དྲ་རྒྱ་བཟོ་བཀོད་པ་བསོད་ནམས་འོད་ཟེར།
Saturday 12 March 2011
23:27 | 
Posted by
གངྒའི་ཆུ་རྒྱུན། |
ཏུན་ཧོང་གཏེར་ཡིག།
བོད་ཀྱི་བཙན་པོ་རིམ་བྱུང་གི་ལོ་རྒྱུས།
བཙན་པོ་རིམ་བྱུང་གི་ལོ་རྒྱུས་ཞེས་པ་འདི་ནི་སྟོང་སྐུའི་བྲག་ཕུག་ནས་ཐོན་པ་ཞིག་ཡིན་ཞིང་། ཡི་གེ་རྣམས་ཀྱང་བརྡ་རྙིང་ཤ་སྟག་ཡིན་པས་གོ་དཀའ་བ་ཞིག་ཏུ་སྣང་བ་ལས་དེའི་ལོ་རྒྱུས་ཀྱི་དཔྱད་གཞིའི་ཡིག་ཆའི་རིན་ཐང་ཞིག་མངོན་བཞིན་ཡོད་ཙ་ན། བོད་ཀྱི་རིག་གནས་ལོ་རྒྱུས་ལ་བརྟག་ཅིང་དཔྱོད་པར་འདོད་པ་རྣམས་ལ་ཉེ་བར་མཁོ་བ་ཞིག་ཡིན་སྙམ་དུ་སེམས་ཏེ་འདིར་ཁ་ཚང་བཀོད་པ་ལགས་སོ། །
( 1287 P.T. ) ལེའུ་དང་པོ།
༄།།དྲི་གུམ་བཙན་པོ་སྐུ་ཆུང་བའི་ཚེ་མཚན་ཇིར་གདགས་ཤེས་（８４）། །མ་མ་གྲོ་ཞ་མ་སྐྱི་བརླིང་མ་ལ་དྲྀས་ན། མ་མ་འི་མཆིད་ནས། སྐྱྀ་བྲག་མར་བ་ནི་རྙིལ་ཏམ་མ་རྙིལ། དན་མ་འབྲི་སྤངས་ནི་མྱེས་ཚིག་གམ་མ་ཚིག། མཚོ་དམ་ལེ་དབལ་མཚོ་ནི་སྐམས་སམ་མ་སྐམས་ཤེས་མཆི། བྲག་མ་རྙིལ། མཚོ་ཡང་མ་སྐམས་སྤང་ཡང་མྱེས་མ་ཚིག་ཅེས་བགྱིསྣ། མ་མ་གྲོ་ཞ་མ། རྒས་ནས་རྣ་ལོག་པར་ཐོས་སྟེ། བྲག་ཀྱང་རྙིལ། སྤང་ཡང་མྱེས་ཚིག མཚོ་ཡང་སྐམས་ཤེས་ཐོས་ནས། འོན་ཏང་ཆུ་དགུམ་སྲི་དགུམ（８５）གྱིས། དྲི་གུམ་བཙན་པོར་མཚན་ཐོག་ཤིག་ཆེས་མཆི་ནས། །དྲྀ་གུམ་བཙན་པོར་མཚན་བཏགས་ནས། མཚན་བཏགས་ནོང་སྟེ། ཐུགས་སུ་ཡང་ཞུགས། ལྡེ་སྲས་མྱྀ་འི་མྱི་ཚུལ་ཏེ། མངོན་བར་དགུང་དུ་གཤེགས་པ་ལ་སྩོགས་པ་འཕྲུལ་དང་བྱྀན་ཆེད་པོ（８６）མངའ་བས། དྲོད་དང་དྲེགས་མ་ཐུབ་སྟེ། །བཙན་འདྲན་བདའ་（８７）ནས། ཡབ་འབངས་ཕ་དགུའ་དང་། ཡུམ་འབངས་ཚན་གསུམ་ལ་དགྲ་རུ་རྒལ་（８８）གཡག（གཡོག）（）དུ་དྲུང་ཕོད་དམ་ཞེས་བཀའ་སྩལ་ན། སོ་སོ་ནས་ཀུན་གྱིས་མྱྀ་ཕོད་ཆེས་གསོལ་ཏོ། །ལོ་ངམ་རྟ་རྫིས་ཀྱང་མྱི་ཕོད་ཅེས་གསོལ་པ་ལས་མ་གནས་སྟེ། འུང་ནས་ལོ་ངམ་གྱྀས་གསོལ་པ། དེ་ལྟར་མྱྀ་གནང་ན། །ལྷ་འི་དཀོར་མདུང་རང་འདེབས་དང་། །རལ་གྱྀ་རང་གཅོད་དང་། ཁྲབ་རང་གྱོན་(གྱོད)དང་། ཕུབ་རང་བཛུང་ལ་སྩོགས་པ། འཕྲུལ་གྱི་དཀོར་ཆེད་པོ་མངའ་བའྀ་རྣམས་མདག་ལ་སྩོལ་ན་ཕོད་ཅེས་གསོལ་ཏོ། དེ་ནས་ལྷའྀ་དཀོར་ཐམ་ཤད་སྩལ་ཏོ། །འུང་ནས་ལོ་ངམ་རྟ་རྫྀ་ཡང་། མཁར་མྱང་རོ་ཤམ་པོར་སྔར་མཆིས་སོ། །བཙན་པོ་ཡང་མྱང་རོ་ཤམ་པོར་གཤེགས་ནས། མྱང་རོ་ཐལ་བ་ཚལ་དུ་གཡུལ་བྲེས་ནས། །འུང་ནས་རྟ་རྫྀའི་མཆིད་ནས། །དབུའ་འབྲེས་（８９）ཟང་ཡག་ཀྱང་གཆད་དུ་གསོལ། །དབུའ་སྐས་（９０）སྟེན་དགུའ་ཡང་ཁ་ཐུར་དུ་བསྟན་དུ་གསོལ་ནས། དེ་རྣམ་གཉྀས་ཀྱང་དེ་བཞིན་གནང་ངོ་། ། འུང་ནས་ལོ་ངམ་གྱྀས་གླང་པོ་བརྒྱའ་ལ། གསེར་གྱྀ་མདུང་རྩེ་ཉིས་བརྒྱའ་རྦལ་བཏགས་（９１）ཏེ། རྒྱབ་དུ་ཐལ་བ་བཀལ་ནས། གླང་ནང་འཐབ་སྟེ། ཐལ་བ་གཐོར་ནས། དེའྀ་ནང་དུ་ལོ་ངམ་གྱྀས་བརྒལ་ཏོ། །བཙན་པོ་དྲི་གུམ་ལྡེ་བླ་གུང་རྒྱལ་གྱིས་གནས་དུ་དྲངས་ན། ལོ་ངམ་གྱྀས་མཆན་ནས་སྟེའུ་བྱུང་བས། །ལྡེ་བླ་གུང་རྒྱལ་（９２）ནི་ཏི་ཙེ་གངས་རུམ་（９３）དུ་འཕང་སྟེ་གཤེགས་སོ། །བཙན་པོ་དྲི་གུམ་ཡང་དེ་རུ་བཀྲོངས་ནས། སྤུར་ཟངས་བརྒྱའ་（９４）ཁ་སྤྲོད་གྱི་ནང་དུ་བཅུག་སྟེ་རྩང་ཆུའི་གཞུང་ལ་བཏང་ངོ་། །ཆབ་གཞུག་སེར་ཚངསུ་ཀླུ་འོད་དེ་བེད་དེ་རིང་མོའི་ལྟོར་གཤེགསོ། །སྲས་གཉིས་ཀྱང་ཤ་ཁྱི་དང་ཉ་ཁྱི་བཏགསྟེ་རྐོང་ཡུལ་དུ་སྤྱུགསྟེ་བཀྱེའོ། །འུང་གི་རྗེས་ལ་རྷྱ་མོ་རྷུལ་གཞི་ཁུགས་དང་། སྣ་ནམ་བཙན་བཞོང་རྒྱལ་གཉིས། །སྲིད་ཀྱི་ཁྱི་བོ་ཆེ་འོན་ཟུགས་ཡར་གྲགས་དང་། འཞང་གི་ཟུ་ལེ་མ་འཇང་དང་འོན་རྐུ་གཉིས་ཀྱི་སྤུ་ལ་དྲུག（དུག）བསྐུསྟེ། འཕྲང་པོའི་བྲག་གཡའ་པོ་འདའ་ནས། ཕོ་ལ་ལྟསུ་བལྟས་ན་ལྟས་བཟང་སྟེ། ཡུལ་མྱང་རོ་ཤམ་པོ་དྲང་དུ་ལྷགས་ནས། །ཐབས་ཀྱིས་བསྒྱུད་དེ། ཁྱིའི་སྤུ་ལ་དུག་ཡོད་པ་ད་ངའི་རྟ་རྫིས་ཁྲིད་ནས། ཁྱི་བཟང་པོ་ལོ་ངམ་གྱི་ལགིས་བྱུགས་པ་དང་། ངའི་རྟ་རྫིས་ཁྱིའི་སྤུ་ལ་དུག་བསྐུས་པས་ལག་པ་བྱུག་སྟེ་བསད་དོ། ། ཤ་བླན་ནོ། །འུང་གི་འོག་དུ་བཀྲགས་ཀྱི་བུ་ལྷ་བུ་རུ་ལ་སྐྱེས་ཕ་ཚན་དང་། ། རྷྱ་ཕ་ཚན་དུ་འཐབས་སོ། །རྷྱས་བཀྲགས་རབས་བཆད། དུད་སྣ་ཕོ་ལོ་(95)། །བཀྲགས་ཀྱི་ཆུང་མ་གཆིག་བྲོས་ཏེ། །ཕ་མྱིང་གི་ཡུལ་དུ་ཐར་ཏོ། །ལྟོན་བུ་ཁྱེར་ཏེ(96)སོང་བ་བྱུང་ངོ་། །བུ་སྤུས་ལ་འགྲེང་ནུས་ཙམ་ནས། །མ་ལ་མྱི་གང་བྱ་གང་ལ་རྗོ་བོ་ཡོད་ན་ངའི་རྗོ་བོ་གར་རེ། མྱི་གང་བྱ་གང་ལ། ཕ་ཡོད་ན་ངའི་ཕ་ག་རེ་ཞེས་ཟེར་ཏོ། །ང་ལ་སྟོན་ཆིག་ཅེས་མཆི་ན། །མའི་མཆིད་ནས། མྱིའུ་ཆུང་ཁ་མ་ཆེ་ཤིག། རྟེའུ་ཅུང་ཁ་མ་དྲག ང་མྱི་ཤེས་ཤེས་བྱས་ན། སྤུས་ཀྱི་བུ་ངར་ལེ་སྐྱེས་ཀྱི་མཆིད་ནས། ང་ལ་མྱི་བསྟན་ན་ཤིར་འགྲོ་ཞེས་བགྱིས་པ་དང་། མས་ཀྱང་གདོད་བསྟན་(97)ཏེ། ཁྱོད་ཀྱི་ཕ་ནི་རྷྱས་བསད་དོ། །ཁྱོད་ཀྱི་ཇོ་བོ་བཙན་པོ་ནི། །ལོ་ངམ་རྟ་རྫིས་བཀྲོངསྟེ། སྤུར་ནི་ཟངས་བརྒྱའ་མ་ཁ་སྤྲོད་ཀྱི་ནང་དུ་བཅུག་སྟེ། རྩང་པོའི་གཞུང་ལ་བཏང་ངོ་། །ཆབ་གཞུག་སེར་ཚངས་སུ། །ཀླུ་འོ་དེ་རིང་མོའི་ལྟོར་གཤེགས་སོ། །སྲས་མཆེད་གཉིས་ནི་ཤ་ཁྱི་དང་ཟ་ཁྱིར་བཏགསྟེ། རྐོང་ཡུལ་དུ་སྤྱུགསྟེ་བཀྱེའོ། །འུང་ནས་སྤུས་ཀྱི་བུ་ངར་ལ་སྐྱེས་ཀྱི་མཆིད་ནས། ང་མྱི་རླགི་ནི་རྗེས་གཅོད། ཆུ་རླག་གི་ནི་དབྲེས་(98)ཚོལ་དུ་འགྲོ་ཞེས་མཆི་ནས། ཆསྟེ་སོང་ངོ། །རྐོང་ཡུལ་བྲེ་སྣར་དུ་སྲས་ཤ་ཁྱི་ཉ་ཁྱི་དང་མཇལ་ལོ། །ཀླུ་འོ་དེ་བེད་དེ་རིང་མོ་དང་ཡང་མཇལ་ལོ། །བཙན་པོའི་སྤུར་ཇི་འདོད་པས་བླུ་ཞེས་བྱས་ན། །གཞན་ཇི་ཡང་མྱི་འདོད། །མྱིའི་མྱིག་བྱ་མྱིག་ལྟར་འདུག་པ་འོག་ནས་འགེབས་པ་གཆིག་འདོད་ཅེས་ཟེར་ནས། །སྤུས་ཀྱི་བུ་ངར་ལ་སྐྱེས་ཀྱིས། །གནམ་མཐའ་བཞིར་བཙལ་ཀྱང་མྱིའི་མྱིག་བྱ་མྱིག་དང་མཚུངས་པ་འོག་ནས་འགེབས་པ་མ་རྙེད་ནས། བརྒྱགས་ཆད་ལྷམ་བུག(99)སྟེ། སླར་མའི་གང་དུ་འོངས་ནས། མྱི་རླག་གི་ནི་རྗེས་ཆོད། ཆུ་རླག་གི་ནི་དབྲེས་ཀྱང་རྙེད་དོ། །སྲས་ཤ་ཁྱི་ཉ་ཁྱི་དང་ཡང་མཇལད། ཀླུ་འོད་དེ་རིང་མོ་དང་ཡང་མཇལ་ན། སྤུར་གྱི་ཀླུད་དུ། མྱིའི་མྱིག་བྱ་མྱིག་དང་མཚུངས་པ་འོག་ནས་འགེབས་པ་གཆིག་འདོད་ཆེས་ཟེར་ནས་རྙེད་ཀྱིས། །ད་དུང་ཚོལ་དུ་འགྲོ་དགོས་ཀྱིས། །བརྒྱགས་ཐོག་ཤོག་ཅེས་མཆི་ནས་སོང་ངོ། །གང་པར་འཕྲུན་གྱི་འོག་དུ་ཕྱིན་ན། །ཆོ་མྱི་བྱའི་བུ་མོ་ཞིག་ཡུར་བ་བྱེད་པའི་གང་དུ་སོང་ན། བུ་ཁུ་ལྗོ་(100)ན་འདུག་པ་ཞིག མྱི་བྱ་མྱིག་དང་མཚུངས་པ་འོག་ནས་འགེབས་པ་གཆིད་འདུག་ནས། དེ་བླུ་ན་ཇི་འདོད་ཅེས་མ་ལ་དྲིས་ན། མ་ན་རེ་གཞན་མྱི་འདོད་ནམ་ནམ་ཞ་ཞར། བཙན་པོ་རྗེ་དབྱལ་ཞིག་ནོངས་ན། ཐོར་ཏོ་འཕྲེན་མོ་ནི་བཅིངས། ངོ་ལ་མཚལ་གྱིས་བྱུགས། ལུས་ལ་ནི་བཞགས(101)། བཙན་པོའི་སྤུར་ལ་ནི་འཚོག(102)། མྱི་ལ་འཕྲོག་ཕོམ་(103)། ཟས་ལ་ནི་ཟ་འཐུང་། དེ་ལྟར་བྱ་འམ་གྱི་བྱ་ཞེས་མཆི་ནས། དེ་བཞིན་བགྱི་བར། མནའ་བཆད་མཐོའ་བཚད་(104)། དམ་བགྱིས་ཚིག་བགྱིས་ནས། །ཆོ་མྱི་བྱའི་བུ་མོ་ཁྲིད་དེ་སོང་ངོ་། །ཀླུ་འོ་འི་དེ་རིང་མོའི་ལྟོར་(105)སྤུར་གྱི་ཀླུད་དུ་བཅུག་སྟེ་བཏང་ངོ་། །ཉ་ལྷ་གཉིས་ཀྱིས་བཙན་པོའི་སྤུར་བཟུང་ངོ་། །གཡང་ཏོ་བླ་འབུབས་ཀྱི་མགུར་དུ་(106)བང་སོ་བརྩིགསོ། །གཅུང་ཉ་ཁྱི་ནི་ཡབ་ཀྱི་མདང་གཏོང་ངོ་། །གཅེན་ཤ་ཁྱི་ནི་ཡབ་ཀྱི་སྐུ་མཚལ་གཉེར་(107)དུ་གཤེགསོ། །ཉ་ཁྱི་ནི་རྐོང་དཀར་པོ་ལགསོ། །དམག་སུམ་སྟོང་སུམ་བརྒྱ་ཞིག་དང་ཆསྟེ་གཤེགས་སོ། །མཁར་པྱིང་བར་གཤེགས་སོ། །ཡུལ་ཡབ་ཀྱི་རྗེ་མྱི་བཞུགས་ན། པྱི་འབྲོག་གདེངས་(108)པྱོལ་པྱོལ་(109)གྱི་ཆའོ། །དོག་ཡབ་ཀྱི་ཆར་མ་མཆིསྟེ། ས་འོན་བུ་(110)སྤུར་(111)ཁོག་ཁོག་ཅེས་གསུངས་སོ། །མེན་པ་འཕྲེང་པའི་ལ་འདའ་སོ། །ཏིང་སྲོབ་རོང་རིངས་འདའས་སོ། །བ་ཆོས་གུང་དང་དུ་གཤེག་སོ། །མྱང་རོ་ཤམ་པོར་གཤེགས་ན། །ལོ་ངམ་ཕོ་བརྒྱའ་ནི་ཟངས་བུ་(112)བརྒྱའ་གླད་ལ་ཕུབ་ནས་ལྕེབསོའོ། །ལོ་ངམ་མོ་བརྒྱའ་ནི་སླང་བྲང་ལ་བཆར་ཏེ་ངོག་གོ(113)། མྱང་རོ་ཤམ་པོ་ཕམ་བོ། །འགྲེང་ནི་བཙོན་དུ་བཟུང་། །དུད་ནི་མནངསུ་བཆད་ནས། །བ་ཆོས་གུང་དང་དུ་གཤེགསོ། །མགུར་འདི་ཞེས་གསུངསོ། །
འ་བ་ཉི་ཉེ་པས་ཉིད
བྱ་རོ་རོ་ན་མདུང་གི་རྩེ་རང་ནི།
ཡོས་རོ་རོ་ན་ལྟམ་གྱི་གོང་ར་ནིག།
བརླའ་བརྡུངས།
སྤུར་བཏབ།
འོབ་དེ་མྱེད་སྤུ་དེ་མྱེད།།
ཅེས་གསུངས་སོ། །སླར་པྱིང་བ་སྟག་རྩེར་གཤེགས་སོའོ། །ཡུལ་ཡབ་ཀྱི་རྗེ་རུ་གཤེགས་སོ། །ཡུལ་པྱི་འབྲོག་གདེངས་མྱི་པྱོལ་གྱི་ཆ་འོ། །དོག་ཡབ་ཀྱི་ཆབ་མཆིས་ཀྱིས། །ས་འོན་བུ་སྤུར་མྱི་ཁོག་གི་ཆ་འོ། །དེ་ཞེས་མགུར་གསུངསོ། །སྒྱེད་པོ་འོག་གསུངས་ནས། །ཟངས་རྡོ་བླ་ནས་ཕབ་སྟེ། །རྗེ་རུ་གཤེགསོ། །བཤོས་ན་ནི་སྤུ་དེ་གུང་རྒྱལ། གྲོངས་ན་ནི་གྲང་མོ་གནམ་བསེའ་བརྩིག འགྲེང་མགོ་ནག་གི་རྗེ། དུད་རྔོག་ཆགས་(114)ཀྱི་རྐྱེན་དུ་གཤེགསོ།།
ལེའུ་གཉིས་པ།
