྱི་མདོ་རྒྱུད་བསྟན་བཅོས་ཀྱི་ཡིག་རྙིང་ཕལ་མོ་ཆེར་ལས་སོགས་པ་དང༌། ལས་སྩོགས་པ་ཞེས་པ་ཤ་སྟག་བྱུང༌། འདི་དག་སྡུད་པའི་སྐབས་སུ་ཡང་ལ་སོགས་པ་དང༌། ལ་སྩོགས་པ་ཞེས་ལ་དང་སའི་བར་ན་ཚེག་བར་མེད་པ་མཐའ་ཡས་པ་མཐོང་བས། ལས་སྡུད་པའི་དོན་ལ་འཇུག་པ་ཉིད་འཐད་པའི་ཕྱིར། ཕྱིས་ཀྱི་དག་ཡིག་ངག་སྒྲོན་སོགས་མང་པོར་ལ་སོགས་པ་ཞེས་པའི་ལ་དང༌། སའི་བར་དུ་ཚེག་བར་མ་བྱས་ན་ནོར་བར་བཤད་པ་ཡང་བོད་སྐད་སོར་བཞག་གི་ཡི་གེ་ལ་དབྱངས་ལྔ་བཤད་པ་གཞུང་འདི་དང་དངོས་སུ་འགལ་བས་མཚོན་ནུས་སོ། །ཡང་སྨྲ་སྒོར།
ལས་ནི་རྒྱུ་དང་འབྱུང་ཁུངས་དང༌། །
དགར་བ་ཡིན་ཏེ་ནས་དེ་བཞིན། །ཞེས་བཤད་པ་ཡང༌། རྒྱུའི་འཇུག་པ་འབྱུང་ཁུངས་ཀྱི་དོན་ལས་ལོགས་སུ་བྱེད་ན་མི་འཐད་ལ། སྤྱིར་འབྱུང་ཁུངས་ཙམ་དང༌། དེའི་ཁྱད་པར་རྒྱུའི་དོན་ལ་འཇུག་པ་གཉིས་ཀྱི་དབྱེ་བར་བྱེད་ན་རིག་པའི་སྒོ་འཕེལ་བའི་ཐབས་སུ་འགྲོ་ཞིང་དོན་ལའང་གནས་པས་འཐད་དོ། །
བདུན་པ་བོད་པའི་རྣམ་དབྱེ་འཆད་པའི་ཆེད་དུ།
གང་མིང་བརྗོད་པའི་དང་པོ་རུ། །
ཀྱེ་སྦྱར་བ་ནི་བོད་པ་ཡིན། །
ཞེས་གསུངས་ཏེ། གང་ཟག་གང་ཡང་རུང་བའི་མིང་བརྗོད་པའི་དང་པོའམ་ཐོག་མར་ཀྱེ་ཞེས་སྦྱར་བ། དཔེར་ན། ཀྱེ་རྒྱལ་བའི་སྲས། ཀྱེ་གྲོགས་པོ། ཀྱེ་ལྷའི་དབང་པོ་ལྟ་བུའི་ཀྱེའི་སྒྲ་ནི་རྣམ་དབྱེ་བརྒྱད་པ་བོད་པ་ཡིན་ནོ། །འདིར་དངོས་སུ་མ་བཤད་ཀྱང༌། ཀྭ་ཡེ་གྲོགས་པོ་དག་སོགས་ད་ལྟ་བོད་དུ་གྲོང་པ་དག་མི་གཞན་ལ་སྐད་གཏོང་བའི་ཐོག་མར་ཝ་ཡེ་ཞེས་ཕལ་ཆེར་སྦྱར་ནས་འབོད་པ་ལྟ་བུའོ། །དེས་ན་རྣམ་དབྱེ་འཕྲོས་དང་བཅས་པ་བཤད་ཟིན་ཏོ། །