དྲ་རྒྱ་བཟོ་བཀོད་པ་བསོད་ནམས་འོད་ཟེར།
Sunday 10 April 2011
01:19 | 
Posted by
གངྒའི་ཆུ་རྒྱུན། |
རྩོམ་རིག་སྤྱི་དང་བྱེ་བྲག་བོད་ཀྱི་རྩོམ་རིག་གི་སྐོར།
སྐྱབས་རྗེ་ཟམ་གདོང་བློ་བཟང་བསྟན་འཛིན།
རྩོམ་རིག་སྤྱི་དང་ཁྱད་པར་བོད་ཀྱི་རྩོམ་རིག་གི་སྐོར་ལ་ཤོད་དགོས་ཞེས་སྔ་མོ་ནས་ང་ལ་རྗོད་མཁན་མང་པོ་བྱུང་ཡང་། ངས་དེ་ཕྱིར་འགྱངས་ཤ་སྟག་བྱས་ནས་ད་བར་བཤད་མེད། དེའི་རྒྱུ་མཚན་ནི་འཆད་པ་པོ་དང་ཉན་པ་པོ་གཉིས་ཀར་མཚན་ཉིད་ཚང་དཀའ་བ་ཡིན། རྩོམ་རིག་གི་སྐོརལ་བཤད་རྒྱུ་དེ་སློབ་ཚན་གཞན་ལྟར་ནག་པོ་འབྲུ་བཤེར་བྱས་ནས་བཤད་རྒྱུ་ཡོད་པ་ཞིག་མིན་པར་ཤོད་མཁན་དེ་རང་བཞིན་གྱིས་རྩོམ་ལ་སྤོབས་པ་ཡོད་པ་ཞིག་དང་། ཉན་མཁན་དེ་ཡང་རྩོམ་རིག་ལ་ཕྲན་བུ་གོ་རྟོགས་དང་མྱོང་བ་ཡོད་པ་ཙམ་མིན་པར་རང་ཉིད་ལ་རྩོམ་གྱི་སྤོབས་པ་ཡོད་མཁན་ཞིག་ཡིན་དགོས་པ་ལས་ཨང་རྩིས་དང་ས་ལམ་རྣམ་བཞག་བཤད་པ་ལྟར་རྩོམ་རིག་གི་ཐོག་ལ་བཤད་རྒྱུ་ཡོད་པ་ཞིག་མ་ཡིན།
རྗེ་གུང་ཐུང་འཇམ་དཔལ་དབྱངས་ཀྱི་མགུར་ཞིག་གི་ནང་དུ།
འབྲུག་པ་ཀུན་ལེགས་བཞིན་བཤད་ན། །
མཐོ་རྒྱག་དམས་རྒྱག་ལ་གཏང་ངོ་། །
གེ་སར་སྒྲུང་གླུ་ལ་ཉན་བཞིན། །
དགའ་མདོག་སྡུག་མདོག་རེ་བྱོས་དང་། །ཞེས་གསུངས་དགོས་དོན། ཁོང་གི་རྩོམ་རྣམས་ཧ་ཅང་སྙན་པོ་ཡོད་ནའང་། ཉན་མཁན་གྱིས་ཉམས་དང་འགྱུར་བ་བླང་ཤེས་ཀྱི་མེད་སྟབས་དགའ་མདོག་དང་སྡུག་མདོག་གང་ཡང་བྱེད་ཀྱི་མེད་པ་དང་། གེ་སར་གྱི་སྒྲུང་ཉན་མཁན་ཚོས་ཉམས་དང་འགྱུར་བ་མང་པོ་སྟོན་གྱི་ཡོད་པ་ཡིན། གེ་སར་གྱི་སྒྲུང་དེ་སྙན་ངག་བཟང་པོ་ཞིག་ཡིན་པ་བརྗོད་མི་ཐུབ་ཀྱང་། གེ་སར་གྱི་སྒྲུང་ཀློག་པའི་སྐབས་སུ་དགའ་མདོག་སྡུག་སོགས་ཁོང་ཁྲོ་དང་སྙིང་སྟོབས་འཕེལ་བའི་ཉམས་མང་པོ་ཞིག་སྟོན་གྱི་ཡོད་ཅིང་། རྗེ་གུང་ཐང་གི་གསུང་སྙན་ངག་བཟང་པོ་དེ་ཚོ་ལ་ཉམས་དང་འགྱུར་བ་སྟོན་ནས་ཉན་མཁན་མ་རྙེད་སྟབས་ཕར་ལ་ཞུ་བ་འཐེན་དགོས་བྱུང་ནས། གེ་སར་སྒྲུང་གླུ་ལ་ཉན་བཞིན། །དགའ་མདོག་སྡུག་མདོག་རེ་བྱོས་དང་། །ཞེས་ད་ཁྱེད་ཚོས་རྣམ་འགྱུར་འདྲ་སྟོན་དང་ཞེས་གསུང་དགོས་བྱུང་ཡོད།