བཙན་པོ་ལྡེ་པྲུ་པོ་གནམ་གཞུང་རྩན་གྱི་རིང་སླན་ཆད། བློན་ཆེ་བགྱིས་པའི་རབས་ལ། །གནའ་ཐོག་མ་འདའར་ཀྱི་བུ་སྟོང་དང་རྗེས་བྱས་ཏེ། འཛངས་ལ་དཔའ་འོ། །གློ་བ་ཡང་ཉེ་འོ། །དེའི་འོག་ཏུ་རྔེགས། །དུད་ཀྱི་རྗེས་བྱས་ཏེ། དཔའ་ལ་འཛངསོ། །དེའི་འོག་དུ་ཁུ་ལྷ་བོ་མགོ་གར་གྱིས་བྱསྟེ། དགྲ་ལ་དཔའ་ཞིང་སྙིང་ཤེས། །མྱིག་རྣོ། །དེའི་འོག་དུ་ལྷོ་ཐོང་འབྲིང་ཡ་སྟེངས་ཀྱིས་བྱསྟེ། པྱིའི་དགྲ་ཐུབ། །ནང་གི་ཁབ་བསོ་མཐོའ། །དེའི་འོག་དུ་རྔེགས་ཐང་ཡོང་ཐང་རྗེས་བྱསྟེ། །དཔའ་ཞིང་འཛངསོ། །དེའི་འོག་དུ་གནུབས་སྨོན་ཏོ་རེ་སྤུང་བརྩན་གྱིས་བྱས་ཏེ། སྙིང་ཤེས་མྱིག་རྣོ། དེའི་འོག་དུ་མཐོན་མྱི་འབྲིང་པོ་རྒྱལ་བཙན་ནུས་བྱས་ཏེ། དཀུའ་ཆེད་པོ་བྱས་ནས། །ཁོ་ནའི་སྲིང་མོ་མཐོན་མྱི་ཟ་ཡར་སྟེང་། །དུག་བསྐུར་ཏེ་བཏང་བ་ལས། །མོ་ན་དུག་(115)འཐུངས་ནས། བཙན་ནུ་བཀུམ་བ་ལགསོ། །དེ་འི་འོག་དུ་སྣ་ནམ། །འབྲིང་ཏོག་རྗེས་བྱས། །དེའི་འོག་དུ་གནུབས་ཁྲི་དོ་རེ་མཐོང་པོས་བྱས། དེ་འི་འོག་དུ་བནུབས་ཁྲི་དོག་རྗེ་གཙུག་བློན་གྱིས་བྱས། དེ་འི་འོག་དུ་གནུབས་མཉེན་ཏོ་རེ་ངན་སྣང་གིས་བྱས། །དེ་འི་འོག་དུ་ཤུད་བུ་རྒྱལ་ཏོརེ་ང་མྱིས་བྱས་ཏེ། འདི་ཡན་ཆད་ཀྱི་བློན་པོ་འཕྲུལ་དང་ལྡན་ཏེ། ལྟག་བརྟན་(116)དང་འདོམ་སྟེ། འཛངས་ཀྱང་ཚད་མྱེད་དོ། །མྱི་དེ་ལྟེ་བུ་མ་སྐྱེས་པ་ཙམ་གྱི་ཚོད་དོ། །དེའི་འོག་དུ་མོང་ཁྲི་དོ་རེ་མང་ཚབ་ཀྱི་བྱསྟེ། འཛངས་ཀྱི་ཚད་ནི། །རྩན། །བོད་ཀྱི་ཇོ་བོ་མར་མུན་བརླགས་ཏེ། དཀུའ་ཆེད་པོ་(117)བློད་པའ་འི་ཚེ། དེང་ཕོ་ཉ་ཞིག་རིངས་པར་འོང་བ་སྙམ་གིས། ཕོ་ཉ་འི་ལན་མྱུར་དུ་བགྱི་འཚལ་ཞེས་མཆི་ནས། །པོ་ཉ་འི་ལན་ཇི་ལ་མ་རག་པར་བྱས་པ་ལས། །འིང་གི་རྗེས་ལའ། །ཕོ་ཉ་མཆིས་ནས། །གསོད་བྱ་མྱི་དགོས་པར། སྔར་སུག་ལས་བགྱིས་ལགསྟེ། འུང་ཙམ་མོ། །དེའི་འོག་དུ། མགར་ཁྲི་སྒྲ་འཛི་རྨུན་གྱིས་བྱསྟེ། འཛངས་རྒྱ་དང་ལྟག་བརྙན་ནི། །འདྲོན་པོ་རྨྱི་གསུམ་འགྲོགས་ཏེ་འགྲོ་ན། །འདྲོན་པོ་ཐོག་མའི་སྙིང་ལ་འདི་སེམས། །བར་མ་འི་སྙིང་ལ་འདི། །སེམས། ཐ་མའི་སྙིང་ལ་འདི་སེམས་ཤེས། །གྲོགས་་པོ་ལ་གཏམ་བྱས་པ་དང་། བདེན་ནམ་བརྫུན། འདྲོན་པ་གསུམ་ཁ་བཀལ་ཏེ་རྨས་ན། ཁྲི་སྒྲ་འཛི་རྨུན་མཆི་བ་བཞིན་མེད་དེ། འཛངས་ཀྱང་ནི་དེ་ཙམ་མོ། །དེ་འི་འོག་དུ་མྱང་མང་པོ་རྗེ་ཞང་སྣང་གིས་བྱས་སོ། །བཙན་པོ་ཡབ་ཁྲི་སློན་བཙན་དགུང་དུ་གཤེགས། །སྲས་ཁྲི་སྲོང་བརྩན་གྱི་རིང་ལ། །མྱང་མང་པོར་རྗེ་ཞང་སྣང་གིས། །སུམ་ཁམས་ཐམས་ཤད་འབངས་སུ་དགུག་པར་བཀའ་སྩལ་ཏོ། །མྱང་མང་པོ་རྗེ་ཞང་སྣང་གིས། །འཛངས་ཀྱི་བློ་སྒྱུ་གཉིས་ཀྱིས། །མྱི་རྟ་གཉིས་ཚེགས་མ་བྱུང་བར། དཔྱའ་ཕབ་ལུག་རྟུག་གི་སྤུ། ། ལྕེ་ཐོར་ཏོ་ལ་བརྗོད་དེ། འབངས་གཉུག་མ་(118)བཞིན་དུ་བཀུག་ལྟེ་འུང་ཙམ་མོ། །དེ་འི་འོག་དུ་མགར་མང་ཞམ་སུམ་སྣང་གིས་བྱས་སོ། །མང་ཞམ་སུམ་སྣང་དང་། ཁུ་ཁྲི་སྙ་དགྲུ་(དགུའ)ཟུང་གཉིས། རལ་གྱི་དང་བརྡའ་པྲད་ཆེས་བགྱིསྟེ། གནའ་བཙན་པོ་འབྲོ་མཉེན་གྱི་རིང་ལ། །མཐོན་མྱི་འབྲིང་པོ་རྒྱལ་བཙན་ནུས་བློན་ཆེ་བགྱིས་པ་ན་ཡང་། གློ་བ་རིངས་པར། མགར་མང་ཞམ་སུམ་སྣང་རལ་གྱི་དང་། བརྡའ་ཕྲད་ཏེ་ཚོར་བ་སྐད་དུ་བགྱིས་ཏེ། མཟུང་སྟེ་བཀྱོན་ཕབ་ན་ཡང་། གཤེད་མ་མང་ཞམ་སུམ། སྣང་གིས་བགྱིས་ཏེ། བཀུམ་ནས། །མགོ་བཆད་པ་ཐོག་ཆེས་བླངས་(119)ཏེ། སྣམ་པྲག་(120)དུ་བཙུག་ནས། །གོམ་པ་ལྔ་དྲུག་ཙམ་བོར་བ་དང་འགྱེལ་བ་སྐད་བྱ་འོ། །དེ་འི་འོག་དུ་ཁྱུང་པོ་སྤུང་སད་ཟུ་ཙེས་བྱས་པ་ལས། འོ་མལདེ་ལོད་བཙན་དང་རེགས་མ་མཇལ་(121)ནས། །མཁར་ཁྲི་བོམས་སུ་མཆིས་ཏེ། །ཁྲི་བོམས་དཀུའ་གང་པུབ་ནས། བཙན་པོ་སྲོང་བརྩན་སྟོན་མོ་གསོལ་བར་བྱས་ཏེ། གློ་བ་རིངས་པ། མགར་ཡུལ་ཟུང་གིས་ཚོར་ནས། རང་མི་མགོ་བཆད་དེ་གུམ་མོ། །སྤུང་སད་ཟུ་ཙེ་འཛངས་ཀྱང་ཀྱི་ཚད་ནི། །རྩིས་གྲ་(122)གསུམ་ཞལ་ཙེ་གྲ་བཞི་ཡང་རྣ་བས་ཉན་ཞིང་གཆོག མྱིག་མངས་གྲ་ཆིག་ཀྱང་ཟླ་ལ་རྩེ་ན། རྒྱལ། བྱ་པུག་རོང་ཁྱུ་གཆིག་ནས་ཁ་ལ་འཕྲུར་བ་ཡང་། གཆིག་གཉིས་གསུམ་བཞི་ལྔ་དྲུག་ཆེས་བགྲགས། བྱ་པྱིར་འཕུར་བ་ཡང་བགྲངས་པ་ལས། བྱ་ཆིག་མ་ཚང་ན། །ཁྲས་བསད་པ་འདྲའ་ལྟོས་ཤེས་མཆི་ནས། །མྱི་ཡོངས་ཀྱིས་བལྟས་པ་ལས། །བྱ་ཆིག་ཁྲས་བཀུམ་སྟེ། །སྤུང་སད་ཟུ་ཙེ་ལྟེ་བུ། ཚོར་སྐྱེན(123)ལ་དཀུའ་ཆེ། །སྙིང་འཛངས། མྱི་ཆིག་ལ་ཚོགས་དགུ་ཚོགས་ན། །ཟུ་ཙེ་ལྟེ་བུ་སུ་ག་ལ་ཡང་མྱེད་དོ། །དེ་འི་འོག་དུ་མགར་སྟོང་རྩན་ཡུལ་ཟུང་གིས་བྱས་སོ། །ཡུལ་ཟུང་རྒས་ནས། འོ་མ་ལྡེ་ལོད་བཙན་བཅུག་གོ རིང་པོ་མ་རག་པར་གྲོ་བ་རིངས་ནས་བཀུམ་མོ། །འུང་ནས་བློན་སྟོང་རྩན་སླར་བཅུག་སྟེ། ལོ་དྲུག་བགྱིས་ནས། རྒས་ཏེ་གུམ་མོ། །སྐྱིན་བར་ཞང་ལོན་པྲ་མོ་དང་འབངས་ཀྱིས་དཔྱའད་(124)པ་ནི། དབའས་སུམ་སྣང་བཅུག་ཀྲང་ཞེས་དཔྱད་དོ(125)།།རྗེ་བློན་གསངས་སྟེ་བཀའ་བཏགས་པ་ནི། །བློན་ཆེ་འི་ལུགས་སློབ་པ་འོག་པོན། དབའས་སུམ་མང་གིས་བྱས་ཏེ། སུམ་སྣང་གུམ་ནས། །བློན་བཙན་སྙ་ལྡོམ་བུས་བྱས་སོའ། དེ་འི་འོག་དུ་ཁུ་མང་པོ་རྗེ་ལྷ་ཟུང་གིས་བྱས་སོ། །ལྷ་ཟུང་བཀྱོན་ཕབ་ནས། །དབའས་ཁྲི་གཟིགས་ཞན་ཉེན་གྱིས་བྱས་སོའ། །ལྷ་ཟུང་བཀྱོན་ཕབ་ནས། །དབའས་ཁྲི་གཟིགས་ཞན་ཉེན་གྱིས་བྱས་སོའ། །དེ་ནས་མགར་ཁྲི་འབྲིང་བཙན་བྲོད་ཀྱིས་བྱས་སོ། །དེ་འི་འོག་དུ་དབའས་ཁྲི་སུམ་རྗེ་རྩང་བཞེར་གྱིས་བྱས་སོའ། དེ་འི་འོག་དུ་རྔེགས་མང་ཞམ་སྟག་ཚབ་གྱིས་བྱས་སོ། །དེའི་འོག་དུ་དབའས་སྟག་སྒྲ་ཁོང་ལོད་ཀྱིས་བྱས་ཏེ། བཀྱོན་ཕབ་ནས། །འགྲོ་ཅུང་བཟང་འོར་མང་གྱིས་བྱས་སོ། ། དེ་འི་འོག་དུ་འབལ་སྐྱེ་ཟད་ལྡོང་ཚབ་ཀྱིས་བྱས་སོ། །སྐྱེ་ཟང་ལྡོང་ཚབ་བཀྱོན་ཕབ་ནས། །དབའས་སྣང་བཞེར་ཟུ་བརྩན་གྱིས་བྱསོ། །དེ་འི་འོག་དུ་མགོས་ཀྲི་བཟང་ཡབ་ལག་གིས་བྱས་སོ། །དེ་འི་འོག་དུ་མཚིམས་ཞང་རྒྱལ་ཟིགས་ཤུ་ཏེང་གིས་བྱས་སོ། །བཀྱོན་ཕབ་ནས། འབྲོ་ཅུང་བཟང་འོར་མང་གྱིས་བྱས་སོ། །དེ་འི་འོག་དུ་འབལ་སྐྱེ་ཟད་ལྡོང་ཚབ་ཀྱིས་བྱས་སོ། དེ་ནས་ངན་ལམ་སྟག་སྒྲ་ཀླུ་གོང་གིས་བྱསོ། །དེའི་འོག་དུ་སྣ་ནམ་ཞང་རྒྱལ་ཚན་ལྷ་སྣང་གིས་བྱསོ། །དེའི་འོག་དུ་འབྲོ་ཁྲི་གཟུ་རམ་ཤགས་ཀྱིས་བྱསོ། །དེ་འི་འོག་དུ་དབའ་མང་རྗེ་ལྷ་ལོད་ཀྱིས་བྱས་སོ། །དེ་འི་འོག་དུ་འབྲོ་ཁྲི་སུམ་རྗེ་སྟག་སྣང་གིས་བྱས་སོ། །དེ་འི་འོག་དུ་དབའས་རྒྱལ་ཏོ་རེ་སྟག་སྙས་བྱས་སོ། །
ལེའུ་གསུམ་པ།
མཁར་པྱིང་བ་སྟག་རྩེ་ན་ནི་རྒྱལ་སྟག་བུ་སྙ་གཟིགས་བཞུགས། །ཉེན་ཀར་རྙིང་པ་ནི་ཟིང་པོ་རྗེ་སྟག་སྐྱ་བོ་མཆིས། །སྤུར་བའི་ཡུ་སྣ་ན་ནི། །ཟིང་པོ་རྗེ་ཁྲི་བངས་སུམ་མཆིས། །འུང་ནས་ཟིང་པོ་རྗེ་སྟག་སྐྱ་བོ་ལྟ་ཞིག ཇི་ལ་ཡང་བ་ནི་ཉེས་པར་བཅུག་གོ། འཛངས་པ་སྙིང་ཉེ་བ། ལེགས་པའི་སྲིད་བྱས་བློ་བསྟན་པ་ནི་མྱི་ཉན། །མྱི་གཅམ་བུ་གསགི(126)ངོ་ཟ་རི་(127)བྱེད་པའི་ཚིག་ནི། །ཆེད་དུ་ཡང་ཉན་ཏོ། །མྱི་འདི་སྟེ་བུའི་ཡུས་བྱུང་ངོ། །མྱི་འཛངས་པ་དྲང་མཁྲང་བྱེད་པ་(128)དང་། དཔའ་བོ་ཆུ་གང་(129)བྱེད་པ་ལ་སྡང་སྟེ། རི་མོ་བསྐྱུངས་(130)། །མ་འོངས་པའི་ཆད་པ་ནི་ནན་ཆེ་འོ། །མྱི་མཁོའ་བ་འི་ལས་ཀྱི་སྣ་གྲངས་ནི་མངས་སོ། །འུང་ལྟར་ཟིང་པོ་རྗེ་སྟག་སྐྱ་བོ། །ཆོས་ལོག་ཆིང་སྲིད་གྱུར་པས། །རྗོ་བོ་ཉེས་དགུ་བྱེད་པ། མྱི་ཆིག་གིས། མཐོང་ཡང་། ཉེས་པའི་བློ་གདབ་(131)དུ་མ་འོས་པའི་ཆད་པ་ནན་ཆེས། ཚིག་དྲག་གིས། །ཇི་ག་སུས་ཀྱང་བློ་གདབ་མ་ཕོད་དོ། །རྗོ་བོ་ནི་བླ་ན་གཐུམ(132)མོ། །ཁོལ་པོ་ནི་འོག་ན་སྐྲག་གོ། །རྗོ་བོ་ནི་བླ་ན་སྨྱོ། །ཁོལ་པོ་ནི་འོག་ན་གྲམ་མོ(133)། ། གཆིག་ལ་གཆིག་སྙིང་མྱི་བརྟན་ཏེ། །ཐ་དད་དུ་སེམས་སོ། །ཇོ་བོ་ཟིང་པོ་རྗེ་ངན་ཞན་ཏེ། །ཇི་ལ་ཡང་ལོག་པ་གཤིན་པྱོགས་ཉེས་དགུར་བྱེད་པས། །ཡུལ་གྱི་སྲིད་ཀྱང་དམའས་སོ། །མྱི་ཡོངས་ཀྱང་རྗོ་བོ་ལ་འཁང་ངོ། །འུང་ནས་(134)ཟིང་པོ་རྗེ་སྟག་སྐྱ་བོ་འི་བློན་པོ། །མཉན་འཇི་ཟུང་ནག་པོས། །རྗོ་བོ་ལ་གསོལ་པའ། །རྗོ་བོ་ལ་ཡང་ལོག་པ་གཤིན་ཕྱོགས་མཛད་པས། །སྐོལ་(135)ཀྱི་སྲིད་ནི་སྲིད་དུ་མ་རུང་། ཆོས་(136)ནི་ཆོས་སུ་མ་རུང་སྟེ། ཡུལ་གྱི་མྱི་དབུལ། ཉམས་གྱི་སྲིད་དམའ་སྟེ། ན་མོ་(137)བརླག་ཟིན་ན་ཇི་ནོངས་ཤེས་གསལ།(གསོལ)ནས། འུང་ནས། ཟིང་པོ་རྗེ་སྟག་སྐྱ་བོ་ཉན་དུ་མ་རུང་སྟེ། འདི་སྐད་ཟེར་བ་ཉེས་སོ་ཤེས། །འཛི་ཟུང་བློན་པོ་ལས་པྱུང་ངོ་། །འུང་ནས་འཛི་ཟུང་མ་རངས་སྟེ། །ཟིང་པོ་རྗེ་ཁྲི་པང་སུམ་ལ་ལྟས་(138)ནས། །ནག་པོ་འཁུས་ཏེ། །སྐྱ་བོ་བསད། དྲེ་འུ་རྒྱལ་ཏེ་བསེའ་སྒ་མཆག་གོ། །སྟག་སྐྱ་བོའི་ཡུལ། ཡུལ་ཡེལ་རབ་སྡེ་བཞི་དང་ཀླུམ་ཡ་གསུམ། །ཟིང་པོ་རྗེ་ཁྲི་པང་སུམ་གྱིས། །འདུས་སོའ། །དེའི་དཀུའ་འགེལ(139)དུ་མཁར་སྡུར་བས་བཆད་དེ། ཀླུང་ཡ་སུམ་གྱི་སྨད། མཉེན་འཛི་ཟིང་གི་བྲན་དུ་དངར་ཏོ། །བྲན་གྱི་ས་རིས