དྲ་རྒྱ་བཟོ་བཀོད་པ་བསོད་ནམས་འོད་ཟེར།
Wednesday 2 January 2013
10:33 | 
Posted by
གངྒའི་ཆུ་རྒྱུན། |
རིག་ཡག་གི་འཁྲུལ་སྣང་།
ངའི་སེམས་ལ། ཨ་ཕས་ངའི་མིང་ལ་རིག་ཡག་ཅེས་བཏགས་པ་ནི་མིང་དོན་མི་མཚུངས་པར་སྙམ། ཆུང་དུས་ནས་བཟུང་། ང་ནི་མི་རིག་རྡིབ་ཅིག་ཡིན། ནུ་བོ་ཚེ་རིང་ང་ལས་ལོ་གཉིས་ཀྱིས་ཆུང་ན་ཡང་། ངེད་སྤུན་གཉིས་ཀྱི་རིག་པ་ལ་གནམ་སའི་ཁྱད་པར་ཡོད། ཕ་གཅིག་གི་རུས་སུ་གྲུབ་ཅིང་མ་གཅིག་གི་མངལ་ཁོག་བརྒྱུད་ནས་ཡོང་བའི་སྤུན་གཉིས་ལ་མཁས་བླུན་གྱི་ཁྱད་པར་དེ་འདྲ་ཤོར་བ་ནི་ངོ་མ་ཡ་མཚན་ཞིག་རེད། ཆུང་དུས་སློབ་གྲྭར་འགྲོ་དུས། ངའི་ནུ་བོ་ནི་རིག་རྒོད་ཅིག་ཡིན་པས་ལོ་རིམ་དང་པོ་དང་། གཉིས་པ།
གསུམ་པ་ཞེས་ལོ་རེ་བཞིན་ཡར་འཕར་རྒྱུ་ཡོད་ཀྱང་། ངས་དཔེ་ཆ་ལོ་གསུམ་ལ་བཏོན་ཀྱང་ལོ་རིམ་དང་པོའི་འགག་སྒོ་དེ་ལས་ཐར་མ་ཐུབ། དེར་བརྟེན་ཨ་ཕས་ང་ལ། རིག་ལོ། ཁྱོད་ལ་དཔེ་ཆ་འདོན་པའི་ཁ་བསོད་མི་འདུག ལྕགས་ཁེམ་ཟུངས་དང་། ངས་བལྟས་ན་ཁྱོད་ལ་རན་པ་དེ་རེད། ཟེར།
དེ་ལྟར་ངས་ཡི་གེ་སྦྱོང་མཚམས་བཞག་སྟེ་ལྕགས་ཁེམ་བཟུང་ནས་ངལ་རྩོལ་བྱས་པ་ཡིན། ངས་རང་ཉིད་འཇིག་རྟེན་མི་ཡུལ་དུ་འཚོ་བ་རོལ་བའི་ལོ་ངོ་ཉེར་དྲུག་གི་ཉམས་མྱོང་གཞིར་བཞག་སྟེ་དཔྱད་པ་རེ་བཏང་ན། འཇིག་རྟེན་འཁོར་བ་ཟེར་བ་ནི་ཆོ་འཕྲུལ་གྱི་འཁོར་ལོ་བསྐོར་བ་ལྟ་བུ་ཞིག་རེད། དེའི་ཕྱིར།
དོན་དག་བཟང་ངན་ཅི་ཞིག་བྱུང་ན་ཡང་ངས་དེ་ཚོ་ལ་ཁ་ཡ་བྱེད་འདོད་མེད་པ་དང་། ཁ་བཟང་ངན་གང་ཡང་མ་གྲགས་པས་སྡེ་བའི་སྐྱེས་ཕོ་མོ་རྣམས་ཀྱིས་ང་ནི་མི་དྲང་མོ་ཞིག་རེད་ཟེར། ཨ་ཕས་རྒྱུན་པར་ང་ལ་གླེན་པ་ཞེས་སྡིགས་མོ་བྱེད་ནའང་། ངས་དེ་ཚོ་སྣང་མེད་དུ་བཞག་པ་ཡིན། བསམ་བློ་བཏང་ན་ཨ་ཕ་ལའང་ངན་ཁག་དཀྲི་རྒྱུ་མི་འདུག ང་རང་བུ་ཆེ་མགོ་ཡིན་པས་བོད་ཀྱི་ལུགས་སྲོལ་ལྟར་ན་ཕ་གཞིས་བུ་ཆེ་མགོས་སྐྱོང་དགོས་པས། ཨ་ཕས་ངས་ཁོའི་ཁྱིམ་ཤུལ་སྐྱོང་མི་ཐུབ་པར་དོགས་པ་རེད། དྲང་མོར་བཤད་ན་ང་ནི་མི་གླེན་པ་ཞིག་མིན། ལྷག་པར་དུ་ང་རང་ཡང་སྐྱེས་ཕོ་རབ་ཅིག་གི་ལུས་བླངས་ཡོད་པས་རང་གི་ལ་རྒྱ་ལོས་ཡོད། ལྷ་སྐྱིད་ངའི་ཆུང་མར་ལེན་རྒྱུའི་གནས་ཚུལ་དེ་ཨ་ཕས་ང་ལ་སྔ་མོ་ནས་ཁོག་བརྟོལ་ཡོད་མོད། འོན་ཀྱང་ལྷ་སྐྱིད་ནི་མེ་ཏོག་ཁྲོད་ཀྱི་པད་མ་དང་། རྒྱུ་སྐར་ཁྲོད་ཀྱི་ཟླ་བ་ཡིན་པས་གཉེན་སློང་མཁན་དང་འབྲེལ་འཛིན་མཁན་མང་པོ་བྱུང་བ་དང་། ལྷག་པར་དུ་ལྷུན་གྲུབ་ནི་རིག་པ་རྣོ་ཞིང་ཁྱིམ་ཚང་གི་འབྱོར་བ་ཡང་བཟང་བས། གལ་སྲིད་དེ་ཚོ་ལ་འགྲན་ཟླ་བྱས་ན་སྟག་མཆོངས་སར་ལྭས་མི་སླེབས་པའི་དཔེ་ལྟར་མི་འགྱུར་བའི་ངེས་པའང་མེད། དེ་ལྟར་ན་ང་རང་གི་ལ་རྒྱ་འཆོར་བ་རེད། ངའི་ནུ་བོ་དང་ལྷ་སྐྱིད་གཉིས་ལ་འབྲེལ་བ་ཡོད་པ་ནི་ངས་ངོ་མ་མ་ཤེས། དེའི་སྐོར་ལ་ངས་ཚིག་རྔ་མནའ་ཡིས་བསྒགས་ཆོག དེ་བཞིན་དུ།
ལྷ་སྐྱིད་ངའི་ཆུང་མར་བྱིན་ཡོད་པ་དང་། ངས་ཀྱང་ལྷ་སྐྱིད་ཚུར་འགུགས་ཐབས་བྱས་པའི་གནས་ཚུལ་དེ་ཚོ་ནུ་བོས་ཀྱང་མི་ཤེས་པ་ངས་ཚིག་ཐག་བཅད་ནས་བཤད་ཐུབ།
ངས་གོ་སྐབས་འོས་འཚམས་ཤིག་ལ་སྒུག་ཅིང་ཡོད་ཙ་ན། གནམ་གྱིས་ང་ལ་སྐལ་གནང་བ་འདྲ། ལྷུན་གྲུབ་དང་ལྷ་སྐྱིད་གཉིས་ཚིག་རྩོད་བྱས་ནས་ཁྱི་དང་ར་འཕྲད་པ་ལྟ་བུར་གྱུར་སོང་། ངའི་སེམས་ལ་དགའ་སྤྲོ་ཚད་ལས་འདས་པ་ཞིག་བྱུང་ནའང་སེམས་ཀྱི་དྲན་ཚུལ་དེ་ཚོ་ཕྱི་ལ་ཕུད་མ་མྱོང་། དགོང་མོ་དེར།
ངའི་སེམས་ཀྱི་གསང་བ་དེ་ཚོ་ཚེ་རིང་ལ་བཤད་དགོས་བསམས་མོད། འོན་ཀྱང་།
ངས་ལྷ་སྐྱིད་དང་ལྷུན་གྲུབ་གཉིས་ཚིག་རྩོད་བྱས་པའི་གནས་ཚུལ་དེ་ནུ་བོ་ལ་བཤད་སྐབས། ཁོས་ཅི་མི་སྙམ་པའི་ངང་ནས་ཁོང་དགོད་བྱེད་པ་ལས་ཁ་ཅི་ཡང་མི་གྲགས་པས། ངས་ཀྱང་གསང་བ་དེ་རང་གི་སེམས་ལ་བཟུང་ནས་བསྡད་པ་ཡིན། དེ་དུས་ལྷ་སྐྱིད་ལ་ཁ་ཡག་ངོ་དགའ་བྱེད་པའི་ཕོ་གསར་འགའ་རེ་ཡོད་ནའང་། དེ་ཚོ་ལ་འཐབ་ཟླ་བྱས་ཀྱང་རྒྱལ་ཁ་ཐོབ་ངེས་རེད། དེའི་ཕྱིར།
ངས་སྔར་ནས་ཉོས་ཡོད་པའི་ལག་ཕྱིས་མེ་ཏོག་ཅན་དང་ཀ་ར་རྒྱ་མ་གང་བོ་དེ་ལྷ་མོ་བརྒྱུད་ནས་ལྷ་སྐྱིད་ལ་སྟེར་དུ་བཅུག་པ་ཡིན། ངས་ལྷ་སྐྱིད་ཀྱིས་མགོ་ལ་ལག་ཕྱིས་དཀྲིས་ཡོད་པ་མཐོང་ནས་རང་གི་ཡིད་ལ་རེ་བའི་འབྲས་བུ་སྨིན་སོང་སྙམ་ནས་དགའ་སྤྲོ་བརྗོད་ཀྱིས་མི་ལང་བ་ཞིག་སྐྱེས་བྱུང་། ཡིན་ན་ཡང་།