རྒྱ་གར་བའི་སྙན་ངག་མཁན་ཚོས་སྙན་ངག་ཀློག་པའི་སྐབས་སུ་སེམས་ལ་ཚོར་བ་ཧ་ཅང་ཆེན་པོ་ཡོང་གི་ཡོད་སྟབས། མགོ་དང་། རྐང་པ། ལག་པ་སོགས་གཡུགས་ནས་འཕག་འཚག་རྒྱག་གི་ཡོད་ནའང་ང་ཚོས་གང་ཀློག་ཀྱང་། བོང་བུའི་རྣ་བར་གསེར་དང་བྱེ་མ་གང་བླུགས་ཀྱང་ཁྱད་པར་མེད་པར་དཀྲུག་ཙམ་དཀྲུག་ཙམ་བྱེད་པ་ལྟར་མ་གཏོགས་ཉམས་དང་འགྱུར་བ་གང་ཡང་ཐོན་གྱི་མེད། དེས་ན་རྩོམ་རིག་གི་སྐོར་ལ་སྤྱིར་སྟངས་ཀྱི་གནས་ཚུལ་ལན་འདྲ་ནི་བསྐྱེལ་རྒྱུ་ཡོང་བ་མ་གཏོགས་དོན་གནད་ཡོད་པ་ཞིག་བཤད་རྒྱུ་ནི་དཀའ་བ་ཡིན།
སྤྱིར་ངས་རྩོམ་རིག་གི་སྐོར་གང་ཡང་ཤེས་ཀྱི་མེད་ལ། ཁྱེད་ཚོ་རྩོམ་རིག་ལ་དགའ་སྤོབས་ཡོད་མཁན་ཡང་མང་པོ་མིན། རྩོམ་རིག་ལ་དགའ་སྤོབས་ཡོང་བར་བྱེད་པ་ལ་ཆ་རྐྱེན་དང་པོ་དེ་རང་བཞིན་གྱིས་གྲུབ་པའི་སྤོབས་པ་ཚང་དགོས། དེ་མེད་ན་ཞོགས་པ་ཡར་ལངས་པ་དང་བློ་ལ་བཟུང་ནས་སྦྱང་རྒྱུ་ཡོད་པ་ཞིག་མིན་ལ། དགེ་རྒན་གྱིས་དེ་ནང་བཞིན་བསླབ་རྒྱུ་ཡོད་པ་ཞིག་ཀྱང་མ་ཡིན།
དེང་སྐབས་ངས་གཅིག་བཤད་དུས་སློབ་གྲྭ་བ་དང་དགེ་ལས་མང་པོ་ཞིག་གིས་སྒྲ་འཛིན་འཁོར་ལོ་འཁྱེར་ཡོང་ནས། ང་ལ་བཤད་རྒྱུ་མང་པོ་ཡོད་རེད་བསམ་གྱི་ཡོད་ནའང་། ངས་བརྗོད་རྒྱུ་དེ་ཚོ་ཁུངས་ཐུབ་པོ་ཞིག་དང་རྒྱུ་མཚན་ལྡན་པ་ཞིག་ཡོང་ཐུབ་པ་དཀའ། ངས་དཔེ་ཆ་མ་བལྟས་པ་དང་སློབ་སྦྱོང་མ་བྱས་པར་ལས་ཁུངས་ཀྱི་ནང་ལ་ས་ཡིག་བརྒྱག་རྒྱུ་ཙམ་དང་། ཕར་འགྲོ་ཚུར་འགྲོ་རྐྱང་རྐྱང་བྱས་ནས་ཕལ་ཆེར་ལོ་ཉི་ཤུ་ལྷག་འཁོར་གྱི་འདུག་པས། ཕན་ཐོགས་པའི་སྐད་ཆ་གང་ཡང་བཤད་རྒྱུ་མེད།