་(140)ཀྱི་ནང་དུ་། །མྱང་ནམ་ཏོ་རེ་ཁྲུ་གྲུ་དང་། སྨོན་ཏོ་རེ་ཅེང་སྐུ་སྤད་ཀྱང་། །འཛི་ཟུང་གི་བྲན་དུ་བཆད་དོ། །འུང་ནས། འཛི་ཟུང་གི་ཆུང་མ་པ་ཚབ་ཟས། །མྱང་བྲན་བྱེད་པ་ལ། །དྲེགས་བཀུར་ཏེ། །སྡིག་བསྣོལ(141)། སྟུ་བསྟན་ནས། མྱང་ཙེང་སྐུ་རངས་ཏེ། ཟིང་པོ་རྗེ་ཁྲི་པང་སུམ་ལ། །མཉན་གྱི་བྲན་བྱེད་མྱི་ཕོད་ཆེས་འཁངས་སྟེ་གསོལ་ཏོ། །ཟིང་པོ་རྗེ་ན་རེ། མཉན་འཛི་ཟུང་ལས་ང་ལ་སྙིང་ཉེ་མྱེད་པ་འི་བྲན་དུ།། ཁྱོན་(ཁྱོད)འདའ་མ་རན་པ་མྱེད(142)དོ། །རྗོ་མས་སྡིག་བསྣོལ་སྟུ་བསྟན་པ་བས། །ཁར་གླང་(143)ཡང་རྗོ་མོ་དབང་གིས། །ཉེས་པ་མྱེད་དོ་ཞེས་བསྒོ་(144)སྟེ། ། གསོལ་བ་མ་གནང་ངོ་། །འུང་གི་ཚིག་དེས་ཙེང་སྐུ་ཤིན་དུ་མ་རངས་སྟེ་ཡི་ཆད་དོའ། །འུང་གི་རྗེས་ལ། །ཟིང་པོ་རྗེ་འི་མངན་དབའས་བཤོས་ཏེ་ར་ཤུ་གུ་དང་། །གཤེན་ཁྲི་བཞེར་འདོན་ཁོང་གཉིས། །འཕྲེན་པའི་རྫིང་ཁར་འཐབས་ནས། གཤེན་ཀྱིས་དབས་བསད་དོ། །དབའས་ཀྱི་ཕངས་ཏོ་རེ་དབྱི་ཚབ་ཀྱིས་ཟིང་པོ་རྗེ་ལ། ནུ་བོ་གཤེན་ཀྱིས་བསད་པའི་སྟོང་ཇི་གནང་ཞེས་གསོལ་ནས། །ཇིང་པོ་རྗེས། །གཤེན་ཁྲི་བཞེར་ཁོལ་ཚབ་ནང་བློན་བྱེད་པའི་ངོ་མ་ཚོད་(145)དེ། དགེ་བས་མྱི་དགེ་བ་བསད་ན། །བསད་དུ་ཟད་དོ་ཞེས་བསྒོའོ། །འུང་གི་ཚིག་དེས། ། དབྱི་ཚབ་ཤིན་ཏུ་མ་རངས་སྟེ་ཡི་ཆད་དོ། །འུང་ནས་མྱང་དབའས་གཉི་ཀའ་(146)ཡི་ཆད་དེ། །འགྲོགས་སྟེ་དོང་ངོ་། །དབྱི་ཚབ་ནི་སྔ། ཙེང་སྐུ་ནི་འཔྱི་སྟེ། །ཁྱིམ་དུ་དོང་ངོ་། །ཙེང་སྐུ་གཚིག་སུ་པྱི་ན་(147)ཚུར་སྨྲ་སྟེ། ཆབ་ཆབ་ནི་ཕ་རོལ་ན། །ཡར་ཆབ་ནི་ཕ་རོལ་ན། །མྱི་འི་ནི་མྱི་བུ་སྟེ། །ལྷའི་ནི་སྲས་པོ་བཞུགས། །རྗེ་བདེན་ནི་བཀོལ་དུ་དགའ། །སྒ་བདེན་གྱིས་ནི་བསྟད་དུ་དགའ། །ཞེས་སྙིང་ལ་སེམས་པ་ཁར་ཏོར་ཆེས་བྱུང་ནས། དབྱི་ཚབ་སྡུན་ན་འགྲོ་བའི་རྣ་བར་སྟངས་ཤེས་ཐོས་སྟེ། །དབྱི་ཚབ་ཀྱིས་ཚིག་དེ་ཏོག་ཆེས་བླངས་ནས། །ཙེང་སྐུ་ཁྱོད་ཟེར་བ་ལས་བདེན་བ་མྱེད་དོ།། ཁོ་བོ་ཡང་འདི་ལས་མ་རངས་པ་མྱེད་ཀྱིས། །ཁྱོད་སེམས་པ་དང་མྱི་འདྲའ་རེ་ཞེས་མནའ་བོར་རོ། །འུང་ནས། མྱང་དབའས་གཉིས་ཟིང་པོ་རྗེ་ལས་འཁུས་ཏེ། ། བཙན་པོ་སྤུ་རྒྱལ་ལ་གློ་བ་ཉེ་བར་བཟས་ནས། །མནའ་མཐོའ་ཡང་ཆེར་བཆད་དོ། །འུང་གི་འོག་དུ་དབའས་དབྱི་ཚབ་ཀྱིས། ཞང་པོ་མནོན་བཟང་ཏོ་རེ་སྲོན། བློ་ལ་བཏགས་(148)ཏེ། མནའ་མཐོའ་བཆད་པ་ལས། །བཟང་ཏོ་རེ་ཤི་ནས། །པུ་བང་སུམ་འདྲོན་པོ། །ཟིང་པོ་རྗེའི་ནང་ཀར་བྱེད་པ་བློ་ལ་བཏགསྟེ་མནའ་མཐོའ་བཆད་དོ། །མྱང་སྨོན་ཏོ་རེས་ཚེས་པོང་ནག་སེང་བློ་ལ་བཏགས་ཏེ། །མནའ་མཐོའ་བཆད་དོ། །འུང་ནས་མྱང་དབའས་མནོན་དང་གསུམ་གྱིས་ཚེས་པོང་ནག་སེང་ལས་པྲིན(149)ཀྱིས། སྤུ་རྒྱལ་སྟག་བུའི་སྙན་དུ་བོན་ནས་(150)། །བཙན་པོའི་ཞལ་ནས་ངའི་སྲིང་མོ་ཞིག་ཀྱང་། །ཟིང་པོ་རྗེ་འི་ག་ན་འདུག་མོད་ཀྱི། །ཀྱེད་ཟེར་བ་བཞིན་བྱ་འོ་ཞེས་བཀའ་སྩལ་ནས། །མྱང་དབའས་མནོན་དང་གསུམ། །བྲོ་ལེན་ཆིང་མཁར་པྱིང་བར་མཆི་སྟེ། །ཉིན་ཞིང་ནི་ཕན་ཚལ་གྱི་ཤིང་ཁུང་ན་སྐུག་སོ། །མཚན་ཞིང་ནི་པྱིང་བར་མཆི་སྟེ། །དབུ་སྙུང་བྲོ་མནའ་གཅོད་པའི་ཚེ། །ཡར་མྱི་འབངས་ཀྱིས་དཔྱད་པའ། །མྱི་བཟངས་ནི་རྟ་བཟངས་ཤིག ཉིན་ཞིང་ནི་ཕག་ཚལ་ན། །མཚན་ཞིང་ནི་པྱིང་བར་མཆིའ། །དགྲ་འམ་ནི་ཞིང་(ཟུན)ཅིའུ་ཞེས་དཔྱད་དོ། །འུང་གི་རྗེས་ལ། ཟོང་པོ་རྗེ་ལོ་(ལ)དྲ་མ་མ་དྲངས་པར་རྒྱལ་སྟག་བུ་དགུང་དུ་གཤེགསོ། །གདོད་མ་རྒྱལ་སྟག་བུའི་སྙན་དུ་ནི། །སྲིང་ཚེས་པོང་ནག་སེང་གིས་བགིས(བགྱིས)སོ། །དེ་ཚུན་ཆོད་ནི་ཚེས་པོང་ནག་སེང་གི་བྲན། སྤུག་གྱིམ་ཏང་རྨང་བུས་བགྱིས་སོ། །སྤུང་གྱིམ་ཏང་རྨང་བུ་བློ་ལ་བཏགས་ན། །གཉིད་ལོག་ན་བརྡོལ་གྱིས་དོགས་ནས། ཁྱོ་མོ་དང་མྱི་ཉལ་བར་རི་ལ་ཉལ་ཞིང་། ནུབ་རེ་མལ་རེ་འཕོའོ། །ཁྱོ་མོ་ལ་ཡང་ང་ལ་མཚན་གྱི་ཡུ་དགས་ཤིག་བབ་གྱིས། །གསང་ཐུབ་པར་གྱི་ཤིག་ཆེས་བཏམསོ། །འུང་ནས་ཇི་ཞིག་བྱེད་བྱེད་ནས། །ཁྱོ་མོ་དང་གཉིས་ཀ་འཐབ་སོ། །འུང་ནས་ཁྱོ་མོ་ན་རེ། །ཁྱོད་ལྟོ་བོ་(151)ཆེ་ལ། །རི་དགས་མ་བབ་ཀྱི། །ལྟོ་སྦྱོར་དུ་ངེས་སོ་ཞེས་བྱས་སོ། །འུང་ནས་དེའི་ནུབ་མོ་ནས་མོད་ལ་ངོ་བྱས་སྟེ། །མཛའ་ནས། དམུར་དམུར་(152)ཏེ་བཅད་ནས། །ཁྱོ་མོ་ཡང་ཤི་འོ། །འུང་གི་འོག་དུ་ཟིང་པོ་རྗེ་ལ་མ་དྲངས་པར། །གྱིམ་ཏང་རྨང་བུ་ནད་ཀྱིས་བཏབ་སྟེ་རབས་ཆད་དེ་ཤི་འོ།།
ལེའུ་བཞི་པ།
།།བཙན་པོ་སློན་མཚན་དང་། སློན་ཀོལ་མཆེད་གཉྀས་ཀྱིས། མྱང་ཙེ་སྐུ་དང་། དབའས་དབྱྀ་ཚབ་དང་། དབའས་མྱེས། སྣང་དང་། དབའས་པུ་ཚབ་དང་། མནོན་འདྲོན་པོ་དང་། ཚེས་པོང་ནག་སེང་དྲུག བྲོ་སྩལ་པའི་ཚྀག་ནི། དེང་ཕན་ཆད། ཟིང་པོ་རྗེ་རྒྱབ་དུ་མྱྀ་དོར་རེ། སྤུ་རྒྱལ་པང་དུ་མྱྀ་ལེན་རེ། །བཙན་པོ་སྤུ་རྒྱལ་ལ་གློ་བ་འདྲྀང་(153)རེ། །མཐང་གྲང་རེ། མན་ངག་ཐུབ་པར་མྱི་འཚལ་རེ། པྱི་མ་ནང་འཚལ་རེ། སོམ་ཉི་བགྱིད་རེ། །བརྟུལ་ཕོད་པར་མྱྀ་འཚལ་རེ། །སྲོག་སྤོངས་（མྱི）འཚལ་རེ། །བཙན་པོ་སློན་བཙན་གྱིས། །བཀའ་ཇྀ་སྩལད་པ་བཞྀན་མྱི་ཉན་རེ། གཞན་སུས་བསླུས་ཀྱང་ཉན་རེ་བར་བྲོ་སྩོལ་ཏོ། །མྱང་ཙེང་ཅུང་དང་། མྱང་མུ་རྣམས་བྲོ་ལ་གཐོགསོ། །དེ་ནས་དགུང་ཐུས་བགོས་སྟེ། སླར་མཆིས་སོ། །གཅུང་སློན་ཀོལ་དང་། ཡུལ་སྟོང་ཙུན་གཉིས་ནྀ། །སླད་ན་ཡུལ་འཚོའ། །ཞྀང་བཞུགས་སོ། །བཙན་པོ་ཁྲི་སློན་བཙན་གྱིས། ཞབས་ཀྱྀས་བཙུགས་ཏེ། དམག་ཁྲི་དང་ཆསྟེ་དྲངས་སོ། །མྱང་ཙེང་སྐུ། །དང་། མནོན་འདྲོན་པོ་གཉིས་ནི། །སྟག་པ་ཤརུ་ལ་ཚུན་ཆད། །བྱ་གཆོད་(154)ཆིང་ཉན་རྣར་བཀྱེའོ་(155)། །དབའས་དབྱྀ་ཚབ་དང་། །ཚེས་པོང་ནག་སེང་གཉིས་ནྀ། །བཙན་པོ་འི་སྤྱན་འདྲེན་ནོ། །ཆུ་བོ་ནི་རབ་ཏུ་བཏོད་དོ། །དྲ་ལ་(156)ནྀ་དབྱེ་རུ་བཏྀང་ངོ་། ། མཁར་ཡུ་སྣ་ནི་ཕབ་བོ། །དགུ་གྲྀ་ཟིང་པོ་རྗེ་ནྀ་བརླག་གོ། །མང་པོ་རྗེ་སུམ་བུ་ནྀ་དྲུ་གུ་ཡུལ་དུ་བྲོས་སོ། །ཕགི་ཡུང་བ་སྣ་མན་ཆད། རྐོང་བྲེ་སྣར་ཡན་ཆད། བཙན་པོ་ཕྱག་དུ་བོན་ཏོ། །བཙན་པ་ཁྲི་སློན་བཙན་གྱྀས། །བཀའ་སྩལ་ཏེ། །ཡུལ་ངས་པོ་ལས། །འཕན་ཡུལ་དུ་མྱྀང་སྤོས་སོ། །མྱང་དབའས་ཀྱྀས། །མཆིད་བླངས་པ། །གཟུས་ནྀ་ལྷ་བོན་ཏོ། །སློན་མཚན་སློན་ཀོལ། །གཟུས་(159)ནྀ་ལྷ་བོན་ཏོ། །སྲིན་བྱ་རྒོད་ཀྱིས་བཏགསྟེ། །ཚེས་པོང་ནག་སེང་གིས་བཏགས་སོ། །རྗེ་བདེན་གྱྀས་ནྀ་བཀོལ་ཏོ། །སྒ་བདེན་གྱྀས་ནི་བསྟད་དོ། །མྱྀ་སྨོན་རུམ་དུ་སྤུང་ངོ། །མཚེ་གཟུགས་(160)རུམ་དུ་འཁྲུངས་སོ། །དེ་ནས་ཡུལ་ངས་པོ་འི། །འབངས། །དབའས་དབྱྀ་ཚབ་ལ་སྩོགས་པས། །བཙན་པོ་འི་མཚན་གསོལ་པ། །ཆབ་སྲིད་གནམ་བས་མཐོ། །དབུ་རྨུག་རི་བས་བརྩན་ཏེ། །གནམ་རྀ་སློན་མཚན་དུ་བཏགསོ། །མྱང་དབའས་མནོན་དང་གསུམ་གྱིས། །ཟིང་པོ་རྗེའི་སྲིད། །བཙན་པོ་སྤུ་རྒྱལ་གྱི་ཕྱག་དུ་དངར་ཏོ། །དེ་ནས་གནམ་རི་སློན་མཚན་གྱིས་ཕྱག་ལྕག(161)གིས་དྲས་(162)ཏེ། །མྱང་ཙེང་སྐུའི་བྱ་དགའར། ། མཉན་འཛི་ཟུང་གི་མཁར་སྡུར་བ་དང་། བྲན་ཁྱིམ་སྟོང་ལྔ་བརྒྱའ་སྩལཏོ། །དབའས་དབྱི་ཚབ་ཀྱི་བྱ་དགའར། །ཟ་གད་གཤེན་ཀྱི་ཡུལ་ས་དང་། །མལ་ཏྲོ་ཕྱོགས་ནས་བྲན་ཁྱིམ་སྟོང་ལྔ་བརྒྱའ་སྩལ་ཏོ། །མནོན་འདྲོན་པོའི་བྱ་དགའར། ཁོ་ནའི་པུ་ནུ་པོ་མནོན་ལ་སྩོགས་པ་བྲན་ཁྱིམ་སྟོང་ལྔ་བརྒྱའའ་སྩལ་ཏོ། །ཚེས་པོང་ནག་སེང་གི་བྱ་དགའད་འོན་ཀྱི་སྨོན་མཁར་ནས། བྲན་ཁྱིམ་སུམ་བརྒྱའ་སྩལ་ཏོ། །མྱང་ཙེང་ཅུང་དང་། ཕ་སྤུན་པོ་མུ་གསེང་གཉིས་ནི་དཀུ་ལ་གཐོགས་སྟེ། དཀུ་རྒྱལ་(163)པའི་ནང་དུ་ཡང་གཐོགས་སོ། །དབའས་དབྱི་ཚབ་ཀྱི་ཚ་བོ། །སྟག་པོ་རྗེ་མྱེས་སྣང་དང་། མང་པོ་རྗེ་པུ་ཚབ་གཉིས་དཀུའ་རྒྱལ་ལ་གཐོགས་སོ། །ཚེས་པོང་ནག་སེང་གི་ནུ་བོ་ན་གུ་དཀུའ་རྒྱལ་ལ་གཐོགས་སོའ། །འུང་ལྟ་སྟེ། མྱང་དབའས་མཐོན་དང་གསུམ། ཚེས་པོང་སྲིན་དང་བཞིས། །གློ་བ་ཉེ་ནས། བྲན་ཁྱིམ་མང་པོ་དང་ཡུལ་ཆེད་པོ་སྩལ་ཏོ།། བཙན་པོའི་བློན་པོར་བཅུག་གོ།། རྒྱལ་པོ་འདིའི་རིང་ལ། །ཁྱུང་པོ་སྤུང་སད་ཀྱིས་རྩང་བོད་(164)ཀྱི་རྗེ་བོ་མར་མིན་མགོ་མཆད་དེ། ། རྩང་བོད་ཁྱིམ་ཉི་གྲི། །བཙན་པོའི་ཕྱག་དུ་པུལ་ཏེ། །ཟུ་ཙེ་གློ་བ་ཉེ་འོ། །འུང་ནས། བཙན་པོ་སློན་བཙན་གྱིས། །རྩང་བོད་ཁྱིམ་ཉིས་གྲི། །ཟུ་ཙེ་གློ་བ་ཉེ་བ་འི་བྱ་དགའར་སྩལ་ཏོ། །འུང་གི་འོག་དུ་བཙན་པོ་མཆེད་གཉིས་ལ། །མོང་སློན་པོ་གློ་བ་རིངས་པ། ཟུ་ཙེ་གློ་མ་ཉེ་བས་དཀུའ་བེལ(165)ནས། བཙན་པོ་མཆེད་གཉིས་ཀྱི་སྐུ་ལ་མ་དར་པར་(166)།། མོང་སྔོན་པོ་བཀུམ་སྟེ།། ཟུ་ཙེ་གློ་ཉེའོ། །ཟིང་པོ་རྗེ་སྲིད་བརླག་པའི་བློ་ལའ་གཐོགས་ཏེ། ། ཟུ་ཙེ་གློ་ཉེ་འོ། ། འུང་གི་རྗེས་ལ་དགས་པོ་འབངས་སུ་མངའ་བ་ལས་ལོག་གོ ། འུང་ནས་རྗེ་བློན་ཡོངས་སུ་འདུས་ཏེ། དགས་པོ་ལྷ་དེ་དགུག་པའི་བཀའ་གྲོས་མཛད་ནས་དམག་པོན་སུས་བྱ་ཞེས་བློད་ན། སེང་གོ་མྱི་ཆེན་གྱིས། ཁོ་བོས་རྔོ་ཐོག་ཆེས་ཁས་བླངས་སོ། ། འུང་ནས་ཁྱུང་པོ་སྤུང་སད་ན་རེ།། ཁྱོ་འདྲའས་ (167)དམག་པོན་འོང་འམ། ། མྱི་འཛངས་པ་གོ། ཀྱེའུ་(168)ནང་དུ་མྱུང་བུ་(169)བཅུག་པ་དང་མཚུངས་ཤེས་བྱ་ན། ཁྱོ་འདའ་བཙན་པོའི་སྣམ་པྱི་པར་(170)བཀའ་སྩལ་ནས།། ལོ་དུ་མ་ཞིག་ལོན་ན།། འཛངས་རྔོ་ཐོག་གོ་ཞེས། ། མྱི་ཆིག་གིས། བསྟོད་པ་ཁོ་བོས་མ་ཐོས་ན།། ཁྱོ་འདའས་མྱི་འོང་བ་ལ་བསྒྲེ་བསྒྲེ་(171)སྟེ། འབངས་ཆབ་འཚལ་བར་(172)མཆི་འོ། ། ཞེས་བྱས་སོ། ། མྱི་ཆེན་ན་རེ། མྱི་ཡོངས་ཀྱིས་ཁོ་བོ་ལ་སྙན་དུ་མྱི་བརྗོད་པ་ཡང་བདེན་ནོ། ། ཁོ་བོ་སྔོན་སྒྱེའུ་ནང་དུ་ཞུགས་ཀྱང་མ་ཞུགས། རྩེ་མོ་པྱིར་(173)མ་བྱུང་བ་ཡང་བདེན་ནོ། །ཁོ་བོ་སྔོན་སྒྱེའུ་ནང་དུ་ཞུགས་སུ་ཟིན་ན།། རྩེ་མོ་བས་ཡུ་བ་ཕན་ཆད་པྱུང་(174)སྟེ་སོང་ཟིན་ནོ། ། འུང་གིས་དེང་ཐོ་བས་གསོལ་བ་ཡང་། ། སྔོན་ཇི་འི་ནང་དུ་ཡང་མ་ཞུགས་པས། གདོད་འཇུག་པར་གསོལ་བ་ཡིན་ནོ་ཞེས་བྱས་སོ། །འུང་ནས་བཙན་པོས་ཀྱང་། མྱི་ཆེན་གསོལ་བ་བཞིན་གནང་ནས། དགས་པོ་འབངསུ་དགུག་པའི་དམག་པོན་དུ་བཀའ་སྩལ་ཏོ།། འུང་ནས་མྱི་ཆེན་གྱིས། ། དགས་པོ་ལྷ་དེ་ལ་བརྒལ(175)ཏེ། ། དགས་པོ་ཡོངས་སུ་བཀུད་ཏེ། །མྱི་ཆེན་གྱི་བྱ་དགའར། གསེར་ཁུང་རེ་འུ་རྒལ་གྱི་མྱི་དང་འབྲོག་དུ་བཆས་ཏེ་སྩལ་ཏེ།། འབྲོང་ཆེ་པོ་དངུལ་གྱི་རྭ་མྱི་ཡོངས་ཀྱི་ཁ་ན་བརྗོད་ན། ། སོང་འགོ་མྱི་ཆེན་གྱིས། ། དགས་ཀྱི་བསེན་མཁར་ལ། ། མདུང་མོ་ཐབས་གཆིག་གིས། ། འབྲོག་མོ་ཐང་གང་ཐོབ། པྱོགས་རྔེག་སུམ་བརྩན་སྐྱ་བོ་རེང་(176)གིས། དཔའ་བའི་པུལ་པྱིན་ན་(177)།། ཉིན་ཆིག་ལ་དགས་པོ་མྱི་བརྒྱའ་བསད་ཆེས་འུང་སྐད་དོ(178)།། འུང་གི་རྗེས་ལ། ། མྱང་སྨོན་ཏོ་རེ་གློ་བ་ཉེ་བའི་བུ། ། ཞམ་སྣང་བཙན་པོ་འི་ཞ་འབྲིང་སྣང་མ་པ་(179)འཚལ་ཞིང་མཆིས་སོ། །འུང་གི་རྗེས་ལ།ཞ བཙན་པོ་རྗེས་འབངས་དགྱེས་སྐྱེམས་སྟོན་མོ་གསོལ་ལོ།། འུང་གི་ཚེ་ཁྱིམ་པོ་སྤུང་སད་ཀྱི་གླུ་བླངས་པའི་ཚིག་ལ།
མོན་ཀ་འི་ནི་སྟག་ཆིག་པ།
སྟག་བཀུམ་ནི་ཟུ་ཙེས་བཀུམ།
གུང་བཀྲོས་(180)ནི་པྱག་དུ་པུལ་(181)།
སླ་ལྭོ(182)ནི་ལྷེ་(ལྷོ)རྔེགས་(183)སྩལད།
རྩང་བྲང་ནི་ཡ་སྟོད་ཀྱི།
ཐང་པྲོམ(184)ནི་རྒོད་ལྡིང་བའ།།
རྒོད་བཀུམ་ནི་ཟུ་ཙེས་བཀུམ།།
རྒོད་གཤོག་ནི་པྱག་དུ་པུལ།།
གསབ་གསོབ་(185)ནི་ལྷོ་རྔེགས་སྩལད།།
ན་ནིང་ནི་གྱེ་ནིང་སྔ།།
ཏི་སེ་ནི་གངས་དྲུང་ནས།།
ཤ་དང་ནི་རྐྱང་བྱེར་བའ(186)།།
ཤམ་པོ་ནི་སྩ་ལ་བྱེར།།
དེ་རིང་ནི་སང་ལྟ་ན།།
ཤམ་པོ་ནི་གཉན་གྱི་རྩ།།
ཤ་རྐྱང་ནི་ཚས་མ་ཉན།།
ཤ་རྐྱང་ནི་ཚས་ངན་(187)ན།།
ཏི་སེ་ནི་གངས་ཀྱིས་བྲུན(188)།།
ན་ནིང་ནི་གཞེ་ནིང་སྔོན།།
མ་པང་ནི་མཚོ་འགྲམ་ནས།།
ངང་དང་ནི་དུར་བྱེར་བ།།
དང་ཀོ་ནི་མཚོ་ལ་བྱེར།།
དེ་རིང་ནི་སང་ལྟ་ན།།
དང་ཀོ་(189)ནི་ལྷའི་མཚོའ།།
ང(ང)དུར་ནི་ཚས་མ་ངན།།
ང(ང) དུར་ནི་ཚས་ངན་ན།།
མ་པང་ནི་མཚོ་འིས་བྲིན།།
ལྷོ་རྔེགས་ནི་འཕན་གྱི་སྣོན།།
སེ་ཁྱུང་ནི་འཕན་(190)གྱིས་བཏབ།།
སྔ་ན་ནི་འཕན་བ་ལ།།
ད་ཙམ་ནི་སྤྱན་ཡང་ཡས་(191)།།
དབུ་པྱིང་(192)ནི་གྲོ་བོ་(གྲེ་བོ)(193)ལ།
ཐ་མ་(194)ནི་གཡགིས་(195)བསྐྲོད།།
ཟུ་ཙེ་ནི་སྩལ་ལགས་གྲང་(196)།།
ཀླུ་དེ་ཞེས་བླངསོ།། འུང་ནས་བཙན་པོའི་ཐུགས་ལ་དགོངས་པ། ། བློན་པོ་ལྷོ་རྔེགས་གཆིག་གིས་ལན་བླན་བར་ཐུགས་རེ་བ་ལས། སུས་ཀྱང་མ་བླན་ཏོ།། འུང་ནས་ཞང་སྣང་པེའུ་ཟུང་འབྲིང་པོ་བཆས་པ་ཙམ་ཞིག སྣང་མ་ལྟོམ་ཞིང་མཆིས་པ་ལ། ཁྱོད་ཕ་སྙིན(སྙིང་)ཉེ་བའི་བུ་ན། ། ཀླུ་ཤེས་སམ་ཞེས་རྨས་པ་དང་། ཞང་སྣང་གིས་མཆིད་འཚལ་ཞེས་གསོལ་ཏོ།། ཞང་སྣང་གིས་ཀླུ་བླངས་པ།།
ཀྱེ་ན་ནིང་ནི་གཞེ་ནིང་སྔ།།
ཆབ་ཆབ་ནི་ཕ་རོལ་ན།།
ཡར་ཆབ་ནི་ཕ་རོལ་ན།།
དགུ་གྲི་(197)ནི་ཟིང་པོ་རྗེ།།
ཉ་ལས་ནི་ཁམ་དུ་དཀོང་(198)(199)།
ཁམ་ལས་ནི་རྨེག་དུ་བཏའ(200)།།
སྐྱི་ནས་ནི་ཉ་འདོན་པ།
དབྱི་ཚབ་ནི་པངས་ཏོ་རེ།།
ཀླུམ་ན་ནི་ཚབ་(ཆབ)གཚོད་(201)པ།།
ཙེང་སྐུ་ནི་སྨོན་ཏོ་རེ།།
ཁུར་ར་ནི་རགས་ཐོགས་ཤིང་།།
དོག་གི་ནི་ས་སྐྱེད་པ།།
པང་སུམ་ནི་འདྲོན་པོ་ཞིག །
ཐང་ལ་ནི་རྩེ་བཆད་(202)ཆིང་།།
ཤམ་པོ་ནི་རྨེད་དུའ་བསྣན།།
ཡུ་སྣ་འི་ནི་མཁར་པབ་ཆིང་།།
པྱིང་བའི་ནི་སྣོན་དུ་བགྱིས།།
སྔ་(ན)ནི་མཐོ་བ་ལ།།
ད་ཙམ་ནི་དགུང་ལ་རེག
ངས་པོ་ནི་སྒང་དྲས་(203)ཤིང་།།
ཡར་མོ་ནི་ཁོལ་དུ་སྩལ།།
སྔ་ན་ནི་ཆེ་བ་ལ།།
ད་ཙམ་ནི་མཐའ་ཡང་ཡས།།
ལྷོ་རྔེགས་ནི་འཕན་གྱི་སྣོན།།
ལྡོང་ཏོང་ནི་འཕན་གྱིས་བཏབ།།
སྔ་ན་ནི་འཕན་པ་ལ།།
ད་ཙམ་ནི་འཔྱན་ཡང་ཡས་(204)།
ན་ནིང་ནི་གཞེ་ནིང་སྔ།།
ཕོ་མའི་ནི་འབྲོང་བཀུམ་པ།།
ལྷོ་ཤིང་ནི་སྨྱུག་མོ་རྒྱལ།།
ལྕགས་ཀྱིས་ནི་མ་དྲལ་ན(205)།།
སྨྱུག་གིས་ནི་རེ(206)མྱི་པུགས།།
རྒོད་ཀྱིས་ནི་མ་བསྒྲོན་ན།།
འབྲོང་ལ་ནི་རེ་མྱི་འི་འཛེན་(207)།།
ངས་པོ་ནི་ར་ཡུལ་གྱི།
ཀོམ་རྩེ་ནི་གཟིག་མོ་རྒྱལ།།
ཁབ་ཀྱིས་ནི་མ་པུག(208)ན།
རྒྱུས་ཀྱིས་ནི་རེ་མྱི་སྤུགས་(209)།
རྒྱུས་ཀྱིས་ནི་མ་དྲངས་ན།
ཀོམ་ཙེ་(210)ཉི(ནི)ཉིད་མྱི་འཇོ་(211)།།
ཞེས་གླུ་བླངས་ནས། ཚིག་དེས། བཙན་པོ་ཐུགས་བཉེ་སྟེ། མྱང་ཞང་སྣང་བློན་པོར་བཅུག་ནས། བློན་པོའི་མཚན་མར་ཡང་རྡུལ་(རྔུལ་)གྱི་པུག་བུ་ཆུང་(212)སྩལ་ཏོ།།
ལེའུ་ལྔ་པ།
འུང་གི་རྗེས་ལའ།། དབའས་ཕང་ཏོ་རེ་དབྱི་ཚབ་རྒས་ཏེ། ཉི་མ་འདེ་ཞིང་མཆིས།། བཙན་པོ་ཁྲི་སྲོང་བརྩན་ཉེན་ཀར་ནས། སྐྱི་ལུང་དུ་གཤེགས་ཀར། ཕངས་ཏོ་རེ་དབྱི་ཚབ་གྱིས།། བྲིན་སྙ་དོ་རེ་གཙུག་བློན་ལས་གསོལ་ཏེ། །གནའ་ཟིང་པོ་རྗེ་རྒྱབ་དུ་བོར། ། སྤུ་རྒྱལ་ཕང་དུ་ལེན་ལེན།། ཆབ་སྲིད་ཆུར་(213)ནི་བསྲིངས། ཞེང་དུ་ནི་བསྐྱེད་བསྐྱེད་ན།། མྱང་གིས་སྲིད་མ་ཐུབ་སྟེ།། བཀྱོན་ཕབ་ནས། ། བདག་ཆག་སྤད་མཚན་(214)། བླར་གློ་བ་མ་རིངས། ། མཐང་མ་གྲང་ཞིང་མཆིས་ན།། ད་རོ་ལས་བལྟས་ན་ནི་ཉམ་ཆུང་།། རྨ་ལས་བལྟས་ན་ཕོག་སྙ(215)ཆེ་ཞིང་མཆིས་ན།། བདག་རྒན་པོ་ཙམ་ཞིག་མ་གུམ་པར། ། དབུ་སྙུང་ཁུད་པ་ཙམ་གསོལ།། བདགི་བུ་ཚ་བྲོ་ཁུད་པར་སྩལ་པར་ཇི་གནང་།། བཙན་པོ་ཡབ་ནི་བདགི་མཆིས་བྲང་དུ་གདན་བཏིང་ཡང་གནང་ན། ། ད་ཤུལ་ཡོགས་སུ་(216)ལ་མོ་ཆག་པ་པྲུམ་(217)དུ་ཕྱག་ཐབ་ཙམ་ཞིག་གསོལ（218）དུ་ཇི་གནང་ཞེས་གསོལ་ནས། དེ་ཙམ་ན་མྱང་དང་ཅོག་རོ་སྟོད་རིམས་ལ་བཀྱོན་དབབ་པར་བགྱིས་སྟེ།། ཁྲ་ཁྲུག（219）……རྗེས་ལ་བབ་ནས།། གསོལ་དགུང་ཡང་གནང་སྟེ།། བཙན་པོ་ཞ་སྔ་ནས།། བཀའ་སྩལད་པའ།། མྱི་དྲིན་……མྱི་ནི་སྙིང་མྱི་གཆད།། རྟ་ལྟེ་འུ་རྟ་ནི་སྒལ་མྱི་དབྱུང་།། སྔ་ན་ངའི་ཡབ་ཀྱི་རིང་ལ།། འབྲིང་ཐོ་རེ་སྦུང་བརྩན་དང་།། ཕངས་ཏོ་རེ་དབྱི་ཚབ་དང་ཁྱེད་གཉིས།། ཆབ་ཕ་རོལ་ཚུ་རོལ་གྱི།། གུང་བློན་འཚོལ་ཆིག་པར་དགོད་དགོད་（དགོང་དགོང་）པ་ལས། འབྲིང་ཏོ་རེ་སྦུང་བསྩན་ནི་ཤི།། ཁྱོད་ནི་རྒས་སྟེ་ཉི་མ་འདེར་གནང་སྟེ་བཞག མྱང་ཞང་སྣང་བློན་ཆེར་བསྐོས་ཏེ་བཞག་ན།། ཡབ་ནོངས་ནས། མྱང་གིས་ཀྱང་གློ་བ་རིངས་སྟེ། བཀྱོན་ཕབ་པའ་ཡིན་ནོ།། ད་ཁྱེད་དབའས་ཕ་ཆིག་ནི།། གདོའ་ཐག་གཉིས་སུ།། གློ་བ་མ་རིངས་པོས།། ལ་མོ་ཆག་པ་པྲུམ་དུ་པྱག་ཐབ་ཀྱང་གསོལ་ཆིག། དབུ་སྙུང་ཡང་གནང་ངོ་ཞེས་བཀའ་སྩལ་ཏོ།། ལ་མོ་ཆག་པ་པྲུམ་དུ། རྩང་（220）ཕྱེད་པུབ་སྟེ། པྱག་ཐབ་གསོལ་ཏོ།། སྐུ་རྟེན་དུ་ཁྲབ་བསེའ་སྣ་བཅུ་དང་། ལྡོང་པྲོམ་（221）གྱི་རལ་གྱི་མདོར་ཅོད（222）གཉིས་གསོལ་ཏོ།། བཙན་པོས་དབུ་སྙུང་ཡང་གནང་ངོ་།། དབའས་དབྱི་ཚབ་སྤུན་མཚན་བདུན་ཡང་བྲོ་སྩལ་ཏོ།། བཙན་པོས་བཀའ་སྩལད་པ།། དབྱི་ཚབ་གློ་བ་ཉེ་བས།། གུམ་ན་མཆད་（223）ཕྱག་དར་（224）པོ་བརྩིག་པར་གནང་རྟ་ནི་བརྒྱའ་དགུམ་བར་གནང་།། བུ་ཚ་གང་རུང་བ་གཆིག གསེར་གྱི་ཡི་གེ་མྱི་ཆད་པར་སྩལད་པར་བཀའ་སྩལ་ཏོ།། བཙན་པོ་ཞ་སྔ་ནས།། མགུར་བླངས་པའ།།
ཡར་མོ་（225）ནི་ཆུ་ཐུངས་ཀྱིས།།
མདོ་ནས་ནི་རྩང་བུ་བསྲིང་།།
ཡར་མོ་ནི་ཞེང་ཆུངས་ཀྱིས།།
ལྷོ་ནས་ནི་བྱང་དུ་བསྐྱེད།།
འཐམ་འཐམ་（226）ནི་འདུ་འདུ་ན།
ངག་རྗེས་（227）ནི་མྱིས་མྱི་བརྗོད།།
འགྲོ་འགྲོ་ནི་འཆམ་འཆམ་ན།།
ཆགས་ལྷམ་ནི་ཆུས་མྱི་སྣང་།།
ཁྱོད་གྱིས་ནི་ང་མ་གཏང་（228）
ང་འིས་ནི་ཁྱོད་མྱི་གཏང་།།
ང་འིས་ནི་ཁྱོད་མྱི་གཏང་།།
ད་འིས་ནི་ཁྱོད་གཏང་ན།།
དགུང་མཐའ་ནི་སྲུང་དུ་རུང་།།
ཁྱོད་ཀྱིས་ནི་ང་གཏང་ན།།
ངས་པོ་（229）ནི་རྨད་དུ་རུང་།།
ཞེས་བཀའ་སྩལ་ཏོ།། དེ་ནས་དབའས་དབྱི་ཚབ་ཀྱིས་མཆིད་བླངས་པ།།
བཚན་དུ་ནི་བདག་འཚལ་ན།།
ཆུང་ན་ནི་རྗེ་ཁུར་ཆིག །
པྱག་དུ་ནི་བདག་འཚལ་ན།།
ལྷ་རི་ནི་གཡང་སྐྱོང་（230）ཤིག
རྗེ་འིས་ནི་བཀའ་སྩལ་ན།།
གཞའ་མ་（231）ནི་ཡུད་ཀྱི་སྲིད།།
བྱ་འིས་ནི་ཞུ་པུབ（232）ན།།
ལ་པྱི་ནི་གདངས་（233）སུ་དྲོ（234）།།