ལྷ་མོས་གཡོ་བྱས་ནས་ང་ལ་མགོ་སྐོར་བཏང་བ་དེ་སུ་ཡིས་ཤེས། སྐབས་དེ་དག་ཏུ་ལྷ་མོས་ང་ལ་ཚིག་འདྲ་མི་འདྲ་མང་པོ་བཤད་ན་ཡང་། ངས་ཁོ་མོའི་ཚིག་དེ་དག་གསང་བརྡ་ཡིན་པ་མ་ཤེས་པ་དང་། ཁོ་མོས་ང་ལ་རྣམ་འགྱུར་འདྲ་མིན་སྣ་ཚོགས་བསྟན་ན་ཡང་ངས་ཁོ་མོ་ལ་ཁ་ཡ་མ་བྱས། ཁོ་མོས་ཚེ་རིང་ལ་དངུལ་གྱི་མཛུབ་དཀྲིས་བསྐུར་བ་དང་ཤ་བཤའ་སྐབས་ཚེ་རིང་དང་ལྷ་མོ་གཉིས་ཀྱིས་གསང་གཏམ་ཤབ་ཤུབ་བཤད་པའི་ཚུལ་དེ་མཐོང་ནས། ངའི་སེམས་ལ།
ཚེ་རིང་དང་ལྷ་མོ་གཉིས་ཀ་མཛའ་གྲོགས་རེད་བསམས་བྱུང་།
ཚེ་རིང་སྟོང་འཁོར་ལ་སློབ་སྦྱོང་བྱེད་དུ་སོང་རྗེས། ངས་ལྷ་སྐྱིད་ལ་བྱིན་པའི་ལག་ཕྱིས་དེ་ལྷ་མོའི་མགོ་ལ་དཀྲིས་ཡོད་པ་མཐོང་མ་ཐག ང་རང་ཡ་མཚར་བ་དང་། ལྷ་སྐྱིད་ཀྱིས་ལག་ཕྱིས་སོ་མ་ཞིག་དཀྲིས་འདུག་པས་ངའི་སེམས་ལ་རང་དབང་མེད་པར་དོགས་པ་སྐྱེས་བྱུང་།
སྐབས་དེར། ལྷུན་གྲུབ་ཀྱིས་ང་ལ་སེམས་གཏམ་མང་པོ་བཤད་པ་དང་། ངས་ཀྱང་རང་གི་གསང་བ་རྣམས་ལྷུན་གྲུབ་ལ་བཤད་པ་ཡིན།
གྲོགས་པོ། ད་ལྟའི་མོ་གསར་རྣམས་ལ་བློ་གཏོད་རྒྱུ་ཁྱོན་ནས་མི་འདུག བུ་མོའི་སེམས་ནི་ནམ་མཁའི་གློག་ཞགས་འཁྱུག་པ་ལྟར་འགྱུར་ལྡོག་ཆེ་ལ། དེ་ཚོའི་ཁོག་པ་ནི་དུང་དཀར་གྱི་ཁོག་པ་འབུས་གང་བ་བཞིན་གཡོ་སྒྱུས་ཁེངས་འདུག དེ་བས་ད་ལྟ་ལག་སྔ་བརྩད་ནས་སྡེ་བ་ཡོངས་ཀྱི་སྐྱེས་ཕོ་མོ་རྒན་གཞོན་ཀུན་ལ་གོ་བར་བྱས་ན་དགའ།
ངས་ད་དུང་ལྷ་སྐྱིད་ཀྱི་འཐད་མིན་དྲིས་མེད་པས། དེ་ལྟར་བྱས་ན་་་
གླེན་པ་ཁ་ནག་ཁྱོད། ཁྱོད་ཀྱི་ལག་ཕྱིས་ཁོ་མོས་མགོ་ལ་དཀྲིས་པ་དེ་འཐད་པའི་བརྡ་མ་ཡིན་ནམ།
འོ་ན། ཇི་ལྟར་་་
ལྷུན་གྲུབ་ཀྱིས་སླར་ཡང་ངའི་ཚིག་མཚམས་བཅད་དེ། ཕག་ལ་སྣ་དགོས།
མི་ལ་བློ་དགོས་ཟེར་བ་མ་ཐོས་སམ། ལས་འགན་དེ་ང་ལ་སྤྲད་པས་ཆོག སང་ཉིན་ནམ་ལངས་དུས་སྡེ་བའི་སྐྱེས་ཕོ་མོ་རྒན་གཞོན་ཀུན་གྱིས་ཤེས་པ་ཞིག་བྱེད་མ་ཐུབ་ན། ང་ལྷུན་གྲུབ་ཟེར་བ་ཨ་མའི་བུ་དང་རྒོད་མའི་རྟེའུ་མིན། ཟེར།
ངོ་མ། ལྷུན་གྲུབ་ལ་གླེང་ཕྱོགས་བཟོ་བའི་ནུས་པ་ཧ་ལས་པ་ཞིག་འདུག ཕྱི་ཉིན།
ལྷ་སྐྱིད་དང་ངེད་གཉིས་ཚུལ་ཇི་ལྟར་ངོ་འཕྲད་པ་དང་། གཏམ་ཇི་ལྟར་གླེང་བ། སེམས་ཇི་ལྟར་མཐུན་པ་སོགས་གཅིག་གི་མགོ་ལ་གཉིས། བརྒྱ་ཡི་མགོ་ལ་སྟོང་བཏགས་ཏེ་གླེང་གིན་ཡོད་པ་དང་། གནས་ཚུལ་དེ་དག་ནི་ངའི་སེམས་ལ་དྲན་རྒྱུ་ལྟ་ཅི། ཐ་ན་རྨི་ལམ་དུའང་རྨིས་མ་མྱོང་བ་ཤ་སྟག་རེད།
གང་ལྟར་ཡང་། གླེང་ཕྱོགས་དེ་སྡེ་བ་ཡོངས་ལ་ཁྱབ་པ་དང་། ངའི་ཨ་ཕས་ཀྱང་གོ་སྐབས་དེ་དང་བསྟུན་ནས་གཉེན་བསླངས་པས་ལྷ་སྐྱིད་ཀྱི་ཨ་ཕས་ཀྱང་དགའ་དགའ་སྤྲོ་སྤྲོའི་ངང་ལྷ་སྐྱིད་ངའི་ཆུང་མར་བྱིན།
ཡིན་ན་ཡང་། ལྷ་མོས་ང་ལ་རྒྱུ་མཚན་རྣམས་གསལ་པོར་བཤད་རྗེས། ང་རང་ནོངས་འགྱོད་ཆེན་པོ་སྐྱེས་པ་དང་། སེམས་ལ་སྡུག་བསྔལ་བཟོད་གླགས་མེད་པ་ཞིག་སྐྱེས་བྱུང་། ཉིན་དེའི་དགོང་མོར། ངས་ཨ་ཕ་ལ་གནས་ཚུལ་རྣམས་གསལ་པོར་བཤད་པ་དང་། ལྷ་སྐྱིད་དང་ངེད་གཉིས་ཀྱི་གཉེན་འབྲེལ་དེ་མཚམས་གཅོད་དགོས་པའི་ཞུ་བ་བྱས་ན་ཡང་། ཨ་ཕ་གད་མོ་དགོད་བཞིན་དུ། འོ། ངོ་མ་ཡ་མཚན་རེད། ཡིན་ན་ཡང་། ཁྱོད་སྤུན་གཉིས་ལ་ཁྱད་པར་ཅི་ཡོད། དེར་མ་ཟད། ཁྱོད་ནི་བུ་ཆེ་མགོ་ཡིན་པས། ཁྱོད་ལ་ཆུང་མ་མ་བླངས་པར་ནུ་བོར་མནའ་མ་ལེན་སྲོལ་མེད། ཨ་ཞང་རྒད་པོ་ཡང་ཐུགས་གཏུམ་པོ་ཞིག་ཡིན་པས་ཡང་སློག་འོར་སློག་བྱས་ན་ཐུགས་མི་དགྱེས། ཚེ་རིང་ནི་ལས་བྱེད་པ་ཡིན་པས་བུ་མོ་གཞོན་ནུ་མ་ཚོས་ཕྱི་བསྐོར་ནང་བསྐོར་བྱེད་ངེས་རེད། གལ་ཆེ་བ་ཁྱོད་རེད། ད་ང་རྒད་པོའི་བསམ་དོན་གྲུབ་སོང་། ཟེར།
རྒད་པོ་ཚོའི་སེམས་ནི་ཤིང་སྐམ་ལས་གཉའ་རེངས་པ་དང་། ཀོ་གྱོང་ལས་ཞེ་གྱོང་བ་ཞིག་ཡིན་པས། ང་ལ་བཅོས་ཐབས་ཅི་ཡང་མི་འདུག དེར་ངའི་སེམས་ནས་ཐབས་ཤེས་གཞན་ཞིག་འཐེན་དགོས་སྙམ།
ལོ་གསར་ཚེས་པ་བཅུ་གཉིས་ལ་སླེབས་སོང་། ལྷ་སྐྱིད་དང་ངེད་གཉིས་གཉེན་སྒྲིག་གི་ཡི་གེ་ལེན་དུ་འགྲོ་བའི་དུས་ཚོད་ལ་ཉིན་ཧྲིལ་བོ་གཉིས་ལས་མི་འདུག ངའི་སེམས་ནི་རྒྱ་མཚོའི་རྦ་རླབས་ལྟར་འཁྲིགས་ཀྱིན་འདུག ཉིན་དེའི་ཕྱི་ཇའི་ཚད་ཙམ་ལ། ལྷ་སྐྱིད་ཀྱིས་གོམ་པ་ལྗིད་ཐེག་གེར་སྤོས་ཏེ་སྡེ་བའི་རྩྭ་ཁང་གི་ཕྱོགས་སུ་འགྲོ་བ་མཐོང་། ངའི་སེམས་ལ།
