དྲ་རྒྱ་བཟོ་བཀོད་པ་བསོད་ནམས་འོད་ཟེར།
Sunday 10 April 2011
01:11 | 
Posted by
གངྒའི་ཆུ་རྒྱུན། |
འཇུ་མི་ཕམ་པའི་ས་མཐའི་རྣམ་དབྱེ།
འཇུ་མི་ཕམ་པ་རྣམ་རྒྱལ་རྒྱ་མཚོ།
འཇམ་དཔལ་དབྱངས་དང་དབྱངས་ཅན་ངག་གི་ལྷར། །
བཏུད་ནས་ས་མཐའི་སྦྱོར་ཚུལ་མདོ་ཙམ་བརྗོད། །
ན་ར་ལ་གསུམ་རྗེས་སུ་ད་དྲག་དང་། །
དེ་ལྷག་ད་འ་ས་གསུམ་མ་གཏོགས་པའི། །
ག་ང་བ་མ་བཞི་ཡི་རྗེས་རྣམས་ལ། །
མི་ནོར་ཕྱིར་དུ་ས་མཐའ་འདི་ལྟར་མཛད། །
དུས་ཀྱི་དབང་དུ་འདས་པའི་ཚིག་རྣམས་དང་། །
སྐུལ་ཚིག་རྣམས་ལ་ས་མཐའ་རྟག་ཏུ་ཐོབ། །
དཔེར་ན་གསུངས་སོ་གསུང་ངོ་གསུང་བར་འགྱུར། །
ཟུངས་ཤིག་གཏོགས་ཤིག་ཅེས་སོགས་ཐམས་ཅད་བསྒྲེ། །
བྱ་ཡུལ་བྱེད་པོ་བྱ་བའི་ཚིག་རྣམས་ལ། །
དབྱེ་བ་འབྱེད་བྱེད་ཕྱེ་བ་ཞེས་དང་ནི། །
གདེག་བྱ་འདེག་བྱེད་བཏེག་པ་ལ་སོགས་པ། །
བྱས་པ་རྣམས་ལ་ས་མཐའ་མི་ཐོབ་སྟེ། །
ཕལ་ཆེར་སྔོན་འཇུག་ནུས་པས་འདས་པ་སྒྲུབ། །
དེ་དག་བྱས་པ་ཟེར་ཡང་བྱ་ཚིག་གི །
རང་བཞིན་ཡིན་ཕྱིར་ས་མཐའ་མི་དགོས་སོ། །
བྱས་ཟིན་ཡིན་ན་བགྱིས་དང་བཏེགས་གྱེས་སོ། །
ལ་སོགས་སྦྱར་བ་ཉིད་དུ་ཤེས་པར་བྱ། །
མིང་ལ་དུས་གསུམ་དབྱེ་བས་མ་ཡིན་ཡང་། །
མི་ནོར་སླད་དུ་འདི་ལྟར་ཁྱད་པར་མཛད། །
སྔ་མ་ས་མཐའ་མེད་པའི་ཚུལ་དང་ནི། །
ཕྱི་མ་ཡོད་པའི་ཤན་འབྱེད་འདི་ལྟར་བྱ། །
ཕོ་མོ་འཁྲིག་དང་སྤྲིན་ཕུང་འཁྲིགས། །
གཅན་གཟན་གཟིག་དང་སྤྱན་གྱིས་གཟིགས། །
དོན་བཞིན་རིག་དང་རིགས་བརྒྱུད་སྤེལ། །
རིག་པ་འཛིན་པ་འོས་ཤིང་རིགས། །
རག་གི་སྐུད་པ་རགས་དང་ཕྲ། །
རིམ་གྱིས་འཇུག་དང་རིམས་ནད་བྱང་། །
ཐུག་རེག་མེད་དང་ཐུགས་ལ་མངའ། །
ཐབ་ཀ་བ་དང་ཐབས་ལ་མཁས། །
རྡོ་སོགས་ཆག་དང་སྣོད་བཅུད་ཆགས། །