སྔོན་མ་ང་ལ་དཔེ་ཆ་ཕྲན་བུ་བལྟ་ལོང་ཡོད་པའི་སྐབས་དང་། ཕྲན་བུ་བཤད་རྒྱུ་ཡོད་པ་དང་། ཤོད་ལོང་དུས་ཚོད་ཀྱང་ཡོད་པའི་སྐབས་སུ་ང་ལ་ཤོད་ཟེར་མཁན་མེད་ལ། བཤད་དུ་ཕྱིན་ནའང་ཉན་མཁན་དེ་ཙམ་མེད། དེ་དུས་ང་ལ་ཤོད་ཟེར་མཁན་དེ་རྒྱ་གར་བ་དང་ཕྱི་རྒྱལ་བ་མང་བ་ཡོད། Krishnamurti Foundationདང་ Theosophical Societyའདྲ་པོ་ཁོང་ཚོས་གལ་ཆེན་པོར་བརྩིས་ནས་ང་ལ་ཤོད་ཟེར་བ་ལྟར་ངས་ཀྱང་གང་བཤད་པ་དེ་སྐད་འཁོར་ནང་བཅུག་པ་དང་། དེ་ཡིག་ཐོག་ལ་ཕབ་པ་སོགས་མང་པོ་ཞིག་བྱས་ཡོད། དེ་བཞིན་ཕྱི་རྒྱལ་གྱི་ཆོས་ཚོགས་དེ་འདྲས་ཀྱང་སྐབས་རེ་ཤོད་ཟེར་བ་མ་གཏོགས་བོད་པའི་ནང་ནས་ང་ལ་ཤོད་ཟེར་མཁན་མེད། དེང་སང་ང་ལ་ཤོད་ཟེར་མཁན་དེ་ཇེ་མང་དུ་འགྲོ་བ་དང་། ངས་བཤད་རྒྱུ་དེ་ཇེ་ཉུང་དུ་འགྲོ་ཡི་འདུག དེ་ཡང་སྐད་ཆ་བཤད་རྒྱུའི་སྔོན་ལ་གྲ་སྒྲིག་བྱེད་རྒྱུའི་གོ་སྐབས་ཡོང་གི་མེད་སྟབས་གང་དྲན་དྲན་བཤད་ཀྱི་ཡོད། གང་དྲན་བཤད་ན་དེའི་ནང་ལ་ནོར་བ་དང་འཁྲུལ་བ་མང་པོ་ཡོང་སྲིད་ལ། སོ་སོའི་རྣམ་རྟོག་གིས་བཟོས་པ་དང་། དཔེ་ཆ་དང་འགལ་བའང་མང་པོ་ཡོང་སྲིད། མཐོ་རིམ་སློབ་གྲྭའི་ནང་ལ་གང་བྱུང་མང་བྱུང་བཤད་པ་དེ་ཕྱིས་སུ་མི་ཚོས་ཁུངས་དྲངས་ནས་དེ་ནོར་འཁྲུལ་ཆགས་ཡོད་ན་ཡག་པོ་མིན་སྟབས་སྐབས་རེ་འཇིགས་སྣང་སྐྱེ་ཡི་འདུག་ཀྱང་། ད་རེས་ཁྱེད་རང་ཚོས་རེ་བ་བྱས་པ་ཡིན་སྟབས་ངས་གྲ་སྒྲིག་མེད་པར་གང་དྲན་ཞིག་བཤད་ཀྱི་ཡིན་པས། གལ་ཏེ་ནོར་ཡོད་ན་རྗེས་མ་ཁྱེད་ཚོས་ནོར་བཅོས་བརྒྱག་དགོས།
རྩོམ་རིག་ཅེས་པ་དེ་ངག་གི་ཡོན་ཏན་ཁྱད་པར་བ་ཞིག་ཡིན། སྤྱིར་བཏང་ནས་བཟོའི་གནས་ལ་ལུས་ཀྱི་བཟོ་དང་། ངག་གི་བཟོ། ཡིད་ཀྱི་བཟོ་གསུམ་དབྱེ་བ་ལས་ཞིབ་ཆ་མ་ཕྱེ་ན་བཟོའི་གནས་ལ་སྒྱུ་རྩལ་ཡང་ཟེར་བ་དབྱིན་ཇིའི་སྐད་ལ་ Artཟེར་བ་དེ་ཡིན། དེ་ལ་ལུས་ངག་ཡིད་གསུམ་གྱི་སྒྱུ་རྩལ་གྱི་རྣམ་པ་མི་འདྲ་བ་གསུམ་ཡོང་གི་ཡོད་པའི་ནང་ནས་ལུས་ཀྱི་བཟོ་ནི། རི་མོ་བྲི་རྒྱུ་དང་། གཟུགས་བརྙན་བཟོ་རྒྱུ། རྟ་བརྒྱུག་རྒྱུ། མཚོན་ཆ་འཕང་རྒྱུ། ཁང་པའི་བཟོ་བཀོད། ཚེམ་པོ། མགར་བྱས་ནས་ལུག་བརྡུང་ཚག་གསུམ་ལ་སོགས་པ་བཟོའི་གནས་མང་པོ་ཞིག་ལུས་བཟོའི་ནང་ལ་ཡོད། ངག་གི་བཟོ་ལ་སྔར་མེད་པའི་སྙན་ངག་གསར་རྩོམ་བྱ་རྒྱུ་དང་། སྔར་ཡོད་པའི་སྙན་ངག་རྣམས་གླུ་གཞས་ལྟ་བུ་གདངས་སྙན་པོ་གཏང་རྒྱུ་ལ་སོགས་པ་ངག་གི་བཟོ་རིག་མི་འདྲ་བ་མང་པོ་ཡོད་པའི་ནང་ནས་རྩོམ་གྱི་རིག་པ་དེ་ངག་གི་བཟོ་ཁྱད་པར་བའམ་ཐུན་མོང་མ་ཡིན་པ་ཞིག་ཡིན།
སྤྱིར་བཏང་ནས་ངག་གི་རང་བཞིན་ངག་གི་ཐ་སྙད་ཁྱད་པར་བ་སྐད་ཡིག་ཅེས་པའི་རྣམ་གཞག་དེ་མིའི་འགྲོ་བ་ལ་མ་གཏོགས་དུད་འགྲོ་ལ་སོགས་པ་ལ་མེད་ཅིང་། ལུས་ཀྱི་རྣམ་འགྱུར་ཆགས་སྟངས་ནི་དུད་འགྲོ་དང་མི་འདྲ་པོ་ཡིན་ནའང་དུད་འགྲོ་ལ་ཁ་ནས་སྒྲ་འབྱིན་རྒྱུ་ཡོད་ནའང་། སྒྲ་དེ་སྐད་ཡིག་གི་རང་བཞིན་དུ་བྱས་ནས་དེ་ལུང་དུ་སྟོན་པས་བཅིང་རྒྱུ་དང་། སྙན་ངག་གི་རྒྱན་གྱིས་སྤུད་རྒྱུ་ལ་སོགས་པ་དེའི་རིགས་དེ་རྣམས་མིའི་ཐུན་མོང་མ་ཡིན་པའི་ཁྱད་ཆོས་ཤིག་ཡིན། ཡོངས་གྲགས་ལྟར་བྱས་ན། དུད་འགྲོའི་འཇིག་རྟེན་དང་མིའི་འཇིག་རྟེན་གཉིས་ཀྱི་ནང་ནས་མིའི་ཐུན་མོང་མ་ཡིན་པའི་ཁྱད་ཆོས་ཤིག་ལ་གད་མོ་བགད་རྒྱུ་ཡོད་པ་དང་། སྐད་ཆ་བཤད་རྒྱུ་ཡོད་པ། སྐད་ཆ་བཤད་རྒྱུ་དེའང་ཐུན་མོང་མ་ཡིན་པའི་ཁྱད་ཆོས་ལྡན་པའི་ངག་གི་རང་བཞིན་རྩོམ་རིག་སྤེལ་ཐུབ་པ་དེ་རྣམས་མིའི་ཐུན་མོང་མ་ཡིན་པའི་ཁྱད་ཆོས་ཤིག་ཡིན། དེས་ན་མིས་སྐད་ཆ་བཤད་ཚད་དེ་རྩོམ་རིག་ཡིན་ནམ་ཞེ་ན། རྩོམ་རིག་ནི་སྙན་ངག་གི་ངོ་བོར་ལྡན་པའི་ངག་གི་རང་བཞིན་ཁྱད་པར་བ་ཞིག་དང་། དེ་ཡང་མི་གཞན་པས་བཟོས་ཟིན་པ་བསྐྱར་དུ་སྐྱོར་བ་མ་ཡིན་པར་རང་གི་བློ་ཐོག་ནས་བརྩམས་པ་ཞིག་དགོས།