ད་ནི་གོ་སྐབས་འགྲིག་པས་ང་ཡང་ཁོ་མོའི་རྗེས་དེད་ནས་སོང་སྟེ། རང་གི་ཉེས་པ་རྣམས་ཇི་མ་ཇི་བཞིན་དུ་བཤད་དགོས་པ་དང་། གཉེན་སྒྲིག་གི་ཡི་གེ་ལེན་དུ་མི་འགྲོ་བར་ཐབས་ཅི་ཡོད་ཀྱིས་ཚེ་རིང་ཕྱིར་ལོག་རག་བར་དུ་བསྒུགས་ཏེ། ཚེ་རིང་དང་ཁོ་མོ་གཉིས་གཉེན་སྒྲིག་ཏུ་འཇུག་རྒྱུའི་བཀོད་པ་རྣམས་ལྷ་སྐྱིད་ལ་གྲོས་བསྡུར་བྱེད་དགོས་བསམས།
ཁོ་མོ་རྩྭ་ཁང་ལ་འགྲོ་སའི་དེའུ་འབུར་ཆུང་ཆུང་ཞིག་ཡོད་པ་དེའི་རྒྱབ་ལ་ཡལ་རྗེས། ང་འཆམ་འཆམ་བྱེད་ཁུལ་གྱིས་ཁོ་མོའི་རྗེས་བསྙེགས་ནས་སོང་བ་ཡིན། རྩྭ་ཁང་དེ་ནི་དེའུ་འབུར་ཆུང་ཆུང་དེའི་རྒྱབ་ཀྱི་གཤོང་བུ་ཅུང་ཟད་ངོས་ཡངས་པ་ཞིག་ཏུ་ཡོད་ལ། ནམ་རྒྱུན་དུ་རྟ་རྫི་དང་བོང་རྫི་སོགས་ཕྱུགས་ཀྱི་རྫི་བོ་མ་གཏོགས་དེར་འགྲོ་དོན་མེད་པས། དེ་རིང་ལྷ་སྐྱིད་རྩྭ་ཁང་ནང་ལ་འགྲོ་དོན་ཅི་ཞིག་ཡིན་ནམ། ངའི་སེམས་བློང་བློང་བོར་གྱུར་ཏེ་གོམ་སྟབས་ཇེ་མགྱོགས་སུ་བཏང་ནས་སོང་བ་ལ། རྩྭ་ཁང་གི་སྒོ་ཟུར་ཙམ་ཕྱེས་འདུག རྩྭ་ཁང་ནང་ནས་འུག་པ་རྒན་པོའི་མིད་པ་ལས་བྱུང་བ་ལྟ་བུའི་སྒྲ་ཡ་མཚན་ཅན་ཞིག་གྲགས་པ་ཐོས། ངས་མྱུར་མོར་རྩྭ་ཁང་གི་སྒོ་ཕྱེས་པ་ན། ཨ་ཁ།
ཁང་ཀླད་ཀྱི་རྒྱུག་འཁྱོག་པོ་ཞིག་གི་སྟེང་དུ་སྐེ་རགས་དམར་པོ་ཞིག་ཐུར་དུ་དཔྱངས་ཡོད་པ་དང་། སྐེ་རགས་ཀྱི་སྣེ་མོ་ནི་ཨ་ལོང་དང་བཅས་ཏེ་བུ་མོ་ཞིག་གི་སྐེ་ལ་བསྐོན་འདུག བུ་མོ་དེའི་གདོང་གྱེན་དུ་ཕྱོགས་པ་དང་། མིག་གཉིས་བགྲད་ཅིང་། ལྕེ་བསྣར་ཏེ་ལུས་པོ་འཕག་འཚག་བར་མེད་དུ་བྱེད་ལ། ད་ཅི་ངས་ཐོས་པའི་འུག་པ་རྒད་པོའི་མིད་པ་ལས་བྱུང་བ་ལྟ་བུའི་སྒྲ་དེ་ནི་ཁོ་མོའི་མགྲིན་པ་ལས་བྱུང་བར་སྣང་ཞིང་། རིམ་གྱིས་སྒྲ་དེ་ཡུན་ཇེ་ཐུང་ཇེ་ཐུང་དུ་གྱུར་པ་དང་གདངས་ཀྱང་ཇེ་དམའ་ཇེ་དམའ་རུ་གྱུར། ད་ནི་གནད་དོན་གཞན་དག་ལ་བསམ་བློ་གཏོང་ཁོམ་མི་འདུག ངས་མྱུར་མོར་སྐག་གི་གློ་གྲི་ཕྱུང་ནས་སྐེ་རགས་དེ་དུམ་ཧྲུག་གེར་བཅད་མ་ཐག་བུ་མོ་དེ་ཤི་མ་གསོན་གྱི་ངང་ནས་ངའི་པང་དུ་ལྗིད་ཐེག་གེར་ལྷུང་སོང་། ངའི་ལུས་པོ་ཡོངས་རྫོགས་དངངས་འདར་བར་མེད་དུ་བྱེད་པ་དང་། མགོ་ཡི་སྐྲ་རྣམས་གྱེན་དུ་གཟེངས་ཤིང་ལུས་ཀྱི་བ་སྤུ་རྣམས་ཀྱང་གཟེངས་པར་གྱུར། ཁོ་མོའི་སྐེ་ཡི་མདུད་པ་ཇི་ལྟར་གྲོལ་བའང་མ་ཤེས་པར་ལག་པ་འདར་སིག་སིག་གིས་ཁོ་མོའི་བྲང་ལ་ཕུར་ཕུར་བྱེད་ཀྱིན་འདུག
ཡུད་ཙམ་ནས། དབུགས་ཀྱི་འབྱུང་རྔུབ་བྱེད་ཚུལ་རྒྱུན་ལྡན་དུ་གྱུར་པ་དང་། གདོང་མདོག་ཀྱང་རིམ་གྱིས་ཇེ་དྭངས་སུ་སོང་སྟེ། དཔྲལ་བའི་མིག་གཉིས་བཙུམ་མ་ཕྱེས་ཀྱིས་ངའི་གདོང་ལ་ལྟ་བཞིན། ཁྱོད་ལ་ཉེས་པ་ཡོད། ཅེས་ཟེར།
ངས་མགོ་ལྕོག་ལྡེམ་ལྡེམ་བྱེད་པ་ལས་ཁ་ཅི་ཡང་གྲགས་མ་ཐུབ་ལ། མིག་དང་མགྲིན་པ་གཉིས་ཀ་མཆི་མས་བརྣངས་པར་གྱུར།
ང་གསོན་ན་ཚེ་རིང་གི་མི་ཡིན། ཤི་ན་ཚེ་རིང་གི་འདྲེ་ཡིན། ཁྱོད་ཀྱི་ཆུང་མ་ངས་མི་འདོད། ཁོ་མོའི་མིག་གི་ཁྲག་རྩ་ཐམས་ཅད་དམར་པོ་དམར་རྐྱང་དུ་གྱུར་པ་དང་། དཔྲལ་བའི་མིག་གཉིས་ནི་མེ་ཕོན་ཆེན་པོ་ཞིག་དང་འདྲ་བར་ངའི་གློ་སྙིང་ཐམས་ཅད་བསྲེགས་པ་ལྟ་བུའི་ཚོར་སྣང་སྐྱེས། ང་རང་ནི་སྔར་བྱས་ཀྱི་ལས་ལ་ཤིན་ཏུ་འགྱོད་ན་ཡང་འགྱོད་བཤགས་བྱེད་པའི་ཚིག་གཅིག་ཀྱང་སྨྲ་མ་སྤོབས།
དེ་ལྟར་ཡུན་ཅུང་རིང་བོ་ཞིག་འདས་རྗེས། ངས་སྔར་བྱས་ཀྱི་བྱ་བ་དང་སྤྱོད་པ་ཐམས་ཅད་ཁ་ཁོག་པས་མ་གསང་། བློ་རྒྱུ་མས་མ་བསྐུམས་པར་ལྷ་སྐྱིད་ལ་ཇི་མ་ཇི་བཞིན་དུ་བཤད་པ་དང་། ལྷ་མོས་གཡོ་བྱས་ཚུལ་དང་། ལྷུན་གྲུབ་ཀྱིས་ངན་བསླབས་ཚུལ་སོགས་ཀྱང་རྒྱས་པར་བསྙད་པས། ཁོ་མོའི་ཁོང་ཁྲོ་རིམ་གྱིས་ཞི་བ་དང་། གདོང་ལ་ཅུང་ཟད་ངོ་ཚ་བའི་རྣམ་འགྱུར་ཞིག་ཤར་འོངས། དེ་ནས་ངས་ཁོ་མོ་ལ་མོ་རང་ལྕེབས་པའི་གནས་ཚུལ་དེ་སུ་ལའང་མི་སྒྲོག་པའི་དམ་བཅས་ཤིང་། ངའི་ཨ་ཕ་དང་མོའི་ཨ་ཕ་གཉིས་ལ་གཏམ་ལན་འཇལ་བའི་གྲོས་རིམ་གྱིས་བྱ་རྒྱུའི་ཐག་བཅད།
དེའི་ཕྱི་ཉིན་ནས་བཟུང་། ལྷ་སྐྱིད་དགའ་དགའ་སྤྲོ་སྤྲོའི་ངང་ནས་ངེད་ཀྱི་ཁྱིམ་ལ་འོངས་པ་དང་། ང་ཡང་ཁོ་མོ་ཚང་ལ་ཕར་སོང་ནས་ཀུ་རེ་རྩེད་མོ་རྩེ་བཞིན་བསྡད་པ་ཡིན། ཉིན་དེ་དག་ལ་ངའི་ཨ་ཕ་དང་ཁོ་མོའི་ཨ་ཕ་གཉིས་ཀའང་དགའ་ཞིང་སྤྲོ་ལ། དགོང་ལྟར་མཉམ་གཅིག་ཏུ་ཆང་འཐུང་ནས་ལབ་རྒྱག་བཞིན་འདུག ཡིན་ན་ཡང་།