ཞེས་མཆིད་བླངས་ནས།། སླད་མཚན་བདུན་གྱིས་གཏང་རག（235）ཆེད་པོ་བཏང་ངོ་། ། དབུ་སྙཡང་གནང་བའི་གོར་མ་པྱག་དུ་བོན་པ་ནི།། རྒྱལ་འབྲིང་ལན་ཏོན་གྱིས་བླང་སྟེ་པྱག་དུ་གསོལ་ནས།། གོར་མ་དཀར་པོ་དངོས་ནི།། དབྱི་ཚབ་ཀྱི་མཆད་པའི་རྨང་དུ་བརྩིགས་སོ།། ཞང་ལོན་ཞ་བྲིང་དུ་བྲོ་འདོར་འདོར་བ། ཁུ་ཁྲི་དོ་རེ་སྨྱང་ཞུང་དང་། གནུབས་སྙ་དོ་རེ་གཙུག་བློན་དང་། རྔེགས་རྒྱལ་འབྲིང་ལན་ཏོན་དང་། ཚེས་པོང་ཁྲི་བཙན་ཁོང་སྟོ་དང་། འོ་མ་ལྡེ་ཁྱི་བཟང་ལོད་བཙན་དང་། ཁུ་སྨོན་ཏོ་རེ་ཕངས་ཚབ་དང་། རྗེ་བློན་བདུན་གྱིས་དེ་ལྟར་དབུ་སྙུང་གནང་ངོ་།། དབུ་སྙུང་གནང་པའི་ཚིག་ནི། ད་པྱིན་ཆད་ཁྱེད་སྤད་མཚན་གྱིས།། བཙན་པོ་སྤུ་རྒྱལ་གྱི་ཞ་སྔར། གློ་བ་མ་རིངས་མཐའང་མ་གྲང་ན།། ནམ་ནམ་ནམ་ནམ། ཞ་ཞ་ཞ་ཞར（236）ཡང་། དབྱི་ཚབ་གྱི་བུ་ལ་མ་ཉེས་པར་བཀྱོན་དབབ་རེ་（237）། འཕྲའ་མ་（238）མྱི་ནག་གསན་རེ།། འཕྲའ་མ་ཞིག་གསན་ན་ཡང་། ཤགས་བྱ་སྟེ་ཡུས་བཀྲོལ（239）ནས།། བཀའས་མྱི་གཆད་རེ།། དབྱི་ཚབ་ཀྱི་བུ་ཚ་ལ་ལ་ཞིག་གིས།། མ་བསམས་སྟེ་སྙིང་རིངས་ན་ཡང་།། གང་སྙིང་རངས་པ་ཉི་ཙེ（240）འི་སྒོར་མྱི་བཀྱོན་རེ།། གཞན་བྲོ་ལ་མ་གཐོགས་པ་རྣམས་ལ། བཀྱོན་རེ།། ཕག་དང་མཚུངས་མཚོན་གྱིས་མྱི་དགར་རེ།། བྱ་དང་མཚུངས་ཁྱུས་བདའ་རེ།། མ་ཉེས་པ་ཞིག་གིས་རྔོ་ཐོག་ན།། བསྐྱུང་རེ་སྨད་རེ།། དབྱི་ཚབ་ཀྱི་བུ་གཆིག་ལ། གསེར་གྱི་ཡི་གེ་ལས་སྨད་རེའ། ཁོལ་ཡུལ་ཡང་མ་ཉེས་པར་དཔྲོག་རེ།། སྙིང་མ་རིངས་པར་རབས་ཆད་ན། ཁོལ་ཡུལ་བཞེས་རེའ།། ཁྱེད་གློ་བ་རིངས་ན་དབུ་སྙུང་ལ་མ་གཐོགས།། ཁྱེད་ཀྱིས་ཁོལ་ཡུལ་ཞིག་བརྗེས་སམ་པུལ་ན།། དམུ་སྙུང་ལ་མ་གཐོགས།། ནམ་ནམ་ནམ་ནམ། ཞ་ཞ་ཞ་ཞར། སྲས་དཔོན་གྱི་ཞ་སྔར་འདི་བཞིན་དུ་གནང་ངོ་།། དབྱི་ཚབ་སྤད་སྤུན་（241）བྲོ་སྩལད་པའ། བཙན་པོ་སྤུ་རྒྱལ་ཁྲི་སྲོང་བརྩན་ཡབ་སྲས་དང་གདུང་རྒྱུད་ལ། གློ་བ་འདྲིང་རེ། ནམ་ནམ་ཞ་ཞར་ཡང་། དབོན་སྲས་རྒྱལ་པོ་གང་མཛད་པ་ལ། གློ་བ་འདྲིང་རེ། གཞན་མྱི་འོ་ཆོག་ལ་རྗོ་བོ་ལྷག་པ་ཚོལ་རེ།། གཞན་གློ་འདྲིང་བར་སེམས་པ་དང་བློད་（242）རེ།། ཟས་ཀྱི་དོན་བཞག་པ་དང་། དུག་བསྲེ་རེ། བཙན་པོ་ཁྲི་སློན་བཙན་ལ། ངག་སྣ་ཆིག་འཚལ་རེའ།། བདགི་ཕུ་མ་ནུ་དང་། བུ་ཚ་ལ་ལ་ཞིག་གིས།། སྙིང་རིངས་སུ་བྱེད་ན།། སྙིང་རིངས་སོ་ཞེས་ཀྱང་མྱི་འཐོལ་（243）རེའ། པུ་ནུ་སྙིང་རིངས་པའི་གྲོགས་བྱེད་རེ།། བཙན་པོ་ལ་གཞན་ཞིག་སྙིང་རིངས་པར་ཚོར་ན་ཡང་། མྱི་འཐོལ་རེ།། པུར་མྱི་མ་ནོངས་པ་ལ།། འཕྲའ་མ་དང་འཔྲག་དོག་མཆི་རེ།། སྤོན་དུ་བཅུག་ནའ། འབངས་སོ་ཆོག་ལ་སྙིང་སྙོམས་པར་མྱི་འཚལ་རེ།། བཙན་པོས་བཀའ་ཇི་སྩལད་པ་གཟུངས་སུ་མྱི་འཛིན་（244）རེ་ཞེས་བྲོ་སྩལད་ཏོ།། བྲོ་བོར་བ་ནི་དབྱི་ཚབ་དངོས་དང་། བུ་བ་སེ་དོ་རེ་ཉ་སྟོ། སྣང་ཏོ་རེ་སུམ་སྣང་། ཁྲི་སུམ་རྗེ་ཆུང་། མང་རྗེ་བཙན་ཟུང་།། ཚ་བོ་སྟག་ཁོ་རྗེ་མྱེས་སྣང་། མང་པོ་རྗེ་པུ་ཚབ་དང་བདུན་གྱིས་བྲོ་བོར་རོའ།།
ལེའུ་དྲུག་པ།
།་། བཙན་པོ་སྲོང་བཙན་སྒམ་པོའི་རིང་ལ། ཡབ་འབངས་ནྀའཁུས། ཡུམ་འབངས་ནྀ་ལོག གཉེན་ཞང་ཞུང་།མཛོ་སུམ་པ།། ཉག་ཉྀ། དགས་པོ།། རྐོང་པོ།། མྱང་པོ་ཀུན་ཀྱང་ལོག།། ཡབ་གནམ་རྀ་སློན་མཚན་དུག་བོན་ཏེ་བཀྲོངས་སོ།། སྲས་སྲོང་བརྩན་སྐུ་གཞོན་མ་ཕན་ཏེ།། གཟོད་མ་དཀུའ་བ་（245）དང་། དུག་པ་རྣམས་རབས་བཆད་དོ།། དེ་འི་རྗེས་ལ། དེ་འྀ་མྱི་ལོག་ཀུན་འབངསུ་སླར་བཀུག་གོའ། འུང་གྀ་འོག་དུ་མྱང་མང་པོ་རྗེ་ཞང་སྣང་གྀས། སུམ་པ་མཐའ་དག་དམགིས་གདབ་མྱི་དགོས་པར། ལུག་རྟུག་（246）གིས་སྒྱུ་ཕབ་སྟེ། ལྕེའྀ་ཐོར་ཐོ་ལ་བརྗོད་ནས། ཁྱྀམ་གྲངས་མ་ཤོར་པར་ཡོངས་ཀྱིས་འབངས་རྣལ་མར་（247）བཀུག་གོ།། འུང་གྀ་འོག་དུ་བཙན་པོ་ཞབས་ཀྱིས་བཙུགས་སྟེ། བཟང་（བྱང་）ལམ་དུ་མ་བྱུང་མ་དྲངས་པར། རྒྱ་དང་འ་ཞས་དཔྱའ་གཙལ་（གཅལ）ལོ།། ཐོག་མ་འ་ཞ་དེ་ནས་འབངས་སུ་མངའ་འོ།། འུང་གྀ་འོག་དུ་བཙན་པོ་སྲོང་བརྩན་དང་། མང་པོ་རྗེ་ཞང་སྣང་རྗེས་འབངས་ཀྱི་བར་དུ། ཁྱུང་པོ་སྤུང་སད་ཀྱིས་འཕྲའ་མ་བཅུག་སྟེ། བཙན་པོ་ཞ་སྔར། ཞང་སྣང་གློ་བ་མྱི་འདྲྀང་དུ་ནི་འདྲིང་ཞེས་གསལ་（གསོལ）ཏོ།། ཞང་སྣང་ལ་བཙན་པོ་མྱི་བཀྱོན་དུ་བཀྱོན་ཞེས་བྱས་སོ།། འུང་ནས། ཞང་སྣང་གྀ་གློ་བ་ལ།། ཁྱུང་པོ་སྤུང་སད་བདག་དང་ཤག་རག་པོ་（248）སྟེ། སྤུང་སད་ཟེར་བ་བདེན་སྙམ་ནས། བཙན་པོ་འི་བཀའ་བྱུང་ན་ཡང་། ན་（མ）ཞེས་བྱ་སྟེ། མཁར་སྤུར་བ་ཡང་བསྡིགས་སོ།། འུང་ནས་ཞང་སྣང་གི་བྲན། པ་ཚབ་གྱིམ་ཕོ་འཁུ་（249）སྟེ། ཞང་སྣང་བརླག་གོ།། མཁར་སྡུར（སྤུར）བ་ཡང་བཤིག་གོ།། འུང་གི་འི་འོག་དུ།། ཁྱུང་པོ་སྤུང་སད་ཟུ་ཙེས།། མྱང་ཞང་སྣང་བཙན་པོ་ལ་གློ་བ་རིངས་པ། ཟུ་ཙེ་ས་དཀུའ་བེལ་ཏེ། ཞང་སྣང་བཀུམ་སྟེ།། ཟུ་ཙེ་གློ་བ་ཉེ་འོ།། བཙན་པོའི་བློན་པོའི་ནང་ན།། ཁྱུང་པོ་སྤུང་སད་ཟུ་ཙེ་ལས་གློ་བ་ཉེ་བ་སྔོན་ཆད་མ་བྱུང་ངོ་།། ཟུ་ཙེ་འཛངས་ཤེ་ན་འཛངས།། དཔའ་ཞེ་ན་དཔའ་འོ།། ཆུ་གང་ཆེ་ཞེ་ན་ཆེ།། ཡང་བ་རིང་（250）ཞེ་ན་རིངོ་། མྱི་ཆིག་ལ་ཚོགས་དགུའ་ཚོགས་ན།། སྤུང་སད་ཟུ་ཙེའོ།། འུང་གི་འོག་དུ། བཙན་པོ་འདིའི་རིང་ལ་ལྟ་ཞིག ། རྒས་ཏེ་ཉི་མ་འདེར་གནང་ངོ་།། བཙན་པོ་ཞ་སྔར་ཁྱུང་པོ་སྤུང་སད་ཀྱིས་གསོལ་པའ། ། སྔོན་བཙན་པོའི་ཡབ་གནམ་རིའི་རིང་ལ།། བདགིས་རྩང་བོད་འབངས་སུ་བཀུག་པ་ལྟ་ཞིག ཡབ་ཀྱིས་སྤྱན་གྱིས་མ་གཟིགས། ཞབས་ཀྱིས་མ་བཆགས་ན།། བཙན་པོ་སྲས་ཀྱིས་སྤྱན་གྱིས་གཟིགས།། ཞབས་ཀྱིས་བཆག་སྟེ།། བདགི་སྡུམ་པ་（251）ཁྲི་བོམ་སུ། །དགྱེས་སྐྱེབས་སྟོན་མོ་གསོལ་དུ་ཇི་གནང་ཞེས་གསལ་(གསོལ)ནས།། བཙན་པོས་སྤུང་སད་གསོལ་བ་བཞིན་གནང་སྟེ།། མགར་ཡུལ་ཟུང་ཕོ་བྲངས་འདྲིང་བཀའ་སྩལ་ནས།། ཡུལ་ཟུང་ཁྲི་་བོམས་སུ་མཆིས་ཏེ། བརྟགས་ན།། དཀུ་གང་པུབ་པར་ཡུལ་ཟུང་གིས་ཚོར་ནས།། ཡུལ་ཟུང་སླར་བྲོསྟེ་བཙན་པོའི་སྙན་དུ་གསོལ་ཏེ།། ཡུལ་ཟུང་སླར་བྲོས་པའི་རྗེས་ལ།། ཁྱུང་པོ་སྤུང་སད་ལྕེབསྟེ་གུམ་ནས། མགོ་བཆད་དེ།། བུ་ངག་རེ་ཁྱུང་བསྐུར་ནས།། སྐུར་མཁར་པྱི་བར་མཆིས་སོ།།བཙན་པོའི་སྙན་དུ་ངག་རེ་ཁྱུང་གིས་གསོལ་པའ།། བདགི་ཕ་རྒས་ཀྱི་ལ་གར།། བཙན་པོའི་སྔར་གློ་བ་རིངས་ནས། ཚམས་བསྡལ་（252）བར་ཆད་པའ།། མགར་ཡུལ་ཟུང་ལ་འཐོར་བར་བགྱིས་པ་ལས། ཡུལ་ཟུང་གིས་ཀྱང་ཚོར་ཏེ། ཡུལ་ཟུང་ནི་སླར་མཆིས།། བདགིས་ཕ་བཀུམ་ནས།། མགོ་བཆད་དེ་མཆིས་ན། སྲིད་མྱི་བརླག་པར་ཇི་གནང་ཞེས་གསོལ་ཏོ།། བཙན་པོ་ཁྲི་སྲོང་བརྩན་གྱིས་ཀྱང་།། ངག་རེ་ཁྱུང་གིས་གསོལ་པ་བཞིན་གནང་སྟེ།།སྲིད་མ་བརླགོ།།
ལེའུ་བདུན་པ།
བཙན་པོ་ཁྲི་འདུས་སྲོང་།། སྐུ་ཆུང་ནས་གཞོན་གྱིས་ཀྱང་།། ཕག་རྒད་ལ་བཤན་གྱིས་མཛད། གཡག་རྒོད་སྒོག་དུ་བཅུག སྟགི་རྣ་བ་བཟུང་བ་ལ་སྩོགས་པའ།། ཐུགས་སྒམ་པའི་སྟེང་དུ། སྐུ་རྩལ་ཆེད་པོས་བསྣན་སྟེ། མྱི་དང་མྱི་འདྲའ་བར་འཕགས་པས།། ཉི་ངོག་རྒྱལ་པོ་ཐམས་ཆད་དང་། འབངས་མགོ་ནག་ཕྱོགས་ཀྱི།། མཚན་བླ་དགས་འཕྲུལ་གྱི་རྒྱལ་པོ་ཞེས་བཏགསྟེ། བཀའ་མཆིད་ཀྱི་དཔེར་བརྗོད་དོ།། མགར་ལ་སྩོགས་པ་བློན་པོ་ཁ་ཆིག་གློ་བ་འདྲིང་ན།། ཐུགས་སྒམ་པ་དང་།། དམུ་རྨོག་བརྩན་པོས་གཉེར་ནས།། གློ་བ་རིངས་པ་ཐམས་ཆད་བཀྱོན་ཕབ་སྟེ།། ཕྱག་ན་ཆབ་སྲིད་སྔོན་བས་ཀྱང་མཐོ།། དྲུ་གུ་ལ་སྩོགས་སྟེ་ཉི་ངོག་གཞན་འབངས་སུ་བཀུག་ཅིང་། དཔྱའ་ཕབ་པ་དང་། མཁར་སྲ་བ་ཕབ། ཡུལ་ཕྱུག་པོ་བཅོམ་སྟེ་ཆབ་སྲིད་ལེགས་པ་མང་པོ་ནི་འདིའི་ནང་དུ་མ་གཐོགས།། འུང་གི་འོག་དུ་འཇང་ལ་ཆབ་སྲིད་མཛད་དེ་མྱྭ་དཀར་པོ་དཔྱའ་ཕབ། མྱྭ་ནག་པོ་འབངསུ་བཀུག་པ་ལ་སྩོགསྟེ། རྒྱལ་པོ་འདི་ལས། དམུ་རྨོག་བརྩན་ཞིང་། ཆབ་སྲིད་མཐའ་སྐྱེས་པ་སྔན་ཆད་གདུང་རབས་ཀྱིས་མ་མཛད་དོ།།
རྒྱལ་པོ་ཁྲི་ལྡེ་གཙུག་བརྩན་གྱི་རིང་ལ།། རྗེད་གཤིན་（253）ཆིས་（254）འཇམ་སྟེ། མྱི་ཡོངས་ཀྱིས་སྐྱིད་དོ།། བློན་ཆེ་སྟག་སྒྲ་ཁོང་ལོད་དང་། རྗེ་བློན་མོལ་ནས།། རྒྱལ་པོ་ཞབས་ཀྱིས་བཙུགས་ཏེ།། དེ་ཙམ་ན་རྒྱའི་སྲིད་ཆེས་ནས། བྱང་ཕྱོགས་ཀྱི་དྲུ་གུ་ཀུན་ཀྱང་འདུས་ལ།། ཏ་ཟིག་ལ་ཐུག་པ་མན་ཆད་རྒྱའི་ཁམས་སུ་གཐོགས་སྟེ།། རྒྱའི་ནོར་མང་པོ་སྟོད་ཕྱོགས་སུ་འདོན་པ་རྣམས།། ཀྭ་ཅུ་ན་ཚོགས་བྱས་པ་ལས།། ཐམས་ཆད་བོད་ཀྱིས་ཕབ་སྟེ་བཞེས་པས།། བླར་ཡང་དཀོར་མང་པོ་བརྙེས་（255）།། འབངས་མགོ་ནག་པོས་ཀྱང་། རྒྱ་དར་བཟང་པོ་ཁྱབ་པར་ཐབ་པོ།། ལྷོ་ཕྱོགས་ཀྱི་སྨད་ན་འཇང་དུམ་མྱྭ་དཀར་པོ་ཞེས་བྱ་བའི་རྒྱལ་པོ་སྡེ་མི་ཅུང་བ་ཞིག་འདུག་པ། རྒྱལ་པོ་ཐུགས་སྒམ་པོའི་རླབས་དང་ཐབས་ཀྱིས་བཀའ་སྩལ་ཏེ། མྱྭ་འི་རྒྱལ་པོ་ཀག་ལ་བོང་ཞེས་བྱ་བ། འབངས་སུ་པྱག་འཚལ་ནས། ཐབས་གཅུང་སྩལཏེ། མྱི་མང་གི་སྣོན་བཏག ཡུལ་ཆེའི་ནི་འདབ་བསྐྱེད་དོ།། (འ)ཇང་གི་རྒྱལ་པོ་བོད་ཀྱི་འབངས་སུ་བཞེས་པས། རྒྱའི་ཆབ་སྲིད་ལ་ཡང་ཤིན་དུ་དམའ་ཞིང་། མྱི་བདེ་བར་བྱས་སོའ།། འཇང་མྱྭ་འི་རྒྱལ་པོ་ལྟ་ཞིག་རྒྱ་ལ་ལྟ་ལྟ་བ་ལས།། རྒྱ་རྗེས་དགྲར་བླངསྟེ།། བཙན་པོ་ཁྲི་ལྡེ་གཙུག་བརྩན་གྱི་ཞ་སྔར་བློ་བ་ཉེ་ནས།། རྒྱ་ཡུལ་ཕབ་ཀྱིས་ནི་ཡུལ་དང་།། མཁར་དུ་བཆས་ཏེ་ཕུལ།། གཡུལ་སྤྲད་ཀྱིས་ནི།། རྒྱ་བཙོན་ལུག་（256）ལྟར་བསྐྱངས་སོའ།། འུང་ནས། བཙན་པོ་ཁྲི་ལྡེ་གཙུག་བརྩན་གྱི་ཞ་སྔར།། ཕང་དང་གི་ཁང་མོ་ཆེར།། ཀག་ལ་བོང་གི་བློན་པོ། དྭན་ཅུང་ཀོག་ཕྱག་འཚལ་བའི་ཚེ།། བཙན་པོ་རྗེ་འབངས་ཀྱིས་མགུར་བླངས་པའི་ཚིག་ལ།།