བརྩམས་པའམ་རྩོམ་པ་ཞེས་པ་དེ་རྩོལ་བ་བྱས་ནས་གསར་པ་བཟོས་པ་ཞིག་ལ་གོ་དགོས་ཤིང་། རྩོལ་བ་བྱས་ནས་གསར་པ་བཟོས་པ་དེ་ལའང་བྱ་བ་རྩོམ་པ་དང་ལས་དོན་བརྩམས་པ་སོགས་དེ་འདྲ་མང་པོ་ཞིག་ཡོང་གི་ཡོད་ནའང་། བྱ་བ་ཞེས་པའི་ཚིག་དེ་ཕར་ཕུད་ནས་རྩོམ་རྐྱང་པ་བརྗོད་དུས་ངག་གི་རིག་བྱེད་ལ་རང་བཞིན་གྱིས་གོ་འགྲོ་བ་དེར་ཐ་སྙད་གཏིང་ཚུགས་པ་ཞེས་པ་ཡིན། སྒྲ་དེ་དོན་དེ་ལ་འཇགས་སོང་བ་དཔེར་ན་རྒྱ་གར་སྐད་དུ་རཅནཱ་ཞེས་པའི་ཚིག་དེ་སྤྱིར་བཏང་ནས་གཞི་ཁྱད་པར་བ་གཞན་པ་དང་སྦྱར་བ་ཡིན་ན་བིའུ་རཅནཱ། གྲོས་ངན་རཅནཱ་ཟེར་བ་དེ་འདྲ་མང་པོ་སྦྱར་ནས་གོ་དོན་མི་འདྲ་བ་ཡོད་ནའང་། དེ་ཉིད་གཞི་གཞན་དང་མ་སྦྱར་བར་རཅནཱ་རྐྱང་པ་བརྗོད་ན་ངག་གི་རིག་བྱེད་རྩོམ་རིག་ལ་གོ་དགོས། འདི་ཆེ་གེ་མོ་ཞིག་གི་རཅནཱ་རེད་བརྗོད་ཚེ། མི་དེས་བཟོས་པའི་ཁང་པ་དང་། ཤིང་ཆས་དང་། སྐུ་རྟེན་སོགས་ལ་མི་གོ་བར། སྙན་ངག་མཁན་གྱིས་བྲིས་པའི་རྩོམ་རིག་དེ་ལ་གོ་བ་ཡིན། དེར་བརྟེན་རྩོམ་རིག་ཟེར་བ་དེ་ཐུན་མོང་མ་ཡིན་པའི་རྩོལ་བ་ཞིག་ལ་དམིགས་བསལ་གྱིས་མིང་བཏགས་པའམ་རྩོལ་བའི་མིང་དེ་བྱ་བ་བྱེ་བྲག་པ་ཞིག་ལ་རང་བཞིན་གྱིས་གཏིང་ཚུགས་པར་སོང་ནས། དེང་སང་རྩོམ་ཞེས་པ་ངག་གི་རིག་བྱེད་ཅིག་ཡིན་པ་དེ་རང་ཤུགས་ཀྱིས་གོ་བ་ཡིན།
འོ་ན་གོང་དུ་ཞུས་པ་ལྟར་སྐད་ཆ་བཤད་ཚད་དེ་རྩོམ་རིག་ཨེ་ཡིན་ཞེ་ན། མ་ཡིན། རྩོམ་རིག་ཡིན་པ་དང་མ་ཡིན་པ་དེ་གང་འདྲ་ཞིག་གི་ཐོག་ནས་དབྱེ་བ་འབྱེད་དགོས་ཟེར་ན། སྤྱིར་རྩོམ་རིག་གི་དོན་དེ་ཚིག་སྐྱོན་མ་བཅད་པར་གོ་བ་རགས་པ་སྤོམ་བཤད་ཙམ་བྱས་ན། སྐད་ཡིག་ནང་ལ་ཀློག་རྒྱུ་ཡོད་པ་བྲིས་ཚད་ཚང་མ་ལ་རྩོམ་རིག་མི་ཟེར་བ་དཔེར་ན། དཔེ་མཛོད་ཁང་གི་དཔེ་ཆའི་དཀར་ཆག་ལྟ་བུ་ཞིག་ཡིན་ན། པོ་ཏི་ཀ་པ་དང་། ཁ་པ་དང་། ག་པའི་ནང་དཔེ་ཚན་འདི་དང་འདི་ཡོད་ཅེས་འབྲི་བའམ་རྩོམ་གྱི་ཡོད་པ་དེ་རྩོམ་རིག་གམ་རྩོམ་གྱི་རིག་པ་མ་ཡིན་ནའང་། དེ་འདྲའི་དཔེ་ཐོ་དཀར་ཆག་ཅིག་རྩོམ་རིག་གི་ལམ་ནས་བཟོ་ནའང་བཟོ་རྒྱུ་ཡོད་པ་ཞིག་ཡིན།