ལྷ་སྐྱིད་དང་ངེད་གཉིས་ཀྱི་གསང་བའི་གྲོས་དེ་ཁོ་ཚོས་ཤེས་ཐུབ་རྒྱུ་མ་རེད། ངས་ལྷ་མོའི་བསམ་ཚུལ་ཡང་གཞི་ནས་ཧ་གོ་སོང་བས། ཁོ་མོ་ལ་འཛུམ་གྱི་གསང་བརྡ་ལན་འགར་བསྟན་ན་ཡང་། དང་ཐོག་ཁོ་མོས་ང་ལ་ཁ་ཡ་མི་བྱེད་མོད། འོན་ཀྱང་ལྷ་སྐྱིད་ཀྱིས་ངེད་གཉིས་ཀྱི་གསང་གྲོས་དེ་ཁོ་མོ་ལ་ཟུར་ཙམ་བཤད་རྗེས། ཁོ་མོས་ཀྱང་ང་ལ་སྙིང་ཉེ་ཉེ་དང་ཤ་ཚ་ཚ་བྱས།
ལོ་གསར་གྱི་ཚེས་པ་བཅོ་ལྔ་སླེབས་སོང་། ལྷ་སྐྱིད་དང་ངེད་གཉིས་དགའ་དགའ་སྤྲོ་སྤྲོའི་ངང་ནས་ཀུང་ཧྲེའི་ནང་དུ་གཉེན་སྒྲིག་གི་ཡི་གེ་ལེན་དུ་སོང་བ་ཡིན། ལམ་དུ་ཆས་ཁར་མི་མང་པོ་ཞིག་གིས་ངེད་གཉིས་ལ་སྐྱེལ་མ་བྱས་པ་དང་། ལྷུན་གྲུབ་ཀྱི་གདོང་ལ་གཡོ་སྒྱུའི་འཛུམ་ཞིག་ལངས་ཏེ་ཚུར་འོངས་ནས། གྲོགས་པོ།
ཆོས་མགོ་འཁྱོངས་དུས་བླ་མ་མ་བརྗེད། གཉེན་མགོ་འཁྱོངས་དུས་བར་པ་མ་བརྗེད་ཟེར་བ་ཡིན་པས། ཀུང་ཧྲེ་ནས་ཕྱིར་ལོག་དུས་ང་ལ་ཆང་སྐལ་ཞིག་འཁྱེར་ཡོང་རྒྱུ་བརྗེད་མི་ཉན། ཟེར།
ཁྱོད་ལ་གཅིན་སྐལ་ཅིག་འཁྱེར་ཡོང་།
ངས་ལན་ཅི་ཞིག་འདེབས་དགོས་པའང་མ་ཤེས་པར་ཡོད་དུས། ལྷ་སྐྱིད་ཀྱིས་དེ་ལྟར་བཤད་པ་དང་། ལྷུན་གྲུབ་ཀྱིས་ལྕེ་བསྣར་ཞིག་བྱས་ཏེ་ཁོང་དགོད་བྱེད་བཞིན་གདའ།
ང་ཚོ་ཀུང་ཧྲེ་ནང་དུ་ཕར་འགྲོ་དུས། ལྷ་སྐྱིད་དང་ངེད་གཉིས་མཉམ་དུ་སོང་བ་དང་། ཕྱིར་ལོག་དུས་ལྷ་སྐྱིད་ནི་གར་སོང་མི་ཤེས་པ་དང་། ངའི་ཡོང་རོགས་ནི་ལྷ་མོ་རེད། ཨ་ཕས་གཉེན་སྒྲིག་གི་ཡི་གེར་ལྟ་བཞིན་དཔྲལ་བའི་སྨིན་མ་སྟུག་པོར་བསྡུས་པ་དང་། ངའི་ཁོག་ཏུ་དགོད་པའི་གྲུ་གུ་འཕར་ལྡིང་བྱེད་བཞིན་འདུག
ཡིན་ན་ཡང་། ལྷ་སྐྱིད་བླ་བྲང་ལ་བྲོས་པའི་གནས་ཚུལ་དེ་ང་ལ་འབྲེལ་བ་སྤུ་ཙམ་ཡང་མེད་པས། ངན་ཁག་ཐམས་ཅད་མོ་རང་ཉིད་ཀྱིས་འཁུར་འོས། མ་ཁྲེལ་མེད་ཟེར་བ་དེ་ལྷ་སྐྱིད་རེད། ཀྭ་ཡེ་ཕོ་གསར་རྣམ་པ། ལྷ་སྐྱིད་ལ་ཁྲེལ་གཞུང་ཡོད་མེད་དེ་ཁྱོད་ཚོས་ཁོ་མོར་དྲིས་ཤིག
ལྷ་སྐྱིད་ཀྱི་སྡུག་བསྔལ།
ང་རང་ད་ལྟ་འཇིག་རྟེན་མི་ཡུལ་དུ་འཚོ་བ་རོལ་ཐུབ་པ་ནི་རིག་ཡག་གི་དྲིན་ཡིན། གལ་ཏེ་ཉིན་དེར་ཁོས་རྩྭ་ཁང་ནས་ངའི་ཚེ་སྲོག་མ་བསྐྱབས་པ་ཡིན་ན། ང་རང་འཇིག་རྟེན་མི་ཡུལ་དང་བྲལ་ཟིན། རིག་ཡག་གིས་ང་ནི་མི་ཁྲེལ་མེད་ཅིག་རེད་ཟེར་བ་ལ་ཁག་མི་འདུག ཁྲེལ་མེད་ཀྱི་བྱ་བ་ཐམས་ཅད་ངས་བྱས་ཟིན་པས་འགྱོད་པ་སྐྱེས་ཀྱང་ཕན་པ་ཅི་ཞིག་ཡོད། དེ་བས་ངས་མ་ཎི་འགའ་རེ་བཏོན་ཏེ་རང་གི་ཉེས་ལྟུང་གི་དྲི་མ་ཐམས་ཅད་འཁྲུད་ཐབས་བྱས་པས་དགའ། སྐབས་རེར་ངའི་སེམས་ལ་རང་ཉིད་ཀྱང་ཇོ་མོ་ཞིག་བྱེད་དགོས་སྙམ་ན་ཡང་། ཚེ་རིང་གི་བཞིན་རས་དང་། ཆུང་དུས་ཀྱི་བརྩེ་དུངས། གཞོན་ནུའི་སྐབས་ཀྱི་མཛའ་མཐུན་བཅས་ནི་བདུད་ཀྱིས་ཆོ་འཕྲུལ་བསྟན་པ་བཞིན་ངའི་ཁྲ་ཆུང་མིགལམ་དུ་ལྷང་ངེར་འཆར་འོང་གིན་འདུག
སྤྱིར་ང་ཡང་ད་ལྟའི་མོ་གསར་རྣམས་དང་འདྲ་བར་འཇིག་རྟེན་གྱི་འཚོ་བ་རོལ་འདོད་ཤིན་ཏུ་ཆེ་ན་ཡང་། ངའི་ཁ་སྒོ་སྐྱེས་གཟུགས་འདི་དགྲ་རུ་ལངས་ཏེ་དྲིན་ཕ་མའི་དྲུང་དུ་སྡོད་དབང་མེད་ལ། སེམས་མཐུན་པའི་གྲོགས་དང་འགྲོགས་དབང་མེད་པར་གྱུར། གལ་སྲིད་ཚེ་རིང་སྟོང་འཁོར་དུ་འགྲོ་ཁར་གཉེན་སྒྲིག་གི་ཡི་གེ་བླངས་ཡོད་རྒྱུ་ན། ངའི་གངས་དཀར་སེམས་ལ་སྡུག་བསྔལ་གྱི་གཉེར་མ་འདི་གྱོན་དོན་མི་འདུག འཇིག་རྟེན་གྱི་གཏམ་དཔེ་ལ། མ་བུ་མོ་ཚང་གི་སྐྲ་རིང་ཡང་བློ་ཐུང་ཟེར་བ་དེ་ངོ་མ་བདེན་པར་འདུག ངའི་ཚིག་འདིས་མོ་གསར་རྣམས་ལ་ཕོག་ཐུག་གཏོང་ལས་ཆེ་ན་ཡང་། མ་མཐར་ང་རང་ཉིད་ནི་དེ་ལྟ་བུ་ཞིག་རེད།
ཚེ་རིང་སྟོང་འཁོར་ལ་སློབ་སྦྱོང་དུ་སོང་རྗེས། སྡེ་བའི་ནང་ནས་ང་ལ་ལབ་གླེང་བྱེད་པའི་གཏམ་འདྲ་མིན་སྣ་ཚོགས་ཤིག་གྲགས་སོང་། ཨ་མས་ང་ལ་རིག་ཡག་བཟང་ཚུལ་རྒྱན་ཚུལ་གྱི་གཏམ་མང་པོ་བཤད་པ་དང་། ཨ་ཕས་ངས་ཞུ་བ་བྱེད་པ་ལ་མི་ཉན་པར་ཨུ་ཚུགས་མཐར་སྐྱེལ་བྱས། སྔོན་ཆད་སྤྱི་ཚོགས་རྙིང་པའི་ནང་། ངའི་ཨ་ཕ་ཕྱི་ལོགས་སུ་ཚོང་ལ་སོང་ནས་ཕྱིར་ལོག་དུས། ལམ་ཁར་ཇག་པ་གསུམ་ལ་འཕྲད་དེ་ཁོ་ཚོས་ངའི་ཨ་ཕའི་ལག་གི་རྒྱུ་ནོར་རྣམས་ཕྲོགས། ཨ་ཕ་ཤིང་སྡོང་ཞིག་ལ་བཏགས་ཏེ་གྲིས་བརྒྱབ་སྟེ་གསོད་རྩིས་བྱེད་པའི་སྐབས་དེར། རིག་ཡག་དང་ཚེ་རིང་སྤུན་གཉིས་ཀྱི་ཨ་ཕ་ཉི་མས་རང་གི་སྲོག་ལ་མ་འཛེམས་པར་གྲི་ཕྱུང་ཏེ་བརྒྱུགས་འོངས་པས། ཇག་པ་ཚོ་ཁོའི་རྒྱབ་ན་ད་དུང་མེ་མདའ་ཞིག་ཁུར་ཡོད་པ་དེར་འཇིགས་ནས་རྟབ་རྟབ་པོར་རྟ་ལ་ཞོན་ནས་བྲོས་སོང་། དེ་ལྟར་ངའི་ཨ་ཕའི་སྲོག་བསྐྱབས་པ་དང་རྒྱུ་ནོར་རྣམས་ཀྱང་མ་ཤོར་བས་ཨ་ཁུ་ཉི་མ་དང་ངའི་ཨ་ཕ་གཉིས་ཀྱིས་མནའ་མཆེད་བསྒྲིགས། བཅིངས་འགྲོལ་བྱས་པའི་ལོ་དེར། ཁོང་གཉིས་ཀ་ལོ་སུམ་ཅུ་ལྷག་ལ་སླེབས་ཟིན་པས། གཉེན་གྱི་མགོ་བཟུང་བ་དང་། གཉེན་སྒྲིག་དགའ་སྟོན་ཡང་ཉིན་གཅིག་ལ་བྱས། ཕྱི་ལོ།