དགུང་སྔོ་ནི་བདུན་རིམ་གྱི།།
ལྷ་ཡུལ་ནི་གུང་དང་ནས།།
ལྷ་སྲས་ནི་མྱི་འི་མགོན།།
མྱི་ཡུལ་ནི་ཐམས་ཆད་དང་།
མྱི་མཚུངས་ནི་མྱི་འདྲའ་སྟེ།།
ཡུལ་མཐོ་ནི་ས་གཙང་བས།།
བོད་ཡུལ་ནི་གཤང་(གཤམ)དུ་གཤེགས།།
མྱི་ཡུལ་ནི་ཀུན་ཀྱི་རྒྱལ།།
ཆོས་བཟང་ནི་གཙུག་ཆེས་བས།།
རྒྱལ་པྲན་ནི་ཀུན་ཀྱང་འདུས།།
ན་ནིང་ནི་གཞེ་ནིང་སྔ།།
ཆབ་ཆབ་ནི་མ་གཞུབ་ནས།།
ལ་བོང་ནི་རྗེ་དང་སྐོལ།།
བློ་ཆེ་ནི་དཀྱེལ་（257）མཁས་ལ།།
རྒལ་མཁས་ནི་ཁོང་དཔའ་བས།།
རྒྱ་རྗེ་ནི་བསམ་ལང་ལ།།
དགྲའ་བཞེར་ནི་གཡུལ་སྤྲད་ཅིང་།།
དགྲ་ཟིན་（258）ནི་གསར་སྤངས་པས།།
སྲིད་ཀྱི་ནི་མགོ་བཟུང་ཞིང་།།
ཕ་སྐྱབས་ནི་སྡུག་བཙལ་པའ།།
ལྷ་སྲས་ནི་བཙན་ལ་ཙལ །།
ལྷ་སྲས་ནི་གཙུག་ཆེ་ལ། །
ཆོས་བཟང་ནི་རྗེད་གཤིན་ཞིང་།།
བཀའ་དྲང་ནི་གསུང་རྟག་ལའ།།
ལ་བོང་ནི་སྲིད་གསོལ་བའ།།
མྱི་སྲིད་ནི་ལྷས་མཛད་ཀྱིས།།
ལ་བོང་ནི་རེ་(རྗེ)དང་སྐོལ།།
དཔའ་འི་ནི་ལས་བྱས་པའ།།
རྒྱ་མཁར་ནི་མཐོའ་བཤིག་ཅིང་།།
རྒྱ་འབངས་ནི་མང་བསྡུས་ནས།།
ཡུལ་དང་ནི་སྡེར་བཆསྡེ།
བོད་ཡུལ་ནི་ཐིལ་དུ་བགྱིས（259）།
ཡར་ཏེ་ནི་གནམ་ཡང་དགྱེས།
མར་ཏེ་ནི་ས་ཡང་དགའ།
ལ་བོང་ནི་རྗེ་དང་སྐོལ།
ཇེ་ཉེ་ནི་ཇེ་ཉེ་འོ།
ལྷ་ཉེ་ནི་གུང་དང་ཉེ།
ཇེ་བརྟན་ནི་ཇེ་བརྟན་ན།
ཤམ་པོ་ནི་གཉན་ལ་བརྟན།
དེ་རིང་ནི་སང་ལྟ་ན།
ཅུང་ཀོག་ནི་དཔོན་དང་གཡོག
གནམ་ས་ནི་ཡིད་སྦྱོར་བ།
ན་བུན་（260）ནི་ལྷ་འི་སྦུབས（261）།
འགེང་(འགྲེང)གང་ནི་ཀུན་ལ་དཔེན།།
སྔ་བསྲུས་ནི་པྱིས་བསྐྱལ་ཞིང་།
ཀླུ་བླངས་ནི་བྲོ་བརྡུངས་པའ།
དགོས་ཀྱིས་ནི་རིམ་གྲོ（262）བགྱིས།།
ལེའུ་བརྒྱད་པ།
བཙན་པོ་ཁྲི་སྲོང་ལྡེ་བརྩན་རིང་ལ། །ཆོས་བཟང་སྲིད་ཆེ་སྟེ། རྒྱལ་ཁོ་ནི་གནམ་ས་གཉིས་ཀྱི་བར་ཡུལ་དུ་བརྣམ་（263）ཞིང་། འགྲེང་དུད་གཉིས་ཀྱི་རྗེ་དང་བདག་མཛད་པའི་གཙུག་ལག་(264)ཆེན་པོ། མྱིའི་དཔེར་རུང་བར་མཛད་དོའ།།ལེགས་ཀྱི་བྱ་དགའ་ནི་རངས་པར་བྱིན། ཉེས་ཀྱི་ཆད་པ་ནི་དམིགས་སུ་ཕོག་པར་མཛད་དོ།།འཛངས་པ་དང་དཔའ་བའི་རི་མོ་བསྐྱེད་དོ།།ངན་པ་མ་རབས་ནི་ཆིས་(ཚིས་)ཀྱིས་གསོས་སོའ། ། དེའི་ཚེ་བློན་པོ་སྲིད་བྱེད་པ་རྣམས་ཀྱང་བློ་མཐུན་གྲོས་གཆིག་སྟེ། ། པྱིའི་དགྲའ་བྱུང་བ་ལ། ཐབས་དང་ཡེ་མྱིག་ཚེར་བྱེད། །ནང་གི་ཆོས་བྱ་བ་ལ་དྲང་ཞིང་འགྲུས་སུ་བྱེད། །འཕྲག་མྱི་དོག །ཉེས་མྱི་བྱེད། །དཔའ་འཛངས་གཉིས་ནི་རླག་(རློག)པ་བཞིན་བཙལ་ཏེ། འཛངས་པས་དཔའ་བོ་ནི་ཆེ་ས་ཆུང་སར་བསྟོད་ན་ས། ས་ས་ཡུལ་ཡུལ་(265)དུ་བཀོད་དོ། །འབངས་འོག་མ་དལ་ཞིང་ཡུལ་ན་འཁོད་པ་ནི། འཛངས་དྲང་གཉིས་སླབ་བོའ། །དམག་མྱི་སོ་ལ་འཁོབ་པ་ནི་དཔའ་བའི་ཐབས་དང་། རྩལ་སློབ་བོ། །བློ་སྒྱུ་གཉིས་ཀྱི་རླབས་ཆེད་པོས་ཐུབ་པས། །སྡང་དགྲའ་སྡོ་བ་ཡང་མྱེད་དོ། །སངས་རྒྱས་ཀྱི་ཆོས་བླ་ན་མེད་པ་བརྙེསྟེ་མཛད་ནས། །དབུ་མཐའ་ཀུན་ཏུ་གཙུག་ལག་ཁང་བརྩིགས་ཏེ། ཆོས་བཙུགས་ནས། ཐམས་ཤད་ཀྱང་སྙིང་རྗེ་ལ་ཞུགས་ཤིང་དྲན་བས་སྐྱེ་ཤི་ལས་བསྒྲལ་ཏོ། གཡུང་དྲུང་དུ་བཏོན་ཏོ། །རྗེ་བློན་མོལ་ཏེ། ཞང་མཆིམས་རྒྱལ་ཟིགས་ལ་སྩོགས་པས་རྒྱའི་མཁར་ཀིང་ཤི་ཕམ་སྟེ། རྒྱ་རྗེ་གྭང་བུ་ཧྭང་ཏེ་བསྐོས་སོ། །ལེགས་པ་ཞིན་པའི་བྱ་དགའ་གཡུའི་ཡི་གེ་ཆུ་དུ་(ངུ)ནམ་ནམ་ཞར་ཞར་བྱིན་ནོ། །དབའས་སྐྱེས་བཟང་སྟག་སྣང་གིས། །རྒྱའི་དམག་པོན་ཧོན་ཛེ་སངས་དང་། འགུའ་ལོག་སྒང་དུ་གཡུལ་སྤྲད་ནས། རྒྱ་མང་པོ་བཐུངས་སྟེ། འགུའ་ལོག་རྒྱ་དུར་དུ་བཏགསོའ། །སྦྲང་རྒྱལ་སྒྲ་ལེགས་ཟིགས་ཀྱིས་སྟོད་ཕྱོགས་སུ་དྲང་སྟེ། མི་ཛུངསུ་གཡུལ་བཇློག་(བཟློག་)ནས། ལུང་གི་རྒྱལ་པོ་ནུང་ཀོག་མན་ཆད་འབངས་སུ་བསྡུས། དབའས་བཙན་བཞེར་མདོ་ལོད་ལ་སྩོགས་པས། མཁར་ཚན་ཡན་ཆད་དུ་དྲང་སྟེ། མཁར་ཅུ་བ་བརྒྱད་ཕབ་ནས། དོར་པོ་(266)བཏོན་ཏེ་འབངས་སུ་བཞེས་སོ། །ཆབ་སྲིད་ཆེ་སྟེ་ལོང་ཤན་ལ་རྒྱུད་(267)ཡན་ཆད། པྱག་དུ་བཞེས་ནས། མཐོང་ཁྱབ་ཁྲི་སྡེ་ལྔ་བཙུགས། བདེ་བློན་ཁམས་ཆེན་པོ་(268)གཆིག་གསར་དུ་བསྐྱེད་དོ། །བློན་ཆེ་མང་བཞེར་ཟླ་བརྩར་འཛངས་ཤིང་མཁས་པ། བཀྲའ་ཤིས་ཤིང་ཁ་དྲོ་བས། ནོར་བུ་རིན་པོ་ཆེའི་ཡི་གེ་(269)སྩལ་ཏོ། །འབངས་ཀྱི་ནང་ན། དོར་ཏེ་པྱུག་ཚམས་སྟེ་འཛོམ་དཔའ་བའི་མཚན་མར། སྟགི་ཐོག་བུ་(270)སྩལ་ཏོ། །བཙན་པོའི་ཞ་སྔ་ནས། ཐུགས་སྒམ་པའི་རླབས་དང་། དབུ་རྨོག་བརྩན་པོའི་བྱིན་ཀྱིས། །ཉི་ངོག་རྒྱལ་པོ་གཞན་དཔྱའ་ཕབ་པ་དང་། རྒྱལ་པྲན་འབངས་སུ་བཀུག་པ་ལ་སྩོགས་པ་པྱིར། ཆབ་སྲིད་མཐའ་བཞིར་བསྐྱེད། ནང་གི་བདེ་བ་ནི་སྙོམས་པར་མཛད་དེ། །བོད་འབངས་ཀྱི་ནང་ནས་ཞོ་ཤ་(271)འབུལ་འབུལ་བ་རྣམས་ཀྱང་། ཡང་དག་པར་གཡུང་དྲུང་གི་བཀའ་དྲིན་མ་བྱིན་བ་མྱེད་དོ། །བཙན་པོ་འདི་ལས་ཆབ་སྲིད་ཆེ་བ། སྔོན་ཆད་གདུང་རབས་ཀྱིས་མཛད་པ་ལ་ནི་མ་བྱུང་ངོ་། །
རྒྱལ་པོ་འདི་འི་རིང་ལ། འབྲོ་ཁྲི་གཟུའ་རམ་ཤགས་ཀྱི། སྟོད་ཕྱོགས་སུ་དྲངསྟེ། ལི་འབངས་སུ་བཀུག་ནས་དཔྱའ་ཕབ་བོ། །འུང་གི་འོག་དུ་མྱྭ་དཀར་པོ་འབངས་སུ་མངའ་བ་ལས། གློ་བ་རིངས་པའི་ཚེ། དམག་པོན་འབྲོ་རམ་ཤགས་བཀའ་སྩལ་ནས། བྱག་རྩེད་ནོལ་ཐབས་བཀྱེ་བའི་ཚེ། །འཇང་མང་པོ་བཀུམ་ནས། སྤྱན་ཆེན་པོ་ཉིང་རིམ་(272)དང་། སྣ་ལ་གཐོགས་པ་(273)དང་། དམངས་ཡན་ཆད་སུམ་བརྒྱའི་རྩ་བཅུ་གཉིས་བཟུང་ནས། འཇང་རྗེ་གོལ་གིས་ཀྱང་པྱག་འཚལ་ཏེ། འབངས་རྣལ་མར་བཀུག་ནས། དཔྱའ་ཕབ་སྟེ་སྔ་མཁོ་བཞིན་དུ་བཀོད་དོ། །
(འདི་མན་གྱི་དུམ་བུ་དེ་སྲོང་བཙན་སྒམ་པོའི་མཛད་པ་ཡིན་ཞིང་། འདིར་བཅུག་ནོར་བ་འདྲ།)
རྒྱལ་འདི་འི་རིང་ལ། །ཞང་ཞུང་ལྡེ་བུ། གཉེན་གྱི་ཡང་ངོ་། །འཐབ་ཀྱི་ཡང་སྐལ་(274)ཏེ། །ཞང་ཞུང་བདག་དུའ། །བཙན་མོ་སད་མར་ཀར། །ལིག་མྱི་རྷྱ་ལ་ཆབ་སྲིད་ལ་གཤེགས་སོ། །སྔ་ན་ཤུད་ཀེ་ཟ་རྩལ་ཐིང་ཤགས་མཆིས་སྟེ། བཙན་མོ་དང་ནི་མྱི་བརྣལ་བར། །ལིག་མྱི་རྷྱལ་ཤུད་ཀེ་ཟ་རྩལ་ཏིང་ཤགས་(275)གནང་སྟེ། བཙན་མོ་ཡང་ལིག་མྱི་རྷྱའི་སོ་ནམ་(276)དང་བུ་སྲིད་(277)མྱི་མཛད་ཆིང་ལོག་ཤིག་ན་བཞུགས་པར། ། འདིར་དྲལ་(278)གྱི་སྙན་དུ་གདའ་སྟེ། །བཙན་མོ་དེ་ལྟར་ལོག་པ་བགྱིས་ན། ། ཆབ་སྲིད་ཀྱི་དཀྲུགས་མར་འགྱུར་བས་དེ་ལྡེ་བུ་མ་བགྱིད་པར། ། ལིག་མྱི་རྷྱའི་སོ་ནམ་དང་བུ་སྲིད་ཟུང་ཤིག་ཆེས། སྤུག་གྱིམ་བརྩན་རྨང་ཆུང་བཀའ་སྩལ་ཏེ། །མཁར་ཁྱུང་ལུང་དུ་མཆིས་ན། །བཙན་མོ་མྱི་བཞུགས་ཏེ། །ཆབ་ཉ་ལ་རོལ་(279)ཞིང་། མཚོ་མ་པང་དུ་གཤེགས་ནས། ། རྨང་ཅུང་མ་པང་དུ་མཆིསྟེ། །བཙན་མོ་ཞ་སྔར་པྱག་བགྱིས་ནའ། ། བཙན་མོ་ཞལ་ནས། ། བཙན་པོ་དྲལ་གྱི་ཞ་སྔ་ནས། ། ཐུགས་བདེ་(280)འམ་མྱི་བདེ་ཞེས་བཀའ་སྩལ་ཏོ། །ཐུགས་བདེ་ཞེས་གསོལ་ཏོ། ། རྨང་ཅུང་གློ་བ་བདེ་འམ་མྱི་བདེ་ཞེས་རྨས་ན། གློ་བ་བདེ་ཞེས་གསོལ་ཏོ། འུང་གི་རྗེས་ལ། །བཙན་པོ་དྲལ་གྱིས་བཀའ་འདི་ཞེས་སྩལ་ཏོ་ཞེས་གསོལ་ཏོ། ། བཙན་མོ་ཞལ་ནས། །རྨང་ཅུང་། བཙན་པོ་དྲལ་གྱི་ཞལ་དང་འདྲའ་སྟེ། ། མགྲོན་ཀྱིས་པྱག་ལ་འཚོལ་ཆིག་ཆེས་པྱག་ལ་སྩལ་ནས། །བཙན་མོས། མགུར་བླངས་པའ།།
ཡུལ་གྱི་(ནི)སྐལ་པོག་པ། །ཁྱུང་ལུང་ནི་རྡུལ་མཁར་ཞིག །མུ་སུ་(281)ནི་གཞན་ན་རེ། །ཕྱི་བལྟས་ནི་ངམ་དང་བྲག །ནང་བལྟས་ནི་གསེར་དང་དབྱིག བདགི་ནི་གཡར་སྔ་རུ། མཆིས་ཆུ་ནི་མ་ཐོ་(282)འམ། །སྐྱ་མོ་ནི་བསེང་བསེང་མོ་(283)། བྲན་གྱི་ནི་སྐལ་པོག་པ། གུ་གེ་ནི་རྐང་པྲན་ཞིག ། འཁོལ་དུ་ནི་མ་ཐོ་འམ། །གུ་གེ་ནི་བདྲིས་ཤིང་སྡང་། །ཟས་ཀྱི་ནི་སྐལ་པོག་པ། ། ཉ་དང་ནི་གྲོ་མཆིས་ཏེ། །འཚལ་དུ་ནི་མ་ཐོ་འམ། ། ཉ་གྲོ་ནི་བཆའ་ཞིང་ཀའ། ། པྱུགས་ཀྱི་ནི་སྐལ་པོག་པ། ཤ་དང་ནི་རྐྱང་མཆིས་སྟེ། ། འཚོ་རུ་ནི་མ་ཐོ་འམ། །ཤ་རྐྱང་ནི་བཙའ་(284)ཞིང་རྒོད། །ཀྱེ་བྱང་འབྲོག་ནི་ཡ་བི་(285)ན། ། ཕོ་མའི་(286)ནི་འབྲོང་གཆིག་པ། །བྱང་འབྲོག་ནི་འབྲོང་དགུམ་ན། །པུ་ནས་ནི་ཁུས་འདེབས་པའ་(287)། །ལྡོང་ཐོང་(288)ནི་འཕན་གྱིས་ཐོབ། །མདའ་ནས་ནི་གཡབ་འདོར་བ(289)། །སྐྱི་འི་ནི་ཤ་དང་སྤུག ། དབུས་ནས་ནི་དཔོར་འཕེན་བ། ། ཡར་ཀྱི་ནི་ལྷོ་དང་རྔེགས། ། པུ་ནས་ནི་ཁུས་བཏབ་ཆིང་། ། མདའ་ནས་ནི་གཡབ་བོར་ནས། ། དེ་འི་ནི་བར་བར་དུ། ། ཕོ་མའི་ནི་(འབྲོང་)བཀུམ་ཞིང་། ། ཐུར་ཐུར་(290)ནི་པྱིང་བའི་བཅུད། །རུ་རྒྱུད་ནི་ལྡོང་ཏོང་སྩལད། །ལྦོ་ཤོག་(291)ནི་ཤ་སྤུག་(292)སྩལད། །མཆིལ་པའི་(293)ནི་རུ་སྲུབས་(294)ལ། །སྟགི་ནི་ཤ་བཏགས་ཤིང་། ། གཡས་སུ་ནི་མ་ཡོ་(295)ཤིག གཡོན་དུ་ནི་མ་རྡལ་(296)ཆིག །གཡས་སུ་ནི་ཡོ་བ་ན། སོ་བྱ་(297)ནི་གྲེ་བོ་ཆུང་། །གཡོན་དུ་ནི་རྡལ་བ་ན། ། སྲམ་བུ་ནི་གོང་ཏེ་དངུལ་(298)། །མར་གྱི་ནི་ཆང་ཆང་(299)ལ། །གཡུར་གྱིས་(300)ནི་མ་མནབས་(301)ན། །སང་པྱི་ནི་གནངས་སླད་ན། སྲམ་གྱིས་ནི་འཚལ་ཏ་རེ། །ཉ་མོ་ནི་མཐོང་རྒོལ(302)ཞིག མཐོང་རྒོལ་ནི་མཐོང་ལ་རྒོལ། །མཆིལ་པའི་ནི་སྣང་(སྣར་)ཐོགས་ཤིག སྣང་(སྣར་)ཐོགས་ནྀ་སྣང་(སྣར་)ལ་ཐོགས། །རིང་གི་ནྀ་གོད་(གོང་)ལེན་(303)དང་། ། ས་འྀ་ནི་ཤེལ་མྱིག་(304)གཉིས། ག་མྱྀ་ནི་གྱྀ་གོ་ལྟ་(305)། །ཇེ་ཉེ་ནྀ་ཇེ་ཉེ་ན། །ཡར་པ་ནྀ་དགུང་དང་ཉེ། །དགུང་སྐར་ནྀ་སུ་ལྀ་ལི་(306)ཇེ་ཉེ་(ནི་)ཇེ་ཉེ་ན། །གླ་སྐར་ནྀ་བྲག་དང་ཉེ། །བྲག་དཀར་ནྀ་སི་ལྀ་ལི། །སྡུར་(སྤུར་)བ་ནྀ་ཆབ་དང་ཉེ། །གྱུར་སྲམ་(307)ནྀ་པྱོ་ལ་ལའ་(308)། །ཉེན་ཀར་ནྀ་དོག་དང་ཉེ། །འབྲས་དྲུག་ནི་སི་ལྀ་ལི། །མལ་ཏྲོ་ནྀ་ཀླུམ་དང་ཉེ། །སྐྱི་བསེར་ནི་སྤུ་རུ་རུ་(309)། །ཇེ་ཉེ་ནི་ཇེ་ཉེ་ན། །ར་ཉེ་(310)ནི་ཤུགས་(པ)ཐུ། །ཡར་གྱི་ནི་བྱེ་མ་ལ། ལྷན་ལྷན་(311)ནྀ་འགྲོས་མོ་འདི། །སྐྱི་འི་ནྀ་པུར་ཐབ་སུ། །ཟ་དུར་(312)ནྀ་བཏབ་ཀྱང་རུང་། ། ཞེས། མགུར་བླངས་པ་འྀ་རྗེས་ལ། རྨང་ཅུང་མཆིད་ཕྱག་(313)བགྱིས་པ་ལས། ། བཙན་པོ་དྲལ་ལ། །བཀའ་ལན་ཡི་གེར་གསོལ་བ་ནྀ་ཆང་མ་མཆིསོ། །བཙན་པོ་དྲལ་གྱི་ཞ་སྔ་ནས་ཐུགས་བདེ་ཞིང་བཞུགས་པ་གློ་བ་དགའ་ཞིང་མཆིས་སོ། །བཙན་པོས་བཀའ་སྩལ་པ་ནྀ། །གུམ་ཆད་(314)གཉིས། རྔོ་ཇྀ་ཐོག་གིས་འཚལ་ཞིང་མཆིས་སོ། །བཙན་པོ་འི་པྱག་དུ་འདྀ་པུལ་ཆིག་ཆེས། ཞུ་གཡས་(315)ཞུ་(316)གཆིག་པྱག་རྒྱས་བཏབ་ནས་བསྐུར་རོ། །གྱིམ་བརྩན་རྨང་ཅུང་སླར། །བཙན་པོ་སྤྱན་སྔར་མཆིས་ནས། །བཙན་མོས་བཀའ་ལན་ཡྀ་གེར་གསོལ་པ་ནྀ་ཆང་མ་མཆིས། །མགུར་བླངས་པའྀ་ཚིག་ནི་འདྀ་ཞེས་མཆི། །པྱག་རྒྱས་བཏབ་སྟེ་སྐུར་བ་འདྀ་ལགས་ཤེས་གསོལ་པ་ལས། །ཞུ་པྱག་རྒྱ་པྱེ་སྟེ། གཟིགས་ན། གཡུ་རྙིང་བཟང་པོ་སུམ་ཅུ་ཙམ་ཞིག་བྱུང་སྟེ། བཙན་པོ་དགོངས་དགོངས་ནས། ཡུ་བུལ་ལིག་མྱྀ་རྷྱ་ལ་རྒོལ་ཕོད་ནྀ་གཡུ་ཐོགས་ཤིག རྒོལ་མ་ཕོད་ན་ནི་བུད་མྱེད་དང་མཚུངས་ཞུ་གྱོན་ཆིག་ཟེར་བ་ལྟ་ཞེས་བཀའ་སྩལ་ནས། །རྗེ་བློན་བློད་བློད་(317)དེ། ། ལྀག་མྱི་རྷྱ་འྀ་སྲིད་བརླག་གོ། །
༇ རྒྱལ་འདྀ་འི་རིང་ལ། །ཞང་ཞུང་གྀ་རྒྱལ་པོ་ལ་དྲངས་སྟེ། ཆབ་སྲིད་མཛད་ནས། །ཞང་ཞུང་གི་རྒྱལ་བོ་ལྀག་མྱི་རྷྱ་སྲིད་བརླག་སྟེ། ཞང་ཞུང་ཐམས་ཅད་འབངས་སུ་བཀུག་གོ འུང་གྀ་རྗེས་ལ། །བཙན་པོ་རྗེས་འབངས་དགྱེས་སྐྱེམས་སྟོན་མོ་(318)གསོལ་ཏེ། བཙན་པོ་ཁྲི་སྲོང་བརྩན་གྱིས་མགུར་བླངས་པ།།
ཀྱེ་རྗེ་འི་ནྀ་མཚན་འདི་(འདྲྀ)། །ཁྲྀ་འི་ནྀ་སྲོང་བརྩན་ཞིག། ། བློན་གྱྀ་ནི་མྱིང་བ་འདྀ། །སྟོང་རྩན་ནི་ཡུལ་ཟུང་ཞྀག། ཆྀབས་ཀྱྀ་ནི་མྱིང་བ་འདྀ། །རྔུལ་བུ་ནྀ་མྱིང་བ་འདྀ། །གཙང་གཙང་ནི་ཡང་ཡང་ལྟ། །ཡུ་བུ་
(319)ནྀ་རྗེ་དང་བློན། །ཡར་མོ་ནི་ཆུ་ཐུངས་ཀྱིས། །མདོ་ནས་ནྀ་རྩང་དུ་བསྲིང་། །ཡར་མོ་ནི་ཞེང་ཆུངས་ ཀྱིས། །ལྷོ་ནས་ནྀ་བྱང་དུ་བསྐྱེད། །མ་ཐུན་(320)ནི་མཐའ་བཞི་རྒྱལ། །ཡུ་བུ་ནི་རྗེ་དང་བློན། །རྗེ་འིས་ནི་འབངས་མ་གཏང་། །རྗེ་འིས་ནི་འབངས་བཏང་ན། །གནམ་མཐའི་ནི་སྲུང་དུ་རུང་། །འབངས་ཀྱིས་ནི་རྗེ་བཏང་ན། །ངས་པོ་ནི་རྨད་དུ་རུང་།
མགུར་དེ་ཞེས་གསུངས་སོ། །མགུར་གྱི་ལན། །བློན་སྟོན་རྩན་གྱིས་གསོལ་བ། །
རྗེ་འིས་ནི་བཀའ་སྩལ་པ། གཞའ་པྱི་ནི་ཡུན་ཀྱི་སྲིང་། བྱ་འིས་ནི་ཞུ་པུབ་པ། །ལ་པྱི་ནི་གདང་སུ་དྲོ། ། གློ་བ་ནི་མང་(མར་)ཀུ་རྒྱ(321)། །ནམས་ཀྱང་ནི་ཡར་མྱི་པོ་(322)། གད་(གར)(323)ཀྱི་ནི་གསེར་པོ་ཆེ། །ནམས་ཀྱང་ནི་པྱིང་བའི་བཅུད། །རྗེ་འིས་ནི་འབངས་མ་གཏང་། །རྗེ་འིས་ནི་འབངས་བཏང་ན། །བྱ་བང་(324)ནི་ཐང་ལ་ཐས། །འབངས་ཀྱིས་ནི་རྗེ་མ་གཏང་། །འབངས་ཀྱིས་ནི་རྗེ་བཏང་ན། །འཇོན་མོ་ནི་ཤིང་ཀ་རེབས(325)། །སང་པྱི་ནི་གནངས་སླད་ན། །ནམ་ནམ་ནི་ཞ་ཞ་རུ། །རི་གང་ནི་ཁུས་བཏབ་ཀྱང་། །བྱ་པུ་ནི་ཁུས་མ་གཏབ། །ལུང་གང་ནི་རྟས་བཆགས(326)ཀྱང་། །གསེར་གད་ནི་རྟས་མ་བཆག། །མོལ་མོལ་ནི་འཆམ་འཆམ་ན། །མཁའ་མཆིད་ནི་མྱིས་མྱི་མཉན། །འཆམ་འཆམ་(327)ནི་འདྲུལ་འདྲུལ་(328)ན། ཆགས་ལམ་(329)ནི་ཆུས་མྱི་སྦང་།
ཀླུ་དེ་ཞེས་བླངས་སོ། །བླ་ན་རྗེ་སྒམ་ན། ཁྲི་སྲོང་བརྩན། འོག་ན་བློན་འཛངས་ན་སྟོང་རྩན་ཡུལ་ཟུང་། རྗེ་ནི་གནམ་རི་པྱྭའི་ལུགས། །བློན་པོ་ནི་སའི་ངམ་ལེན་(330)ན་གྱི་ཚུལ། །མངའ་ཐང་ཆེན་པོའི་རྐྱེན་དུ། ཇི་དང་ཇིར་ལྡན་དེ། །པྱི་འི་ཆབ་སྲིད་པྱོགས་བཞིར་བསྐྱེད། །ནང་གྱི་ཁ་བསོ་ནི་མྱི་ཉམས་པར་ལྷུན་སྟུག་(331)། འབངས་མགོ་ནག་པོ་ཡང་མཐོ་དམན་ནི་སྙམས། དཔྱའ་སྒྱུ་ནི་བསྐྱུངས་(332)། དལ་དུ་ནི་མཆིས། སྟོན་དཔྱིད་ནི་བསྐྱལ། །འཁོར་བར་ནི་སྤྱད། འདོད་པ་ནི་བྱིན། གནོད་པ་ནི་པྱེ། བཙན་པ་ནི་བཅུགས། སྡོ་བ་ནི་སྨད། འཇིགས་པ་ནི་མནན། བདེན་པ་ནི་བསྙེན། འཛངས་པ་ནི་བསྟོད། དཔའ་བོ་ནི་བཀུར། སྨོན་པར་ནི་བཀོལ། ཆོས་བཟང་སྲིད་མཐོ་སྟེ། མྱི་ཡོངས་ཀྱིས་སྐྱིད་དོ། བོད་ལ་སྔ་ན་ཡིགེ་མྱེད་པ་ཡང་། །བཙན་པོ་འདི་འི་ཚེ་བྱུང་ནས། ། བོད་ཀྱི་གཙུག་ལག་བཀའ་གྲིམས་ཆེད་པོ་དང་། བློན་པོ་འི་རིམ་པ་དང་། ཆེ་ཆུང་གཉིས་ཀྱིས་དབང་ཐང་དང་། ལེགས་པ་ཟིན་པའི་བྱ་དགའ་དང་། ཉེ་ཡོ་བའི་ཆད་པ་དང་། ཞིང་འབྲོག་གི་ཐུལ་ཀ་(333)དང་དོར་ཀ་(334)དང་། སླུངས་(335)ཀྱི་གོ་བར་(336)བསྙམས་པ་(337)དང་། བྲེ་པུལ་དང་། སྲོང་(སྲང་)ལ་སྩོགས་པ། བོད་ཀྱི་ཆོས་ཀྱི་གཞུང་བཟང་པོ་ཀུན། །བཙན་པོ་ཁྲི་སྲོང་བརྩན་གྱི་རིང་ལས་བྱུང་ངོ་། །མྱི་ཡོངས་ཀྱིས་བཀའ་དྲིན་དྲན་ཞིང་ཚོར་བས། །སྲོང་བརྩན་སྒམ་པོ་ཞེས་མཚན་གསོལ་ཏོ། །
ལེའུ་དགུ་པ།
མགར་གློ་བ་རིངས་པའི་ཚེ། །བཙན་པོ་འདུས་སྲོང་གིས་མགུར་བླངས་པ། །
ཀྱེ་གནའི་ནི་ཐོག་མ་རུ། གཞེ་འི་ནི་དང་པོ་ལ། དགུང་སྔོན་ནི་མ་འོག་གི །དོག་མོན་ནི་ཡ་སྟེངས་ན། །གཙུག་གཙུགས་(338)ནི་བཙུགས་ལེགསསྟེ། མཐོས་ཏེ་ནི་དགུས་མྱི་རྡིབ། །དོག་མོན་ནི་སྡིང་མྱི་ཉམས(339)། དགུང་ལ་ནི་གཉི་ཤར་བ། །དྲོ་དྲོ་ནི་ས་ལ་དྲོ། །སྒྲོ་བཏགས་ནི་བཏགས་ལེགས་སྟེ། བཙའ་(340)ན་ནི་དཔལ་ཡང་དཔལ། །འཕངས་ན་ནི་ཤ་ཡང་ཁུམས། །ཤ་ཁུམས་ནི་མྱི་ཡང་གསོས། །གྱེ་དེ་རིང་ནི་སང་ལྟ་ན། །དོག་སྲིང་ནི་སྦུར་བུ་འིས། །བྱ་ལྟར་ནི་བཙོས་བཙོས་(341)སྟེ། གནམ་དུ་ནི་འཕུར་འདོད་ཀྱང་། །འཕུར་དུ་ནི་འདབ་མ་མཆིས། །འཕུར་དུ་ནི་འདབ་མཆིས་ཀྱང་། །དགུང་སྔོ་ནི་ཕང་མཐོས་སྟེ། །སྤྲིན་(དཀར་)ནི་གོ་གྱི་འདའས། །ཡ་རུ་ནི་དགུང་མ་སླེབས། །མ་རུ་ནི་དོག་མ་སླེབས། །མ་མཐོ་ནི་མ་དམའ་སྟེ། །ཁྲ་འི་ནི་གཟན་དུ་གྱུརད། །བྱ་པུ་(342)ནི་ལུང་ཆུངས་ན། །འབངས་ཤིག་ནི་རྗེ་རུ་རེ། མགར་མུ་ནི་རྗེ་རུ་རེ། སྦལ་པ་ནི་འཕུར་རུ་རེ། །འབངས་ལས་ནི་རྗེ་རེ་བ། མཐིང་བྲང་ནི་གྱེན་དུ་འགྱུར། །པ་བོང་ནི་རི་ལ་འདྲིལ། །བྱ་མདའི་ནི་སྨྲ་འོར་གྱིས། །གྱེན་དུ་ནི་འདྲིལ་འདྲིལ་ཡང་། །ཤན་(ཤམ)པོ་ནི་རྩེ་མོ་རུ། །པྱིན་སྙམ་ནི་ལེང་མྱི་བགྱིད།།ཤམས་པོ་ནི་གངས་དྲུང་དུ།།སྣང་(343)དང་ནི་ཞུགས་བལྟམ་(344)ཡང་། །ཤམ་པོ་ནི་གངས་མྱི་ཞུ། །ཡར་ཆད(ཆབ་)ནི་སྔོན་པོ་ལ། །ཆུ་བཆད་ནི་ཡུར་དྲངས་ཀྱང་། །ཡར་ཆབ་ནི་གཟུང་མྱི་སྐམས། །བོད་ཀྱི་ན་སྤུ་རྒྱལ་དུ། །སེམས་ཤིང་ནི་རེ་རེ་ཡང་། །སྤུ་རྒྱལ་ནི་གདུང་མྱི་འཆད། །བྱ་པུ་ནི་ལུང་ཆུངས་ནས། །གླང་ཞིག་ནི་རྫི་ལངས་ཀྱང་། །ཕོ་མའི་ནི་སྡིང་པོ་ཆེ་(345)། །རྫི་ལངས་(346)ནི་སྣར་མྱི་མནམ་(347)། །རྫི་ལངས་ནི་སྣར་མནམ་ཡང་། །ཁུས་བཏབ་ནི་སྡིང་མྱི་གཡོའ་(348)། །མོན་ཀའི་ནི་སྟག་ཆིག་པའ། །བྱ་ལྡིངས་ནི་མྱི་མྱི་ལྟ། །བསྲོགས་(349)ཀྱང་ནི་སྤུ་མྱི་ལངས། །ཙེང་ལྡེང་ནི་བྲ་གུ་དང་། །ཡར་ལྷ་ནི་ཤམ་པོ་གཉིས། གང་ཆེ་ནི་གང་ཆུང་བ། །འགྲེང་བརྒྱའ་ནི་ཀུན་ཀྱང་འཚལ། །སྐྱ་ཆུ་ནི་སྔོན་མོ་དང་། ཡར་ཆབ་ནི་ཆུ་བོ་ཆེ། །གར་རིང་ནི་གང་ཐུང་བ། །ཐང་ལྷ་ནི་ཡ་བཞུར་(350)མཁྱེན། །གནུབས་མཚོ་(351)ནི་གླིང་དགུའ་དང་། གྲང་པོ་ནི་མཚོ་ལེ་གོང་། །གང་ཆེ་ནི་གག་ཆུང་བ། །ཤ་མྱེད་ནི་གངས་ཀར་(352)མཁྱེན། །པྱ་མདའི་ནི་ཁང་སྐྱ་དང་། པྱིང་བ་འི་ནི་སྟག་རྩེ་གཉིས། །གང་མཐོ་ནི་གག་དམའ་བ། །ཡར་ལྷ་ནི་ཤམ་པོ་མཁྱེན། །བྱ་པུ་ནི་ལུང་ཆུངས་ན། །མཁར་ཁོལ་ནི་རྨང་བ་(353)དང་། །ཡར་ལུངས་ནི་པྱིང་ལུངས་ན། །ལྷོ་རྔེགས་ནི་འཕན་པ་གཉིས། །གང་འཕན་ནི་གག་རགས་པ། །གཉི་ཟླ་ནི་ཡ་བིས་གཟིགས། །ལྷེ་འུ་རྗེ་ནི་ཟིན་དགས་(354)མཁྱེན། །འགྲེང་བརྒྱའ་ནི་ཀུན་ཀྱང་འཚལ། །ཡར་མོ་(355)ནི་རྫི་ལངས་པས། །བ་བདག་ནི་ངོ་མ་འཚལ། །འབངས་ཀྱིས་ནི་རྗེ་བཀོལ་ཏམ། །རྗེ་འིས་ནི་འབསང་བཀོལ་བའ། །དགུང་སྔོན་ནི་ཡ་བི་མཁྱེན། །མྱི་འིས་ནི་རྟ་བཞིན་ནམ། །རྟ་འིས་ནི་མྱི་བཞོན་བ། །པྱྭ་འི་ནི་གཙུག་མཁན་(356)མཁྱེན། །རྩི་འིས་ནི་ཟོར་གཆད་དམ། །ཟོར་གྱིས་ནི་རྩྭ་གཆད་པ། །དོག་མོན་ནི་མ་བི་(357)མཁྱེན། །ད་ཙམ་ནི་དགུང་མཐའ་ཡང་། །གཉི་ཟླ་ནི་སྤྱན་གྱིས་གཟིགས། །དགུང་སྔོ་ནི་སྙན་གྱིས་གསན། །པྱྭ་འི་ནི་གཙུག་མྱི་འགྱུར། །མདའི་ནི་སྒྲོ་མྱི་འབོག །བདེན་ནམ་ནི་བརྫུན་པ་འདི། །སང་པྱི་ནི་གནངས་སླད་ན། །འབངས་ཀྱིས་ནི་རྗེ་མྱི་བཀོལ། །རྟ་འིས་ནི་མྱི་མྱི་ཞོན། །རྩི་འིས་ནི་ཟོར་མྱི་གཆད། པྱིང་བའི་ནི་སྟག་རྩེ་ན། སྤུ་རྒྱལ་ནི་གདུང་མྱི་འཆད། །དེ་རིང་ནི་སང་ལྟ་ནའ། །བྱ་པུ་ནི་ལུང་ཆུངས་སུ། འུར་པུ་(358)ནི་ཁྱུ་ཆིག་པོ། འུར་བས་ནི་བསྐྱོད་དྲགས་པས། །མ་མོ་ནི་ཁྲ་འིས་འཚལ། །འུར་པྲུག་ནི་ཐང་ལ་གྲམ། །སང་པྱི་ནི་གནངས་སླད་ན། ནོངས་ཤིང་ནི་མ་འགྱོད་ཆིག གསེར་གྱི་ནི་དོང་རལ་ན། །གཡུ་འི་ནི་མདའ་ཆིག་མ། །མ་འཕངས་ནི་ཤ་མྱི་ཁུམས། །འཕངས་ན་ནི་རལ་ཡང་སྟོངས། །རེ་ན་ནི་གཐང་དུ་ན། །རེ་དཀུའ་ནི་མཚུལ་(359)དུ་དཀུའ། །བཙན་པོ་ཁྲི་འདུས་སྲོང་། འདམ་གྱི་ཅོག་རོ་ཟ་དང་། འབྲེ་མཛད་པའི་ཚེ། །ཁེ་རྒད་རྒྱལ་ཏོ་རེ་མདོ་སྨང་གིས་མཆིད་བླངས་པ།