བརྗོད་བྱ་ཁྱད་པར་བ་སྟོན་པའི་གཞུང་ཡིན་ལ་རྩོམ་རིག་མ་ཡིན་པ་དང་། རྩོམ་རིག་ཡིན་ལ་བརྗོད་བྱ་ཁྱད་པར་བ་སྟོན་པའི་གཞུང་མ་ཡིན་པ། བརྗོད་བྱ་ཁྱད་པར་བ་སྟོན་པའི་གཞུང་ཡང་ཡིན་ལ་རྩོམ་རིག་ཀྱང་ཡིན་པ་དེ་འདྲའི་རིགས་མང་པོ་ཡོད་པ་དཔེར་ན། སུམ་ཅུ་པའི་རྩ་བ་ལྟ་བུར་མཚོན་ན། སུམ་ཅུ་པའི་རྩ་བ་དེ་ཚིགས་བཅད་ལྷུག་གཉིས་ཀྱི་ནང་ནས་ཚིགས་བཅད་ཡིན་པ་དང་། བརྗོད་བྱ་ཁྱད་པར་སྟོན་པའི་གཞུང་ཞིག་ཡིན་ནའང་། རྩོམ་རིག་དང་སྙན་ངག་གི་བསྟན་བཅོས་ཤིག་མ་ཡིན། སྙན་ངག་ཐུང་ཐུང་དེ་འདྲ་ཚིགས་རྐང་གཉིས་དང་། བཞི་ཙམ་བྱས་པ་དེ་འདྲ་མང་པོ་ཡོད་པ་དེ་ཚོ་རྩོམ་རིག་ཡིན་ནའང་། བརྗོད་བྱ་ཁྱད་པར་བ་སྟོན་པའི་གཞུང་ཞིག་མ་ཡིན། གཞུང་གི་ཡན་ལག་ལ་ཡོད་པ་དེ་འདྲ་ཡོང་སྲིད་པ་མ་གཏོགས་གཞུང་གི་ཡན་ལག་ལ་མེད་པའི་ཚིགས་རྐང་གཉིས་དང་བཞི་དང་དྲུག་འདྲ་པོ་དེ་འདྲ་ཡན་གར་བ་རྩོམ་རིག་རང་གི་ངོ་བོ་ཙམ་ལས་བརྗོད་བྱ་ཁྱད་པར་བ་སྟོན་པའི་གཞུང་གི་ནང་ལ་མི་འགྲོ་བ་དེ་འདྲའི་རྩོམ་རིག་ཀྱང་མང་པོ་ཡོད་པ་དང་། གཞུང་ཡང་ཡིན་ལ་རྩོམ་རིག་ཀྱང་ཡིན་པ་དེ་འདྲའང་མང་པོ་ཡོད། བཤེས་སྤྲིང་ལྟ་བུ་ཡིན་ན། རྩོམ་པ་པོས་སྙན་ངག་ཡག་པོ་མེད་གསུང་གི་ཡོད་ནའང་དངོས་དོན་སྙན་ངག་ཧ་ཅང་བཟང་པོ་ཞིག་སྟེ། དེ་ནི་རྩོམ་རིག་གི་ནང་ལ་འགྲོ་བ་མ་ཟད། བརྗོད་བྱའི་གནད་ཆེན་པོ་སྟོན་པའི་གཞུང་གི་ནང་ལའང་འགྲོ་བ་ཡིན།
མདོའི་ནང་ལ་རྩོམ་རིག་ཡོད་ཅེས་བརྗོད་དགོས། གསུང་རབ་ཡན་ལག་བཅུ་གཉིས་སུ་ཕྱེ་བའི་སྐབས་སུ་དབྱངས་ཀྱིས་བསྙད་པའི་སྡེ་ཞེས་པ་ཞིག་ཡོད་པ་དེ་ལ་དབྱངས་ཀྱིས་བསྙད་པའི་སྡེ་བརྗོད་དགོས་དོན་ནི། དབྱངས་ཀྱི་སྒོ་ནས་གླུ་རུ་བླང་རུང་བ་ཡིན་པས། དབྱངས་ཀྱིས་