ཚེ་རིང་གི་ཨ་མས་རིག་ཡག་སྐྱེས་པ་དང་། དེ་ནས་ལོ་གཅིག་འགོར་བ་ན་ངའི་ཨ་མ་ལའང་མངལ་སྦྲུམ་པར་གྱུར།
ཉིན་ཞིག་གི་དགོང་མོ། ཨ་ཁུ་ཉི་མ་ངེད་ཚང་ལ་ཡོང་བ་དང་། མནའ་མཆེད་གཉིས་ཀྱིས་ཆང་འཐུང་ཞོར་དུ་སྔོན་ཆད་ཀྱི་གནས་ཚུལ་རྣམས་ཕྱིར་དྲན་བྱས།
དེ་དུས་ཁྱོད་སྐབས་ཐོག་ཏུ་མ་ཡོང་ན། ང་གཤིན་རྗེའི་ཆོས་རྒྱལ་མཇལ་དུ་སོང་ཚར་ཟིན། ངའི་ཨ་ཕས་ཆང་ཧུབ་གང་འཐུངས་ནས་དེ་ལྟར་བཤད།
སྔོན་ཆད་ཀྱི་བྱ་བ་རྣམས་འདས་ཟིན། དེ་ཚོ་གླེང་ཡང་རྒྱུ་མཚན་ཆེན་པོ་མི་འདུག མནའ་མཆེད།
ངའི་ཁོག་ན་བཀོད་པ་ཞིག་ཡོད་མོད། འོན་ཀྱང་་་
ཨ་ཁུ་ཉི་མས་ངའི་ཨ་མའི་གདོང་ལ་ལྟ་བཞིན། ཅུང་ཟད་དྭོགས་མི་བདེ་བའི་ངང་ནས་ཚིག་མཚམས་བཅད།
ཤོད་ཡ།
ཤོད། འུ་སྤུན་གཉིས་ཀྱི་བར་ལ་བཤད་རྒྱུ་དང་གསང་རྒྱུ་ཅི་ཞིག་ཡོད།
དེ་རེད།
དེ་རེད། ངའི་སེམས་ལ་དྲན་པའང་དེ་ཡིན། ཨིན་་་
ཨིན་་་
ཨ་ཁུ་ཉི་མས་ཚིག་ངག་ལས་མ་འཁྲོལ་བས། ངའི་ཨ་ཕ་ཅུང་ཟད་མ་རངས་པའི་སྒོ་ནས་མིག་ཡོན་པོར་ལྟ་ཞིང་བསྡད་པ་དང་། དེའི་ཚུགས་ཀ་ལ་བལྟས་ན། ཁྱོད་ང་ལ་ཡིད་མི་ཆེས་ན་བཤད་མི་དགོས། ཞེས་འཁང་ར་བྱེད་པ་དང་འདྲ།
ཧེ་ཧེ། ཨ་ཁུ་ཉི་མ་བཙན་ཚུགས་ཀྱིས་གད་མོ་དགོད་བཞིན། དྲང་མོར་བཤད་ན། ངས་ཁྱོད་ལ་གཉེན་གྱི་འབྲེལ་ཞིག་འཛིན་བསམས་པ་ཡིན། ང་ལ་བུ་གཅིག་ཡོད་པ་ནི་ཁྱོད་ཀྱིས་ཤེས་གསལ་ལྟར་རེད། དབང་མཚོ་ཡང་མངལ་སྦྲུམ་འདུག་པས། གལ་ཏེ་བུ་མོ་ཞིག་བཙས་པ་ཡིན་ན་ངའི་བུ་ལ་ཆུང་མར་སྟེར་རོགས་གནང་།
ཧ་ཧ་ཧ།
མནའ་མཆེད་ཁྱོད། ངས་དམིགས་པ་བུ་ཞིག་ཡིན་ཀྱང་ཁྱོད་ཀྱིས་འདོད་པ་བུ་མོ་ཞིག་རེད། གལ་ཏེ་ཁྱོད་ཀྱི་ཁ་ཐོག་ལ་སོང་ན་ཁྱོད་ལ་ལོས་སྟེར།
ཕོ་རབ་ཚིག་ཐོག་དང་། འཕར་བ་རྗེས་ཐོག་ཡིན་ནམ།
ལོས་ཡིན།
ལོས་ཡིན། ཁྱིས་མི་བཟའ་ལྕགས་དང་། མིས་མི་བཟའ་མནའ་ཡིན།
དེ་ལྟར་ང་ད་དུང་འཇིག་རྟེན་འདིར་མ་འོངས་གོང་ནས་ཨ་ཕས་ངའི་གཉེན་དོན་ཐག་བཅད་ཟིན། ཡིན་ན་ཡང་།
གནས་ཚུལ་དེ་ཚོ་ངས་གཏན་ནས་མ་ཤེས་ལ། ཐ་ན་ང་བུ་མོའི་གློ་སྙིང་གཏོད་ས་གཅིག་པུར་གྱུར་པའི་ཨ་མ་དབང་མཚོས་ཀྱང་ཚིག་ཟུར་ཙམ་ཡང་བཤད་མ་མྱོང་། ལོ་གསར་ཚེས་པ་གསུམ་གྱི་ཉིན། ཨ་ཕས་ང་རང་རིག་ཡག་གི་ཆུང་མར་བྱིན་ཚར་རྗེས། ངས་ངུ་འབོད་ཀྱིས་ཕ་མ་གཉིས་ལ་ཞུ་བ་བྱས་པ་ན། ཨ་མས་ངའི་མགོ་ལ་བྱིལ་བྱིལ་བྱེད་བཞིན་གོང་གསལ་གྱི་གཏམ་དེ་དག་བཤད་བྱུང་། ཨ་ཁ།
བུ་མོའི་ལས་དབང་ཟེར་བ་ནི་དེ་ལྟ་བུ་ཞིག་ཡིན་ནམ། དྲིན་ཆེན་གྱི་ཕ་མའི་དྲིན་ལན་དེ་ངས་ཚེ་གང་ལ་འཇལ་དཀའ་ན་ཡང་། བུ་མོའི་སེམས་ཀྱི་བདེ་སྡུག་ལ་མི་བལྟ་བར་ང་རང་འཆི་ལམ་དུ་རྫོང་བ་འདི་ཅི་ཞིག་ཡིན་ནམ། དེ་ལྟར་ངས་བསམ་བློ་གཏོང་བཞིན་ཕ་མ་ལ་ཡི་མུག་པ་དང་། འཁོར་བ་ལ་སྐྱོ་བ་སྐྱེས་བྱུང་། ཇི་ལྟར་དཔྱད་ཀྱང་སེམས་ནི་སྡུག་བསྔལ་གྱི་རྒྱ་ལས་ཐར་མི་ཐུབ་པས། ལོ་གསར་ཚེས་པ་བཅུ་གཉིས་ཉིན་གྱི་ཕྱི་དྲོ།
ཨ་ཙི།
ད་དེ་ཚོ་སེམས་ལ་དྲན་ན་ཡིད་སྐྱོ་ཞིང་སེམས་འགྱོད་པ་དང་ངོ་གནོང་དགོས་པ་ཞིག་རེད། རིག་ཡག་གིས་ང་ལ་སེམས་གསོའི་ཁ་བརྡ་མང་པོ་བྱས་པ་དང་། ལྷ་མོ་དང་ངེད་གསུམ་གྱིས་གྲོས་བྱས་ཤིང་བློ་བསྡུར་མཐར། ཚེས་བཅོ་ལྔའི་ཞོགས་པར། ལྷ་མོ་སྔོན་ལ་སོང་ནས་ཀུང་ཧྲེ་ནས་སྒུག་རྒྱུ་དང་། ང་རང་ལམ་སྐེད་ནས་ཟི་ལིང་ལ་འགྲོ་བའི་འགྲུལ་བཞུད་རླངས་འཁོར་དུ་བསྡད་དེ་ཚེ་རིང་ལ་བལྟ་རུ་འགྲོ་རྒྱུའི་ཐག་བཅད། རིག་ཡག་དང་ངེད་གཉིས་ཁ་འབྲལ་སྐབས། ཁོས་ང་ལ་ཤོག་སྒོར་ཉི་ཤུ་བྱིན་པ་དང་། ལམ་ཁར་སེམས་ཆུང་བྱེད་དགོས་ཚུལ་སོགས་ང་ལ་སེམས་བཟང་ཞིང་ངག་འཇམ་པའི་ཁ་བསྒོ་མང་པོ་བྱས།