རུ་ཐུང་(360)ནི་བསར་ང་བ། ཀོང་ཁྱིམ་(361)ནི་སྤྱན་བུ་ཅུང་། །རིས་བཀྲའ་(362)ནི་བསར་ང་བ། །མོན་ཀའི་(ནི་)སྟག་ཆིག་པ། བཙན་ཏེ་ནི་མྱི་མཁས་པ། རྒྱ་དྲུག་(363)ནི་དགུང་མཐའི་རྗེ། །མྱོག་(364)སྟེ་ནི་མྱི་མཁས་པ། །ཤུ་མ་ནི་རྒྱལ་མ་གཉིས། །དྲག་སྟེ་ནི་མྱི་མཁས་པ། །མཚོ་གར་ནི་འབྲོང་གི་རུ། །རྣོ་སྟེ་ནི་མྱི་མཁས་པ། །མདོ་ལྕགས་ནི་སྟེའུ་ཀ་ན། །འཛངས་ཤིང་ནི་སྲི་ཞུ་བ། །ཡར་ཀྱི་(ནི་)ལྷོ་རྔེགས་ཟའ། །ངན་ཞིང་ནི་ཕོ་(365)ཆེ་བ། །འདམ་གྱི་ནི་ཅོག་རོ་ཟ། །དྲི་ངན་ནི་ཉ་འི་དྲི། གཡའ་ངན་ནི་ཟངས་ཀྱག་གཡའ། །སྐུ་འི་ནི་རིང་སྟོད་དུ། །གཡང་(366)གི་ནི་ཡུགས་(367)བབ་བམ། །སྐུ་འི་ནི་རིང་སྨད་དུ། །ཚེར་(368)ཀྱི་ནི་ཡུགས་ལྷུང་ངམ། །སྤུན་(སྔུན)ན་ནི་འདྲེན་པ་འདི། །ཁྲི་(ཁྱི་)གདའས་(369)ནི་ཡུལ་བྱིན་དང་། མདོ་གྲགས་(370)ནི་དགུང་དང་ཉེ། །སླད་ནས་ནི་རྟོན་པ་འདི། །རྒྱལ་ཚན་ནི་སྣང་གྲགས་དང་། མུ་ཀེན་ནི་ཀླུ་ཅུ་རྨད། དབུས་ནས་ནི་འཕེན་རྟོན་པ་འདི། །ཆེའམ་ནི་ཆུང་མ་འཚལ། །འདུས་སྲོང་ནི་མང་པོ་རྗེ། །སྐུ་ལ་ནི་འཕྲུལ་ཡང་མངའ། །འོག་ན་ནི་བཆིབས་པ་འདི། །རྒྱལ་མ་ནི་མཐའ་བཞི་འདུལ། །མགྱོགས་སམ་ནི་བུལ་མ་འཚོ། །རྨྱིག་རྗེས་(371)ནི་མྱིལ་མྱི་མཐོང་། །རྗེ་ཆིག་ནི་མང་པོ་རྗེ། གཤེགས་སོ་ནི་ནང་(མང་)པོ་རྗེ། །བཞུགས་ཀྱང་ནི་འོད་མྱིར་རོ། །གཤེགས་ཀྱང་ནི་དང་མ་ཆགས། །ཅོག་རོ་ཟས་མཆིད་བླངས་པའི་ཚིག་ལ། །ཀྱེ་འདམ་གྱི་ནི་ཐང་ཀར་དུ། །ལྷ་གཤེགས་ནི་ཞལ་མ་འཚོལ། །ལྷ་གཤེགས་ནི་ཞལ་འཚོལ་ན། །དུད་དེ་ནི་པྱག་ཀྱང་འཚལ། །པྱག་མདའ་ནི་སླེབས་ཀྱིས་འཛིན། །དེ་འི་ནི་མན་ཆད་ལ། །དུད་དེ་(ནི་)པྱག་འཚལ་དུ། །སོགས་བུ་(372)ནི་ཡུ་བ་ཐུངས། །འགྲེང་སྟེ་ནི་པྱག་འཚལ་དུ། །སྟེན(སྟོན་)ཀྱི་ནི་ཆོས་མ་ལགས། །
ལེའུ་བཅུ་པ།
བོད་ཀྱི་བློན་པོ། མགར་ཁྲི་འབྲིང་བཙན་བྲོད་དང་། །རྒྱ་འི་བློན་པོ་འྭོང་ཀེར་ཞང་ཤེ་གཉིས། །ཁ་དོར་(373)གྱིས་བརྒྱའ་(བརྒལ་)བ་འི་ཚིག །རྒྱ་འི་དམག་བྱིན་ཆེད་པོ། །དམག་པོན་འྭོང་ཀེར་ཞང་ཤེས་བདྲའསྟེ།། དཔུང་གིས་པུལ་ནས། མཚོ་སྔོན་པོ་པྱོགས་ཀྱི་དམག་དཔོན། །མགར་ཁྲི་འབྲིང་བཙན་བྲོད་འཚལ་བ་ལ། ། འྭོང་ཀེར་ཞང་ཤེས་སྤྲིང་བའ། །ཁྲེ་རྐྱལ་གང་དང་། །ཡུངས་འབླུ་(374)(འབལུ་)གང་བསྐུར་ཏེ། །བོད་ཀྱི་དམག །སྟག་འཕྲང་གཡག་འཕྲང་རྡུ་བགྲངས་པ་འི་གྲངས་ཀྱང་ང་ལ་ཡོད་དོ། ། གླད་པ་ལ་ཚད་བླངས་སྟེ། །ཞྭ་ར(རུ)དྲུབས་(375)། རྐང་པ་ལ་ཚད་བླང་སྟེ་ལྷམ་དུ་དྲུབས། བོད་ཀྱི་དམག་ཐུབ་པ་ཙམ་དུ་བརླབས་(བརླེབས)ནས། ། ང་འི་དམག་འདི་སྙད་(376)(སྙེད)ཆིག་ཡོད་དོ། ། མགྲིམ་པྲ་མོར་ཤོང་ན། །ལྟོ་ཆེད་པོར་ཞུགས་ཀྲང་། །གིས་གནམ་པྱགས་ཆེད་པོས་བཏབ་སྟེ། གཆིག་མྱི་དགྱེའོ། །
མགར་ཁྲི་འབྲིང་གིས་ལན་བཏབ་པའ། །མང་ཉུང་གི་ཁར་མྱི་དོང་རོ། །བྱིའུ་མང་མང་ཡང་ཁྲ་ཆིག་གི་ཉོད་པའ་(377)།། ཉེ་འུ་མང་མང་ཡང་སྲམ་ཆིག་གི་ཉོད་པ། །ཤ་བ་ལྭ་མང་སྟེ་འགྱེན་(378)ཏམ། གཡག་རུ་ཐུངེ་སྟེ། འགྱེན་པ་བལྟའོ། །ཐང་ཤིང་ལོ་བརྒྱར་སྐྱེས་པ་ཡང་། །སྟ་རེ་གཆིག་གི་དགྲ་འོ། །ཆུ་གཞའ་གསང་(379)དུ་སོང་བ་ཡང་། ། གྲུ་མདོམ་གང་གིས་སྐ་ཆིག་(380)ཆོད་དོ། །ནས་འབྲས་ཐང་གང་སྐྱེས་པ་ཡང་། རང་ཏག་(381)གཆིག་གི་ནང་དུ་ཆིབ་བོ(382)།། སྐར་མ་གནམ་གང་ཡོད་པ་ཡང་ཉི་མ་གཆིག་གི་འོད་ལ་མྱེད་དོ། །ལུང་པ་གཆིག་གི་མདའ་ནས་མྱེ་〔པ་གཆིག་〕མཆེད་ན། རི་ལུང་གཉིས་ཀྱི་ཤིང་རྩི་(383)ཀུན་ཚིག་པ་ཡང་ཡོད། ། ཆུ་མྱིག་གཆིག་གི་དངོའ་(384)ནས། དབའ་རྒལ་(385)ཞིག་བྱུང་ནའ། །རི་ཐང་གི་ཤིང་རྩི་ཀུན་ཁྱེར་བ་ཡང་སྲིད་དོ། །བོང་པ་ཐང་གང་གི་ནང་དུ།། རྡོ་བ་གཆིག་འདྲིལ་བུ་བཅུག་ན། རྡོ་ཚག་﹙ཆག་﹚གམ། བོང་པ་ཚད་﹙ཆག་﹚པ་ལྟ་འོ། །ཐང་ཆེད་པོ་གཆིག་ལ། རྩྭ་ཁུར་གཆིག་དང་། སྨྲག་﹙སྨྱུག་﹚ཤད་ཀྱི་ལྕག་གཆིག་བཆིན་﹙བཅིང་﹚བཞག་ན། རྩྭ་ཁུར་གཆིག་དང་། རྩྭ་སྔར་འདྲུལ་(386)ལམ། ལྕག་སྡུན་﹙སྔུན﹚དུ་འདྲུལ་བ་བལྟ་འོ། །ཆུ་ཟངས་གང་གི་ནང་ན། །ལན་ཙ་ཀྱོར་གང་(387)བཏབ་ན། ཆུ་བྲོ་འམ། ལན་ཙ་བྲོ་བ་བལྟའོ། །འབྲུག་དང་ཀློག་བརྟེ་བུ་ལྕེ་གྲང་ཉུང་མོད་ཀྱོང་། ། གནམ་མཐའ་བཞིར་གྲགས་ལ་བརྩན་ཞིང་ཆེའོ། །ཁྱོད་ཀྱི་དམག་ནིའ་མཚོ་ག་འི་སྦྲང་བུ་དང་འདྲའ་སྟེ། ནང་﹙མང་﹚ཞིང་འཁོལ་ལ་མྱི་ཕན་ནོ། །རི་ཀ་འི་ན་བུན་དང་མཚུང་སྟེ། མྱི་ལ་མྱི་ལྕི་འོ། །ང་འི་དམག་ནི་རྩྭ་མང་པོ་ལ་ཟོར་བ་གཆིག་གིས་གཆོད་པ་དང་མཚུང་སྟེ་ཆོད་ཀྲང་། ། གཡག་ཆེད་པོ་ལ་མདའ་ཕྲ་མོས་འཕངས་ན་སོད་ཀྲང་། འྭོན་ཀེར་ཞང་ཤེས་ལན་བཏབ་པའ། །སྒོ་ང་ཆུང་ངུ་། རི་ཆེད་པོ་འི་ལྗིད་ཀྱིས་མནན་ན་ཚོགས་ཀྲང་། མྱེ་འབའར་བ། མཚོ་ཆེད་པོའི་རླབས་ཀྱིས་བསད་ན་སད་ཀྲང་། མགར་ཁྲི་འབྲིང་གིས་ལན་བཏབ་པའ། རི་ཆེད་པོའི་སྟེང་ན་བྲག། བྲག་གི་ཁ་ན་ཤིང་། ཤིང་གི་ཁ་ན་ཚང་། ཚང་གི་ཁ་ན་སྒོ་ང་སྟེ། རི་མ་རྙིལ་བར་བྲག་མྱི་འདྲལ། བྲག་མ་རལ་བར་ཤིང་མྱི་འཆགས། ཤིང་མ་ཆག་དང་ཚང་མྱི་ཞིག ཚང་མྱི་ཞིག་བར་སྒོ་ང་མྱི་ཆག་སྟེ། རིས་སྒོ་ང་གཆག་དུ་དེ་ལྟར་མྱི་ཆགས་སོ། །མྱེ་རི་ཀ་ན་འབའར་བ། ཆུ་ལུང་པ་ན་འབབ་པས། གདབ་དུ་མྱི་སླེབས་སྟེ། བོད་ཀྱི་སྤུ་རྒྱལ་ནི་ཉི་མ་དང་འདྲའ། །རྒྱ་རྗེ་ནི་ཟླ་བ་དང་འདྲ་སྟེ། ། རྒྱལ་པོ་ཆེད་པོར་འདྲའ་མོད་ཀྱོང་། གནམ་མཐའ་འོག་དུ་འོད་ཐ་དད་དོ། །ཆེ་ཆུང་གི་ཁར་ཡོང་མྱི་དོར་རོ།། མཚོ་ཆེད་པོའི་ནང་ན་ཆུ་སྲིན་རྒྱལ་བ་འདུག་ན། གནམ་ལས་ཆེ་(ལྕེ་)ཕབ་སྟེ། ཆུ་སྲིན་རྒྱལ་བ་ཆུ་འི་ནང་དུ་བསད་དོ། །འབྲུག་དང་ཀླག་(ཀློག)གཉིས་ཀྱིས་ལྕེ་ཕབ་ན་བྲག་ལས་སྲ་བ་མྱེད་པ་ཡང་དྲལ་ལོ། །བོད་ཀྱི་ལྷ་མཙན་དང་། གནམ་གཉིས་ཀྱིས་བདུད་བ་ཆེད་ན་(388)། འབལ་ལྗི་རྨང་ལས་ཆེ་བ་མྱེད་པ་འི་བུ། ། ས་དགུའ་རིམ་འོག་དུ་སྭས་(སྦས)པ་ཡང་བཟུང་དེ་བསད་དོ། །དེ་ལྟ་སྟེ། ཆེ་ཅུང་དང་མང་ཉུང་གི་ཁར་དེ་ལྟར་མྱི་དོར་རོ། དེ་ནས་རྒྱ་དམག། འྭོང་ཀེར་ཞང་ཤེས་བདའ་སྟེ་བྱུང་བ་ལས། །བོད་ཀྱི་དམག་པོན། བློན་ཁྲི་འབྲིང་གིས། དགྲ་ཐབས་དང་གཡག་ལྟར་བྱས་ནས། །གོ་བར་དུ་གཡུལ་སྤྲད་དེ། རྒྱ་མང་པོ་བཐུངས་ནས། རྒྱ་འི་རོ་གཆིག་གནམ་དུ་གྲེང་བའི་……འབུམ་བསད་པའི་མཚན་མ་ཞེས་བྱ་འོ། །སྟག་ལ་རྒྱ་དུར་དང་རྨ་རྒྱ་དུས་(དུར)ཀྱང་དེ་ནས་བཏགསོ། །རྔ་རབ་ཕན་ཆད། མྱང་དང་……ང་དོར་པོ་ལ་སྩོགས་པ། །རྒྱལ་པོ་དང་བཆས་སུ་འབངསུ་བཀུག་ནས། སོ་བློན་སྡེ་ལྔ་(389)ཡང་བཙུགས་སོ། །……ང་ཀོག་དང་སྩོགས་པའི་སྟོད་པྱོགས་དང་ལྷོ་པྱོགས་ཀྱི་རྒྱལ་པྲན་མང་པོ་ཡང་འབངསུ་བསྡུས་སོའ།། ……མང་པོ་རྗེ་སྟག་ཚབ་རྒྱལ་ཏོ་རེ་རྒྱལ་བྲོས་པའི་ཚེ། པ(སྟག)ཚབ་རྒྱལ་ཏེ་རེས་ཀླུ་བླངས་པའ།
…ན་ལས།།
སྨན་ཤ་(390)ནི་ལ་འདའས་ཀྱང་།།
ཤ་བཀྲའ་(391)ནི་སླད་ལུས།
ནནཏི་……འགྲེས་པུ་ནི་……བཟངས་(བཟུངས་)ནས། མ་སྲིང་ནི་སུག་གིས་བསྐྱལ། ཙོ་རག་(རོག)ནི་ཚེ་དུ་(འབྲངས་)……། རྗེ་འི་ནི་སྐལ་ཕོག་པ། རྒྱ་རྗེ་ནི་བསམ་ལང་ཞིག ། པུར་(བུད)མྱི་ནི་སྐལ་བ་རུ་རྒྱ་……ཆགས།
མགར་མང་པོ་རྗེ་སྟག་རྩན་གྱི་མཆིས་བྲང་(392)། ། ཅོག་རོ་ཁྱོ་དང་ལྷན་ཆིག་རྒྱ་ལ་(བྲོས་པའི་ཚེ)……མཆིང་བླངས་པའ། །
ཉེན་ཀར་ནི་སྟག་རྩེ་ནས། ལྕགས་ཡི་ནི་ཁྱིམ་ཞིག ………………།………རྡུང་བརྡ་བཏང་། མེག་ལེ་ནི་གླང་མར་ནས། གསེར་གྱི་ནི་ཤ་ལ………འདའ་སོ་ནི་ཧབ་ཆེན་གོང་། འདྲིམས་སོ་ནི་སོ་གོ་ཙ། བསྐྱངས་སོ་ནི་……ཡང་དང་སྟེངས་(ན་ནིང་ནི་གཞེས་)ནིང་སྔ། ཇོ་བོ་ནི་བསམ་ལང་་་་་་། བསྟོ་་་་་་་་་ནི་ཏོ་རེ་་་་་་་་་་(མཇལ་དུམ་ནི)ང་སང་ཉན། འབྲོས་བུ་ནི་སྐོས་བྲག་ཏེ། ན་རྩི་ནི་བགོར་ལ་……ལ། སྐྲོལ།།