བསྙད་པའི་སྡེ་ཞེས་བརྗོད། དེ་འདྲའི་དབྱངས་ཀྱིས་བསྙད་པའི་སྡེའི་ནང་ཚིགས་བཅད་དང་ཚིག་ལྷུག་གང་ཡིན་ཡང་། ཚིག་རྒྱན་གྱིས་ཟིན་པར་བྱས་ནས་རྩོམ་རིག་གི་ཁྱད་ཆོས་ཡོད་པ་དེ་འདྲ་མང་པོ་ཡོད། ཡང་ཤེས་རབ་སྙིང་པོ་ལྟར་གཟུགས་མེད། ཚོར་བ་མེད། འདུ་ཤེས་མེད་ཟེར་བ་དེ་ཚོ་བརྗོད་བྱ་ཁྱད་པར་བ་སྟོན་པའི་གཞུང་ཡིན་ནའང་། རྩོམ་རིག་གི་ནང་ལ་མི་འགྲོ།
དེར་བརྟེན་རྩོམ་རིག་གི་ཐ་སྙད་དེ་གང་འདྲ་ཞིག་ལ་ཐོགས་དགོས་པའམ། རྩོམ་རིག་གི་མཚན་ཉིད་དེ་གང་འདྲ་ཞིག་བཞག་དགོས་ཟེར་ན། བརྗོད་བྱ་གང་འདྲ་ཞིག་སྟོན་པ་ཡིན་ནའང་། བརྗོད་བྱ་དེ་སྟོན་བྱེད་ཀྱི་ངག་གི་རྣམ་འགྱུར་དེ་ལ་དོ་སྣང་དམིགས་བསལ་བ་ཞིག་བྱས་ནས་འབད་བརྩོན་དམིགས་བསལ་བ་ཞིག་དགོས། ཉན་པ་པོས་ཉན་པའི་སྐབས་སུ་སྙན་ཆ་ཡོད་པའམ་འཇེབས་པའི་རང་བཞིན་དང་གོ་བ་སྟེར་སྟངས་ཐུན་མོང་མ་ཡིན་པ་ཡོད་པ་ཞིག་དང་། ཚིག་དེ་བརྗོད་པའི་སྐབས་ལའང་། རྗོད་མཁན་གང་ཟག་དེའི་སེམས་ལ་ཚོར་བ་ཁྱད་པར་བ་ཞིག་སྐྱེད་ཡོང་བ་དེ་འདྲའི་ངག་གི་ཁྱད་ཆོས་ལྡན་པ་ཞིག་བཟོས་ཡོད་ན། རྩོམ་རིག་ནང་ལ་འགྲོ་བ་ཡིན། དེ་འདྲ་མ་ཡིན་པར་བརྗོད་བྱའི་དོན་སྟོན་ཐུབ་པ་ཙམ་ཞིག་མ་གཏོགས་རྗོད་བྱེད་ཚིག་གི་རྣམ་འགྱུར་དེ་ཁྱད་པར་བ་ཞིག་བཟོ་རྒྱུའི་དོན་ལ་འབད་བརྩོན་མ་བྱས་པར་བྲིས་པ་དེ་རྩོམ་རིག་གི་ཁོངས་སུ་མི་འགྲོ།
དེ་འདྲའི་སྙན་ཆ་ཡོད་དང་མེད་ཀྱི་ས་མཚམས་ནི། རྗོད་པ་པོའམ་ཉན་པ་པོ་གང་རུང་གི་བསམ་བློར་བརྗོད་བྱའི་དབང་གིས་མ་ཡིན་པར། རྗོད་བྱེད་ཀྱི་ཚིག་དེའི་དབང་གིས་བྲོ་བ་ཁྱད་པར་བ་ཞིག་སྐྱེ་རྒྱུ་ཡོད་པ་ཞིག་ཡོད་ན། དེ་ལ་སྙན་ཆ་ཡོད་པ་དང་། རྗོད་བྱེད་ཀྱི་ཚིག་དེ་ལ་བརྟེན་ནས་ཉན་མཁན་དང་ཀློག་མཁན་གང་གི་སེམས་ལའང་བྲོ་བ་ཁྱད་པར་བ་ཞིག་སྐྱེ་རྒྱུ་མི་འདུག་ན། དེ་ལ་སྙན་ཆ་མེད་པ་ཡིན། བརྗོད་བྱའི་དོན་གྱི་དབང་གིས་