སྔོན་ཆད་ང་རང་ཕ་ཡུལ་དང་ཁ་བྲལ་ནས་ཕྱི་ལོགས་སུ་སོང་མ་མྱོང་བས། ང་འགྲུལ་བསྐྱོད་རླངས་འཁོར་གྱི་ཨོང་སྟེགས་སྙི་ཞིང་བདེ་བ་དེའི་ཐོག་བསྡད་པས་སྐྱིད་སྣང་ཞིག་སྐྱེས་མོད། སྐད་རིགས་མི་མཐུན་པའི་མི་དེ་དག་གིས་སྐད་ཆ་ལྡབ་ལྡིབ་དེ་ཚོ་བཤད་པ་ཐོས་ཚེ། སེམས་སྟོང་ཞིང་ཡིད་སུན་པའི་སྣང་བ་ཞིག་སྐྱེས་བྱུང་། དེ་ལྟར་སོང་སོང་བས་ཁོ་ཚོ་ཡང་ཐང་ཆད་དེ་ལ་ལ་ཞིག་གཉིད་ནས་གཡས་ལོག་གཡོན་ལོག་བྱས་འདུག ལ་ལས་རླངས་འཁོར་གྱི་དྲ་མའི་ཕྱི་རོལ་གྱི་ཡུལ་ལྗོངས་ལ་ལྟ་ཞིང་འདུག ངའི་ཡིད་ཀྱི་མེ་ལོང་ལ་ཆུང་དུས་ཀྱི་བདེ་སྐྱིད་ལྡན་པའི་བྱིས་པའི་དུས་སྐབས་ཀྱི་འདས་དོན་རྣམས་གློག་བརྙན་བཞིན་ཤར།
དབྱར་ཟླ་དྲུག་པའི་ནང་། སྡེ་བའི་ཁོ་ར་ཁོར་ཡུག་གི་ས་ཞིང་ནང་ལོ་ཏོག་སྔོ་ལྗང་ལྗང་དུ་སྐྱེས་འདུག་ལ། འཇམ་ཞིང་བསིལ་བའི་རླུང་གིས་དལ་བུར་རེག་པ་ན་དེ་ནི་རྒྱ་མཚོའི་རླབས་གཉེར་ཤིག་ཤིག་འགུལ་བ་དང་མཚུངས། འབུ་ཆ་ག་བ་དང་བྱིའུ་རྣམས་ཀྱིས་ཅག་ཅག་དང་ཙིར་ཙིར་གྱི་སྒྲ་དབྱངས་སྙན་མོ་སྒྲོག་པར་བྱེད་ཅིང་། ཕྱེ་མ་ལེབ་དང་འབུ་གཤོག་ཐོགས་རྣམས་ཀྱིས་བར་སྣང་ན་གར་སྟབས་བསྒྱུར་བ་དང་། ཐག་རིང་ས་ནས་བྱ་ཁུ་བྱུག་གིས་ཀི་ཀོ ཀི་ཀོ་ཞེས་གསུང་སྙན་སྒྲོག་བཞིན་འདུག ནམ་མཁའི་ལྷོ་མཐའ་ནས་སྤྲིན་དཀར་ནག་འདྲེས་མ་ཞིག་བྲེལ་སྟབས་ཀྱིས་བྱང་ཕྱོགས་སུ་རྒྱུ་བ་དང་། ཡུད་ཙམ་ནས་སྦྲང་ཆར་ཟམ་ཟིམ་བབས་པའི་མོད་ལ་བར་སྣང་དུ་ཁ་དོག་སྣ་ལྔ་བཀྲ་བའི་དབང་བོའི་གཞུ་རིས་ཤར་བ་དང་། ལོ་ཏོག་དང་ལྡུམ་བུ་རྣམས་ཀྱི་འདབ་མའི་སྟེང་ལ་ཟིལ་ཐིགས་ཆུང་ངུ་མང་པོ་ཆགས་འདུག
ཨ་རྒྱ་ཚེ་རིང་། འཇའ། འཇའ།
ངས་འཇའ་རིས་ཤར་བའི་ནམ་མཁའ་ལ་མཛུབ་མོས་སྟོན་བཞིན་འཇའ་ཡི་སྣེ་མོ་ཞིག་ཐག་མི་རིང་བའི་ལུང་བར་ཟུག་འདུག་པ་དེའི་ཕྱོགས་སུ་བརྒྱུགས། ཡུད་ཙམ་ནས།
ཚེ་རིང་ངའི་སྔོན་ལ་ཤོར། ངས་ཇི་ལྟར་བསྙེགས་ཀྱང་རྗེས་ཟིན་པ་མི་འདུག དེར་ང་རང་ངུ་ཁུལ་བྱས་པ་ལ། ཚེ་རིང་ཕྱིར་བརྒྱུགས་ཡོང་ནས་ང་ལ་ངོ་ཡག་བྱས་པ་དང་། ངེད་གཉིས་ཀྱིས་ལུང་བ་དེའི་མདོར་སླེབས་པ་ན་འཇའ་རིས་དེ་ཕར་ཕྱོགས་ཀྱི་རི་རྩེ་ན་འདུག་པ་དང་། རིམ་གྱིས་མི་སྣང་བར་གྱུར།
ད་ཅི་ཁྱོད་ངུས་སྟབས་ཨ་ཆེ་འཇའ་རིས་མ་དགའ་བར་ལྷ་ཡུལ་དུ་ཕྱིར་ལོག་པ་རེད། རྗེས་སུ་འཇའ་ཤར་ན་ཁྱོད་མ་ངུ་། ངས་ཅིས་ཀྱང་འཛིན་ཐབས་བྱེད་དགོས།
ངས་ཚེ་རིང་གི་གཏམ་དེ་བདེན་དུ་རློམ་ནས་མགོ་བོ་གུག་གུག་བྱས་པ་དང་། ཆར་ནམ་འབབ་དང་འཇའ་ནམ་ཤར་ལ་རེ་སྒུག་བྱས་ནས་བསྡད་པ་ཡིན། ཡིན་ན་ཡང་།
དེ་ནས་བཟུང་ཆར་བ་ཐེངས་མང་པོར་བབས་ཀྱང་འཇའ་ཚོན་ཤར་པ་ནི་ངས་མཐོང་མ་མྱོང་།
ཏོའུ་ཏོའུ། ཞེས་རླངས་དུང་གི་སྒྲ་ཞིག་གིས་ང་རང་ཡེ་རེར་བཏང་། ངའི་མིག་མཐར་དབང་མེད་དུ་མཆི་མ་འཁོར་འདུག་ལ། སེམས་ཡུལ་ཡུལ་བོར་གྱུར་འདུག སྡེ་བའི་མི་ཁ་དང་། རིག་ཡག་གི་ལས་ཕྱིས། ལྷུན་གྲུབ་ཀྱི་སྡིགས་མོ། ཨ་ཕའི་ཨུ་ཚུགས། ཚེ་རིང་གི་བཞིན་རས་བཅས་ནི་ཆུ་ལོག་ཆེན་པོ་དང་འདྲ་བར་ངའི་སེམས་ཀྱི་ཡུར་བའི་ནང་དུ་དྲག་ཏུ་རྒྱུག་གིན་གདའ།
ཨ་རོག
ཁྱོད་གང་གི་ཡིན།
ངའི་ལོགས་ན་ཡོད་པའི་ཕོ་གསར་ཞིག་གིས་གློ་བུར་དུ་ང་ལ་དེ་ལྟར་དྲིས། ངས་བོད་སྐད་དེ་ཐོས་མ་ཐག་སེམས་དགའ་སྤྲོ་ཚད་མེད་པ་ཞིག་སྐྱེས་བྱུང་། ཁོའི་ལུས་ལ་རྒྱ་ལྭ་གྱོན་ཡོད་པ་དང་། མཁྲིག་མར་ཆུ་ཚོད་འཁོར་ལོ་ཞིག་བཏགས་ཡོད་པ་ལ་བལྟས་ན་ལས་བྱེད་པ་ཞིག་དང་འདྲ་མོད། འོན་ཀྱང་རྒྱ་ལྭའི་གོང་བ་ཁར་ཚིལ་དྲེག་ཆགས་པ་དང་། ལས་པའི་ཤ་ནི་ནག་ཅིང་མཛུབ་མོ་སྦོམ་ལ་སེན་མོའི་བར་དུ་དྲེག་པ་ཆགས་ཡོད་པ་ལ་དཔྱད་ན་སོ་ནམ་པ་ཞིག་དང་འདྲ། གང་ལྟར་ཡང་འགྲོ་རོགས་བོད་མི་ཞིག་ཡོད་པས་ངའི་སེམས་ཡང་རང་བཞིན་གྱིས་བདེ་ལ་བབས་སོང་། ཁོས་ང་ལ་གཏམ་མང་པོ་དྲིས་པ་དང་། ངས་ཀྱང་ཁོ་ལ་ང་རང་སྟོང་འཁོར་ལ་འགྲོ་རྒྱུའི་གནས་ཚུལ་སོགས་བཤད། ཡིན་ན་ཡང་།
ངའི་སེམས་ཀྱི་སྡུག་བསྔལ་གི་སྐོར་ནི་ཚིག་གཅིག་ཀྱང་མ་བཤད། ཁོས་བཤད་པ་ལྟར་ན། ཁོའི་ཕ་ཡུལ་རེབ་གོང་ཡིན་པ་དང་། ད་ལྟ་སྐུ་འབུམ་ལ་མཇལ་སྐོར་དུ་འགྲོ་བ་ཡིན་ཟེར།
ལམ་ཁར་ཁོས་ང་ལ་ཀ་ར་དང་སིལ་ཏོག་མང་པོ་བྱིན་པ་དང་། ཟི་ལིང་ལ་སླེབས་ནས་ཀྱང་ང་རང་མགྲོན་ཁང་དུ་ཁྲིད་ནས་སྣེ་ལེན་བཟང་བོ་བྱས་བྱུང་བས། ངས་སེམས་ལ་ཁོ་ནི་མི་སེམས་བཟང་ཞིག་རེད་སྙམ། ཕྱི་ཉིན།