ཆག་ཆག་གདབ་དང་འདོད་ཆགས་སྐྱེ། །
མཚོན་ཆས་འཁྲུག་དང་གོ་རིམ་འཁྲུགས། །
ལྕག་གིས་བཞུད་དང་ལྕགས་ཆ་མགར། །
རྟོག་དཔྱོད་བགྱིས་དང་དོན་ཀུན་རྟོགས། །
མི་རྟག་འཇིག་དང་འཇིགས་ཤིང་སྐྲག །
རྟག་ཏུ་སྐྱིད་དང་རྟགས་སུ་བཀོད། །
གདུག་པ་ཅན་དང་གདུགས་དཀར་ཅན། །
ཐིག་རྩ་མཁས་དང་ཐིགས་པ་འཛགས། །
སྣ་ཐག་བཏགས་དང་བར་ཐགས་རིང་། །
ཁ་དོག་ནག་པོ་ནགས་ཀྱི་ཚལ། །
དབང་གིས་ཕྱུག་པ་ཕྱུགས་རྣམས་འཚོ། །
དབུག་པར་བྱ་བ་དབུགས་སྣ་རིང་། །
གོ་ཆ་ཚང་དང་ཚངས་པ་ཆེ། །
སྣམ་བུ་ཕྲུག་དང་ལྔ་ཕྲུགས་གྲངས། །
གྲང་བས་ཉེན་དང་གྲངས་སུ་བགྲང་། །
ཕྱག་འཚལ་བ་དང་ཕྱགས་མས་ཕྱགས། །
ལུག་གི་རྫི་དང་ལུགས་ཀྱི་ཆོས། །
ཚིག་སྨྲ་བ་དང་ཚིགས་སུ་བཅད། །
གཡོག་པོ་བྱེད་དང་གོས་ཀྱིས་གཡོགས། །
ལག་བྲིས་བཟང་དང་བདེན་པ་ལགས། །
ཡན་ལག་ཚང་དང་ཞེ་སའི་ལགས། །
ལྷག་པར་གྲང་དང་གྲངས་ལྷགས་ཆེ། །
རྣམ་པར་རྒྱལ་དང་འདི་རྣམས་སུ། །
ཁོང་དུ་ཆུད་དང་ཁོངས་སུ་གཏོགས། །
ཁུང་བུར་འཛུལ་དང་འབྱུང་བའི་ཁུངས། །
རྡོ་བའི་གཟེག་དང་གཟེགས་ཟན་པ། །
ལོག་པར་ལྟ་དང་ལོགས་སུ་དགར། །
གང་ཞིག་འདི་དང་གངས་ཀྱི་རི། །
སྣོད་གང་བ་དང་གངས་ཆེན་མཚོ། །
རྒྱང་རིང་མཐོང་དང་རྒྱ་མཐོངས་ཆེ། །
རེག་བྱ་ཡང་དང་ཁྱོན་ཡངས་པ། །
ཁམ་གྱི་ཟས་དང་འདོད་པའི་ཁམས། །
གསང་གྲོས་བྱེད་དང་སྐད་གསངས་མཐོ། །
གསུང་རབ་ཆོས་དང་ཚེ་རབས་གཏན། །
གོ་སྐབས་དོག་དང་རེ་དོགས་ཆེ། །
རྡོ་ཡི་དྲེག་དང་དྲེགས་ལྡན་པ། །
ཞལ་ཟས་སྟོབ་དང་སྟོབས་བཅུ་པ། །
དགོང་ཀའི་དུས་དང་ཐུགས་ཀྱི་དགོངས། །
འཕག་འཕག་བྱེད་དང་ས་ཐོབ་འཕགས། །
རང་གཞན་གཉིས་ཀ་རངས་པར་གྱུར། །
རེང་བུ་བཞིན་དུ་རེངས་པ་རྣམས། །