བློའི་ཚོར་བ་ཡོང་བ་དེ་གནས་ཚུལ་གཞན་ཞིག་ཡིན་པ་ནི། དཔེར་ན། མི་རྟག་པ་བསྟན་པའམ། ངན་སོང་གི་སྡུག་བསྔལ་བསྟན་པ་དེ་འདྲ་ཀློག་ནས་སེམས་ལ་སྐྱོ་སྣང་དང་འཇིགས་སྣང་ལ་སོགས་པ་ཚོར་བ་ཡོང་གི་ཡོད་པ་དང་། སངས་རྒྱས་ཀྱི་ཡོན་ཏན་དང་མཚན་བཟང་གི་རྣམ་གཞག་ལ་སོགས་པ་དང་། དལ་འབྱོར་དོན་ཆེན་རྙེད་དཀའ་ལ་སོགས་པ་གོ་དུས། སེམས་ལ་དགའ་བ་དང་སྤོབས་པ་དང་ཡི་རངས་ཀྱི་ཚོར་བ་དེ་འདྲ་ཡོང་གི་ཡོད་པ་དེ་རྣམས་བརྗོད་བྱ་དོན་དེའི་དབང་གིས་ཡོང་བ་ལས། རྗོད་བྱེད་ཚིག་དེའི་དབང་གིས་སེམས་ལ་ཐུན་མོང་མ་ཡིན་པའི་ཚོར་བ་དེ་མི་ཡོང་བ་ཡིན།
བརྗོད་བྱའི་དོན་ལེགས་ཉེས་གང་ཞིག་ཡིན་ནའང་། རྗོད་པ་པོ་གང་ཟག་དེས་རྗོད་བྱེད་ཀྱི་ཚིག་དེའི་དབང་གིས་རྗོད་པ་པོའི་གང་ཟག་གི་སེམས་ལའང་ཚོར་བ་དམིགས་བསལ་ཡོང་རྒྱུ་ཡོད་པ་ཞིག་དང་། ཉན་མཁན་གྱི་གང་ཟག་དེའི་རྒྱུད་ལའང་ཚོར་བ་དམིགས་བསལ་བ་ཞིག་བསྐྱེད་ཐུབ་པ་དེ་འདྲའི་ངག་གི་རང་བཞིན་ཞིག་ལ་རྩོམ་རིག་ཅེས་བརྗོད། དེས་ན་ངག་གི་རང་བཞིན་ནམ། རྗོད་བྱེད་ཀྱི་ཚིག་རང་ལ་བྲོ་བ་ཞིག་ཡོད་དགོས་ཤིང་། བྲོ་བ་དམིགས་བསལ་བ་ཞིག་ཡོད་པའི་ངག་གི་རྣམ་པར་རིག་བྱེད་གང་ཡིན་པ་དེ་ལ་རྩོམ་རིག་བརྗོད་བྱ་ཕལ་ཆེར་འགྲིགས་པ་ཡིན།
བྲོ་བ་ཞེས་པའི་ཚིག་ངས་ད་ལྟ་བེད་སྤྱོད་བཏང་བ་དེ་སྙན་ངག་གི་གཞུང་ནས་བཤད་པ་ལྟར་བྱས་ན། ཉམས་ཟེར་བ་དེ་ཡིན། ཉམས་ཞེས་པ་དེ་ཚིག་རང་གི་ཐུན་མོང་མ་ཡིན་པའི་ཁྱད་ཆོས་ཤིག་ལ་བརྟེན་ནས་སེམས་རྒྱུད་ལ་ཐུན་མོང་མ་ཡིན་པའི་བྲོ་བ་བསྐྱེད་ཐུབ་པ་ཞིག་ལ་ཟེར། སཾསྐྲྀཏའི་སྐད་ལ་རས་ཞེས་པ་དེ་ཡིན་ཞིང་། རས་ཟེར་བའི་སཾསྐྲྀཏའི་ཚིག་གཅིག་ལ་བོད་སྐད་ཀྱི་ནང་ལ་མི་འདྲ་བ་གསུམ་བཞི་ཙམ་བསྒྱུར་ཡོད། གཅིག་བྱས་ན་མིང་ཚིག་མང་ཉུང་ Vocabularyགི་དབང་དུ་བྱས་ན། སཾསྐྲྀཏའི་སྐད་ལས་བོད་སྐད་ཕྱུག་པ་ལྟ་བུ་ཞིག་ཡིན།