ཁོས་ང་ལ་རླངས་འཁོར་གྱི་འཛིན་བྱང་ཞིག་སྤྲད་དེ། དེ་རིང་སྟོང་འཁོར་ལ་འགྲོ་བའི་རླངས་འཁོར་མི་འདུག སང་ཉིན་གྱི་འཛིན་བྱང་ཉོས་ཡོད། གལ་ཏེ་ཁྱོད་རང་སྐུ་འབུམ་ལ་མཇལ་དུ་འགྲོ་ན་ང་ཚོ་མཉམ་དུ་སོང་ཆོག ཟེར།
ངའི་སེམས་ལ།
ད་ཐེངས་འགྲོ་རོགས་ཀྱང་བཟང་བས་སྐུ་འབུམ་ལ་སོང་ཆོག་སྙམ། དེར་ངས་ཁོ་ལ།
སྟོང་འཁོར་དུ་འགྲོ་བའི་རླངས་འཁོར་གྱི་འཛིན་བྱང་གི་རིན་པ་ཅི་ཙམ་ཡིན། ཞེས་དྲིས་པ་ན། ཁོས་ཅི་མི་སྙམ་པའི་ངང་ནས། ས་ཕྱོགས་གཅིག་གི་མི་ཡིན་པས་ཤོག་སྒོར་འགའ་ལ་དེ་འདྲའི་མཐོང་ཆེན་བྱེད་མི་དགོས། ཟེར་ནས་ངའི་སྒོར་མོ་མི་ལེན་པར། སྐུ་འབུམ་ལ་འགྲོ་བའི་རླངས་འཁོར་གྱི་རིན་པའང་ཁོས་བྱིན།
སྐབས་དེར་སྐུ་འབུམ་གྱི་ཆོས་སྒོ་ཕྱེས་མ་ཐག་ཡིན་པས། མཇལ་སྐོར་དུ་འགྲོ་མཁན་ཧ་ཅང་མང་ལ། ཁོ་རང་ནི་དགོན་སྡེ་དེ་ལ་ཆ་རྒྱུས་ཡོད་པས། ང་ལ་རྟེན་ངོ་མཚར་ཅན་མང་པོའི་རྒྱུ་མཚན་ངོ་སྤྲོད་བྱས་པ་དང་། ངས་ཀྱང་རྟེན་དེ་དག་ལ་སྒོ་གསུམ་གུས་པའི་ངང་ནས་མཇལ་བ་ཡིན། རྒྱུ་མཚན་ཅི་ཞིག་ཡིན་པ་མི་ཤེས་མོད། ཕྱི་དྲོ་ཉི་མ་ནུབ་ལ་ཡོད་དུས། ཁོས་ཧ་ལས་པའི་ངང་ནས། ཨ་ཁ།
ད་མ་འགྲིག ཟི་ལིང་ལ་འགྲོ་བའི་རླངས་འཁོར་ཕྱིར་ལོག་ཚར་བས་ད་ཅི་བྱེད། ཅེས་བྲེལ་འཚུབ་ལངས་ནས་ལག་མགོའི་དུས་ཚོད་འཁོར་ལོ་ལ་ཡང་ཡང་ལྟ་བར་བྱེད། ང་རང་སང་ཉིན་སྟོང་འཁོར་ལ་འགྲོ་དགོས་པས་སེམས་ཚིག་ནས་མེ་འབར་བ་ལྟར་གྱུར།
ད་སེམས་མ་འཚིག
སྐུ་འབུམ་ནས་ཟི་ལིང་བར་དུ་ལེ་བར་སུམ་ཅུ་ཙམ་མ་གཏོགས་མེད་པས་ཐག་ཉེ། དེ་རིང་ཉིན་གང་ལ་མཇལ་སྐོར་བྱས་ནས་ཟ་མའང་ཟོས་མེད་པས། ཁྱོད་ཀྱང་ལྟོགས་ཡོད་རྒྱུ་རེད། ད་འུ་གཉིས་ཀྱིས་ཟ་ཁང་ཞིག་འཚོལ་ལ། ཕོ་བ་འགྲང་རྗེས་རྐང་ཐང་ལ་འགྲོ།
ཁོས་ང་ཁྲིད་ནས་ཟ་ཁང་ཆུང་ཆུང་ཞིག་གི་ནང་དུ་སོང་བ་དང་། འཐེན་ཐུག་དཀར་ཡོལ་དོ་ཉོས་ཡོང་། འཐེན་ཐུག་འཐུང་ཞོར་དུ་ཁོས་འཁུར་ཁུག་སེར་པོ་ཞིག་གི་ནང་ནས་ཆང་ཤེལ་དམ་གང་ཕྱིར་བླངས་ཏེ་ཧུབ་ཀྱིས་འཐུངས། ངས་ཁོ་ཆང་གིས་བཟི་བར་དོགས་ཏེ་ཉུང་ཙམ་འཐུང་རྒྱུའི་ཁ་བསྒོ་བྱས་ཀྱང་། ཁོས་ང་ལ་ཁོ་ཆང་གིས་བཟི་རྒྱུ་མེད་པའི་གནས་ཚུལ་མང་པོ་བཤད། བལྟས་བལྟས་རིག་རིག་ལ་ཤེལ་དམ་སྐེད་ལ་ཕབ་འདུག་པས། ངས་ཁོ་ལ་ཞུ་བ་མི་བྱེད་ཀ་མེད་བྱུང་། དེར་ཁོས་ཀྱང་ངའི་ཁ་ལ་ཉན་ནས་ཆང་འཐུང་མཚམས་བཞག་པ་དང་། ངེད་གཉིས་ཟི་ལིང་ལ་ཕྱིར་ལོག་པའི་ལམ་དུ་ཞུགས་པ་ཡིན།
ས་ཡོངས་སུ་རུབ་སོང་། དཀར་གསལ་གྱི་ཉ་གང་ཟླ་བ་དེ་ཨ་སྔོན་དབྱིངས་ན་འཛུམ་དཀར་གྱི་ཚེམས་ཕྲེང་དགོད་པ་དང་། ཟླ་བའི་དཀྱིལ་གྱི་རི་བོང་ནི་བློ་བདེ་བག་ཕེབས་ཀྱི་ངང་ནས་ཉལ་འདུག་ལ། རྒྱུ་སྐར་གྱི་ཚོགས་རྣམས་ཀྱང་རང་ས་ན་འཛུམ་མུལ་ལེར་མཆིས། ནམ་མཁའ་འདི་ལྟར་དྭངས་ལ་ཟླ་བ་འདི་ལྟར་གསལ་བའི་མཚན་མོ་ལ། གློ་བུར་དུ་མ་རུང་གཟའ་ཡི་གནོད་འཚེ་ཡོང་བ་སུ་ཞིག་གིས་ཤེས་ཐུབ།
ང་ལ་ཤ་ཚ་ཚ་དང་སྙིང་ཉེ་ཉེ་བྱེད་པའི་མི་དེ་ནི་ལུག་ལྤགས་གྱོན་པའི་སྤྱང་ཀི་ཞིག་དང་། གཡོ་སྒྱུ་ཆེ་བའི་ལྭ་མོ་ཞིག་རེད། ཁོ་ཆང་གིས་བཟི་ཁུལ་གྱིས་ངའི་སྐེ་ལ་ལག་པས་འཁྱུད་པ་དང་། གོམ་པ་འཁྱོར་ཁུལ་གྱིས་ང་རང་ས་ལ་བསྒྱེལ་བའི་སྐབས་དེར། ངས་ཀྱང་དོན་རྐྱེན་ངན་པ་ཞིག་འབྱུང་རྒྱུ་ཡིན་པ་ཤེས་ཏེ་ཐབས་ཅི་ཡོད་དང་ཤུགས་ཅི་ཡོད་བཏོན་ན་ཡང་། སེམས་གནག་ཅིང་སྦྱོར་བ་རྩུབ་པའི་འདམ་ཆར་དེས་ངའི་ལང་ཚོའི་མེ་ཏོག་གི་འདབ་མ་དྲི་དང་བྲལ་བའི་ཐོག་ཏུ་མི་གཙང་སྙིགས་རོའི་འདམ་ཁུ་གོས་ཟིན་པས། ནོངས་འགྱོད་སྐྱེས་ཀྱང་འཕྱིས་དྲགས་འདུག ད་ནི་ཚེ་རིང་གི་མདུན་ལ་འགྲོ་ཚུལ་མེད་པ་དང་། ན་ཟླའི་གྲས་ནས་མགོ་ཡར་འགྱོག་ཚུལ་ཡང་མེད་པས། འདི་ལྟར་གསོན་པ་ལས་འཆི་བ་རང་དགའ་སྙམ་པའི་བསམ་བློ་དེ་ཡང་ཡང་འཁོར་ཞིང་འོངས། ངའི་སེམས་ཀྱི་སྡུག་བསྔལ་གནོན་ཐབས་མི་འདུག་པས་སྐད་ཆེན་པོ་བཏོན་ནས་ངུ་འབོད་བྱས་པ་ཡིན། སྐབས་དེར།
ངའི་མིག་གིས་བལྟ་ཕྱོགས་ཀྱིས་ཟླ་འོག་ཏུ་མིའི་གྲིབ་མ་ཞིག་ནག་ཡོར་ཡོར་ཚུར་འོངས་པ་མཐོང་བ་དང་། བྲེལ་ཤ་ཆེ་བའི་གོམ་སྒྲ་ཞིག་ཐྲིག་ཐྲིག་ཕར་བརྒྱུགས་པ་ཐོས་བྱུང་། དེའི་མོད་ལ་ངའི་མིག་མཐར་མེ་སྟག་དམར་འཚུབ་འཚུབ་འཆར་བ་དང་། རྣ་བའི་ལམ་དུ་བང་བང་དུ་གྲགས། མགོ་བོ་ནག་འཐོམས་པར་གྱུར་ཏེ་དྲན་པ་ཤོར་སོང་།