རིང་པོར་གནས་ཀྱང་རིངས་པར་ཁུག །
ཞག་རྒྱ་སོང་ནས་འདུ་ལོང་ཞགས། །
ཞག་སྣུམ་འཐུང་ནས་ཞགས་པ་ཐོགས། །
ཐོག་རེག་མེད་ན་ཐོགས་པ་མེད། །
ཐོག་མ་མེད་ནས་ད་བར་ཐོགས། །
ཐོག་སེར་མི་འབྱུང་བསྲུང་བ་ཐོགས། །
ཐོག་ཏུ་འབབ་ན་ཐོགས་རྡུག་མེད། །
ཡོང་ཡེ་མི་མངའ་ཡོངས་སུ་དག །
མེ་ཡིས་ཚིག་དང་ས་ཚིགས་འདིར། །
ལྕགས་སྒྲོག་དང་ནི་སྐད་སྒྲ་སྒྲོགས། །
གཏམ་སྨྲ་བ་དང་བཅུད་ཀྱིས་གཏམས། །
འདི་རྣམས་ནོར་ས་ཆེ་བའི་རིགས། །
བྱ་བའི་མིང་ཅན་མིང་རྐྱང་རྣམས། །
ཕལ་ཆེར་ས་མཐའ་སྦྱར་བ་སྟེ། །
བྱམས་པ་དམིགས་པ་སྐྱུགས་སོགས་བཞིན། །
རུས་ཀྱི་མིང་ཅན་ཕལ་ཆེར་ལ། །
གནུབས་གཉགས་སོགས་བཞིན་ས་མཐར་བྱས། །
རུས་མིན་སོགས་ལ་དེ་ལྡོག་ཅེས། །
ཆོས་དབྱངས་འཇམ་དབྱངས་ཕྱོགས་དང་ཁྱོགས། །
དཀྲིགས་ཁྲག་རྒྱ་སྐྱེགས་གླེགས་བམ་མཁྲེགས། །
རྡོ་སྒྱོགས་ལམ་རྒྱགས་འཇུག་ངོགས་སྔགས། །
ཡིད་གཅུགས་མགོ་ལྕོགས་ཞབས་ལྗགས་སྙིགས། །
ལྟོགས་ཕོངས་སྟེགས་བུ་མུ་སྟེགས་དང་། །
བླ་དྭགས་རི་དྭགས་ཡི་དྭགས་སོགས། །
ས་མཐའ་ཅན་དུ་མཛད་པ་མང་། །
ཉོན་མོངས་པ་དང་ཐུན་མོང་བ། །
འདི་སོགས་ས་མཐའ་ཡོད་མེད་ཀྱི། །
ཁྱད་པར་མཛད་ཀྱང་ཚིག་གྲོགས་ཀྱིས། །
དབང་གིས་ནོར་ས་མི་ཆེ་བས། །
བྱས་ཀྱང་རུང་ལ་མེད་ཀྱང་འདྲ། །
དྲི་བཟང་སོགས་ལ་གང་ཡང་རུང་། །
མང་དུ་སྤྲོས་ན་མཐའ་མེད་ཀྱང་། །
འདིར་ནི་སྙིང་པོ་ཙམ་ཞིག་བསྡུས། །
དགེ་བས་འགྲོ་བ་ཐམས་ཅད་ཀྱི། །
འཇམ་དཔལ་ཤེས་རབ་ཐོབ་གྱུར་ཅིག །
བཅས་མི་ཕམ་པས་བྲིས་པའོ། །
༼མཁས་མཆོག་དངུལ་ཆུ་ཡབ་སྲས་ཀྱིས་མཛད་པའི་སི་ཏུ་ཞལ་ལུང་སོགས་སུམ་རྟགས་ཕྱོགས་བསྡེབས་ཞེས་པ་ལས་ཟུར་བཏོན་ཞུས། ཤོག་ངོས། ༡༧༧-༡༨༡ ཆོས་སྤྱོད་དཔེ་སྐྲུན་ཁང་། དཔར་ལོ། ༢༠༠༣༽