ང་བརྒྱལ་བ་ལས་སངས་པའི་ཚེ། ས་གཞི་ཆེན་པོའི་ཐོག་ཏུ་ཞོགས་པའི་སྐྱ་རེངས་ཀྱི་འོད་སྣང་ཤར་ཏེ་དཀར་གསལ་ལེར་འདུག་པ་དང་། གྲང་ཞིང་བསིལ་བའི་རླུུང་གིས་ཉེ་འདབས་ཀྱི་རྩྭ་དང་རྩི་ཤིང་རྣམས་ཕར་གཡོ་ཚུར་གཡོ་བྱེད་ཀྱིན་མཆིས། ང་རང་གད་པ་ཆུང་ཆུང་ཞིག་གི་རྩ་ན་ཉལ་འདུག་པ་དང་། ངའི་ལུས་ཐོག་ཏུ་ཕྱིང་བ་དཀར་པོ་ཞིག་བཀབ་འདུག ང་རང་ཅུང་ཟད་ཧ་ལས་ཏེ་མགོ་བོ་ཡར་བཀྱགས་པ་ན། ངའི་འཁྲིས་སུ་ཇོ་མོ་ཞིག་ཙོག་པུར་བསྡད་ཡོད་ལ། ཁོ་མོས་འཛུམ་མུལ་མུལ་གྱི་ངང་ནས་ང་ལ་ལྟ་བཞིན། མདང་དགོང་ཁྱོད་མ་གྲང་ངམ། ཞེས་དྲིས།
ངས་མགོ་བོ་གཡུག་གཡུག་བྱེད་བཞིན་དུ། མ་གྲང་།
མ་གྲང་། ཁྱོད་གང་ནས་ཡོང་བ་ཡིན། ཞེས་དྲིས་པ་ལ། ཇོ་མོ་དེས་ང་ལ་གདུང་སེམས་ཚད་མེད་བཅངས་པའི་རྣམ་འགྱུར་སྟོན་བཞིན། ད་ཡར་ལོངས།
ཁྱོད་ཟི་ལིང་ལ་འགྲོ་རྒྱུ་ཡིན་ནམ། ངེད་གཉིས་འགྲོ་ཞོར་དུ་ཁ་བརྡ་བྱེད། ཟེར།
ཁོ་མོ་ནི་བླ་བྲང་ནས་སྐུ་འབུམ་ལ་མཇལ་སྐོར་དུ་ཡོང་བ་རེད། ལམ་ཁར།
ཁོ་མོས་ང་ལ་གཏམ་མང་པོ་དྲིས་པ་དང་། ངས་ཀྱང་རང་གི་ལོ་རྒྱུས་རྣམས་ཇི་མ་ཇི་བཞིན་དུ་བཤད་པས། ཁོ་མོས།
དཀོན་མཆོག་གསུམ་པོ་མཁྱེན། ཁྱོད་ངོ་མ་བུ་མོ་ལས་ངན་ཞིག་རེད། ཟེར།
ཟི་ལིང་ལ་སླེབས་རྗེས། ཁོ་མོས་ང་ལ། ལྷ་སྐྱིད།
ཁྱོད་ཀྱིས་བཤད་པ་ལྟར་ན། ཚེ་རིང་ནི་མི་སེམས་བཟང་ཁྲེལ་ཡོད་ཅིག་རེད། སྤྱིར་ཁྱོད་ལ་མི་འདོད་པའི་རྐྱེན་ངན་པ་ཞིག་བྱུང་ཟིན་ན་ཡང་། རྒྱུ་མཚན་རྣམས་དྲང་མོར་བཤད་ན་ཁོས་ཀྱང་ཁྱོད་ལ་ངན་ཁག་དཀྲི་མི་སྲིད། ངས་བལྟས་ན།
ཁྱོད་སྟོང་འཁོར་ལ་སོང་ན་དགའ།
ཟེར།
མིན།
ད་ནི་ང་རང་བུ་མོ་མི་གཙང་བ་ཞིག་ཏུ་གྱུར་ཟིན་པས། ང་ཚེ་རིང་གི་མདུན་ལ་ཇི་ལྟར་འགྲོ། ཚེ་རིང་གིས་ང་ལ་འཁང་ར་མི་བྱེད་ན་ཡང་། ཁོའི་སེམས་ནས་ང་ལ་བཟོད་སྒོམ་བྱེད་ཐུབ་བམ། གལ་སྲིད་བཟོད་སྒོམ་བྱེད་ཐུབ་པའི་དབང་དུ་བཏང་ན་ཡང་། རྗེས་སོར་ང་ལ་ཡིད་ཆེས་བྱེད་ཐུབ་བམ། ཨ་ཁ།
ད་ནི་ལས་ངན་མ་ངའི་ལས་ནི་ཟད་སོང་། ཚེ་རིང་ལྟ་རུ་འགྲོ་བའི་སྤོབས་པ་མེད་པས། ངས་མགོ་བོ་འཕྲེད་དུ་གཡུགས་པ་ཡིན།
འོ་ན།
ད་ཁྱོད་གང་ལ་འགྲོ་རྩིས་ཡོད།
ང་གང་ལ་འགྲོ་རྒྱུ། འགྲོ་ས་ནི་གཏན་ནས་མི་འདུག ང་ལ་བསྒུགས་ཏེ་བསྡད་ཡོད་པ་ནི་གཤིན་རྗེའི་ཆོས་རྒྱལ་རེད། དམྱལ་བའི་ཡུལ་དུ་འགྲོ་ན་མ་གཏོགས་འགྲོ་ལམ་གཅིག་ཀྱང་མི་འདུག ངས་སྔར་བཞིན་མགོ་བོ་འཕྲེད་དུ་གཡུག་པ་ལས་ལན་འདེབས་པའི་ཡིག་འབྲུ་གཅིག་ཀྱང་བཤད་རྒྱུ་མེད་པར་གྱུར།
དེས་ན།
རེ་ཞིག་ང་རང་གཉིས་མཉམ་དུ་བླ་བྲང་ལ་འགྲོ། རྗེས་སོར་ཐབས་དང་བཀོད་པ་རིམ་གྱིས་འཐེན་ཆོག ཁྱོད་ལ་བསམ་འཆར་མེད་ན་སང་ཉིན་ལམ་ལ་ཆས།
ཕྱི་ཉིན་ནམ་མ་ལངས་གོང་དུ། ང་རང་ཁོ་མོ་དང་འགྲོགས་ཏེ་བླ་བྲང་ལ་ཆས་པ་ཡིན། ཞོགས་པའི་སྐྱ་རེངས་ཀྱི་བུ་མོའི་མགུལ་བར་ཐུན་མཚམས་ཀྱི་ཆུ་འཛིན་དམར་སེར་གྱི་རྒྱན་ཆ་བཏགས་ནས་ཤར་ཕྱོགས་ཀྱི་རི་རྩེ་ལས་འཛུམ་མུལ་ལེར་བྱུང་བ་དང་། དགུང་ཨ་སྔོན་སྔོ་ཞིང་དྭངས་ལ་སོ་མ་ཆུས་བཀྲུས་པའི་ནོར་བུ་སྔོན་པོ་ལེབ་མོ་ཆེན་པོ་ཞིག་དང་འདྲ། ཟི་ལིང་གི་ཙོང་ཆུ་དལ་བ་རིང་མོ་ནི་ད་དུང་འཁྱགས་རོམ་གྱི་སྦུབས་ན་གཉིད་དུ་ཡུར་ཏེ་སྐབས་རེར་སྔུར་བ་ཡང་མོར་འཐེན་པ་དང་། ལ་ཆའི་གཞུང་ལམ་དུ་རླངས་འཁོར་རེ་གཉིས་ཀྱིས་དུང་སྒྲ་སིང་སིང་སྒྲོག་བཞིན་ཤར་ཕྱོགས་སུ་རྒྱུག་གིན་གདའ། ངས་ཙོང་ཆུ་རིང་མོའི་འགྲམ་གྱི་གཞུང་ལམ་སྟེང་གོམ་པ་ལྗིད་ཐེག་གེར་སྤོས་ཏེ་ཇོ་མོ་སྒྲོམ་མའི་རྗེས་འབྲངས་ནས་འགྲོ་ཞོར་དུ། གངས་དཀར་སེམས་ཀྱི་མེ་ལོང་ངོས་ལ་དྲི་རྟགས་ཆེན་པོ་རེ་རེ་བཞིན་ཤར་འོངས་པ་འདི་ལྟ་སྟེ།
བུ་མོ་མའི་མངལ་ན་ཡོད་དུས་གཉེན་གཏམ་སྡེ་བའི་དཀྱིལ་ནས་བཤད་པའི་ཕ་མ་ཚོ་ལ་ཞེ་ཁྲེལ་ཡོད་དམ།
ལུས་རྟེན་ཕ་མས་བསྐྲུན་ཀྱང་རང་ལུས་ལ་རང་ལ་མི་དབང་བ་འདི་བོད་ཀྱི་སྲོལ་རྒྱུན་ཡིན་ནམ།
ཨ་ཙི།
ཚེ་རིང་དང་ངེད་གཉིས་ཀྱི་མཛའ་མཐུན་གྱི་བསམ་པ་གཞི་གཅིག་ཏུ་འབྲེལ་བ་ལས་བྱུང་བའི་བརྩེ་དུངས་ཀྱི་མེ་ཏོག་དེ་འདི་ལྟར་སད་ཀྱིས་བཅོམ་པ་དང་། འཇིག་རྟེན་གྱི་འཚོ་བ་དང་མ་འོངས་པའི་བདེ་སྐྱིད་ལ་ཕྱོགས་ཞེན་ཆེ་བའི་བུ་མོ་ངའི་ལང་ཚོའི་མེ་ཏོག་གི་འདབ་མ་འདི་གློ་བུར་དུ་རྙིད་ཅིང་རྙིངས་པར་འགྱུར་དོན་ཅི་ཞིག་ཡིན་ནམ། འདི་དག་ཐམས་ཅད་ངའི་ལས་དབང་ཡིན་ནམ་་་ ་་་